İlyas İsmayılovun vəfatından sonra Ədalət partiyası rəhbərliyində başlayan çəkişmələr deyəsən, kulminasiya nöqtəsinə çatıb.
“AzPolitika” xəbər verir ki. partiyadan daxil olan məlumata görə, 26.04.2025-ci il tarixində Ədalət partiyasının Ali Məclisinin növbəti açıq iclası keçirilib.
Partiya sədrinin səlahiyyətlərini icra edən Ali Məclisin sədri Meydan Babayev iclasda yetərsayın olduğunu bildirib və iclası açıq elan edib. Sonra dövlət himni səsləndirilib, şəhidlərimizin və partiyanın mərhum sədri İlyas İsmayılovun xatirəsi bir dəqiqəlik sükutla yad edilib.
İclasın reqlamenti və gündəliyi səsvermə ilə təsdiq edilib. İclasda partiyanın bütün rəhbərliyi, partiya sədrinin səlahiyyətlərini icra edən Ali Məclisin sədri, Ali Məclis sədrinin müavinləri, Rəyasət heyətinin üzvləri, partya sədrinin müavini, Siyasi Şuranın üzvləri və mərkəzi aparatın rəhbərliyi, Ali Məclisin üzvləri iştirak edib. Gundəlikdə aşağıdakı məsələlər təsdiq edilib.
1. Yeni yaradılmış rayon və şəhər təşkilatlarının statusunun təsdiqi.
2. Ali Məclisin yeni üzvlərinin təsdiqi.
3. Qurultayın vaxtının və nümayəndəlik normasının müəyyənləşdirilməsi.
4. Qurultayın keçirilməsi üçün Təşkilat Komitəsinin yaradılması.
5. Partiya daxilində yaranmış vəziyyət və gələcək hədəflər
Partiyadan "AzPolitika"-ya verilən məlumatda bildirilir ki, son bir neçə ayda partiya rəhbərliyinin intensiv fəaliyyəti nəticəsində yaradılmış yeni rayon təşkilatlarının statusu və nümayəndələrinin Ali Məclis üzvlüyünə səlahiyyətləri təsdiq olunub, novbəti qurultayın 31 may 2025 - ci il tarixdə keçirilməsi, rayon təşkilatlarından 3-nəfər qurultaya nümayəndəlik normasının müəyyənləşdirilməsi haqqında qərar qəbul olunub. Daha sonra, 9-nəfərdən ibarət Təşkilat Komitəsinin tərkibi təsdiq edilib.
İclasda son vaxtlarda partiya daxilində yaranmış vəziyyət, gələcək perspektivlər barəsində Ali Məclis sədrinin 1-ci müavini Elçin Qurbanov, partiya sədrinin müavini Vüsalə Dadaşova və digərləri çıxış ediblər. Ali Məclisin sədri Meydan Babayev çıxışında son bir neçə ayda partiya daxilində nizamnaməyə zidd fəaliyyətlərin qarşısının alması istiqamətində görülən tədbirlər haqqında danışıb. Qeyd olunur ki, o, partyanın bütövlüyünü qorumaq məqsədilə pozuculuq fəaliyyəti ilə məşğul olan şəxs (şəxslər) barədə edilmiş şifahi və yazılı xəbərdarlıqlar ardından partiya sədrinin vəzifələrindən irəli gələn səlahiyyətlər çərçivəsində nizamnaməyə zidd şəkildə keçirilmiş iclasın qərarına veto qoyduğunu toplantı iştirakçılarının diqqətinə çatdırıb.
M. Babayev bütün bunlara baxmayaraq partiyadaxili separatçı fəaliyyətin davam etdirildiyini və buna görə də Ali Məclis sədri tərəfindən müvafiq sərəncam qəbul edildiyini bildirib. Eymi zamanda Siyasi Şura tərəfindən 24.05.25-ci il tarixdə növbəti iclasda sərəncama uyğun olaraq müvafiq qərar qəbul olunduğunu da elan edib.
Meydan Babayev bildirib ki, iclasda Siyasi Şuranın 9-üzvündən 6-sı iştirak edib. İclasda Mütəllim Rəhimovun iştirakı ilə onun son aylarda partiya daxilində subardinasiyaya əməl etməməsi, partiya daxilində regionçuluq təbliğatı aparması, nizamnaməyə zidd "Ali Məclis" in iclasını çağırması, Ali Məclis sədrinin səlahiyyətlərini mənimsəməsi, Ali Məclisin üzvü olmaya-olmaya "Ali Məclis" in iclasını aparması, sədrin nizamnaməyə uyğun tətbiq etdiyi “Veto hüququ”na məhəl qoymaması, uzun müddət partyanın təşkilatlanma prosesinin qarşısını məqsədyönlü şəkildə alaraq, nizamnamənin 4.7.4, 4.8.3, 4.8.4, 4.8.5, 4.8.6, 4.8.7 bəndlərini kobud şəkildə pozmasını xatırladaraq partiya nizamnaməsinin 3.6-cı maddəsinin məzmununa uyğun olaraq (partiya üzvü nizamnamə tələblərini üzürsüz səbəblərə görə pozduqda və ya partiya üzvü adına xələl gətirən hərəkətlərə yol verdikdə nizamnamə pozuntusunun xüsusiyyətindən asılı olaraq özəyin və ya yuxarı partya orqanlarının qərarı ilə ona aşağıdakı intizam tədbirlərindən biri tətbiq edilə bilər.
- nəzərinə çatdırmaq;
- xəbərdarlıq;
- töhmət;
- partiya üzvülüyündən xaric etmək) və törədilən nizamnamə pozuntularının ağır xüsusiyyətləri nəzərə alınaraq siyasi şurada Rəhimov Mütəllim Qara oğlunun Ədalət partiyasının üzvlüyündən xaric edilməsi barədə qərar qəbul edilmişdir.
Lehinə - 5
Əleyhinə -1
Bitərəf - yoxdur
Qərar Meydan Babayevin təklifi ilə Ali Məclisdə səsə qoyulub. Qərar Ali Məclis üzvlülərinin əksəriyyəti tərəfindən dəstəklənib.
Bununla da qurultay öncəsi Ali Məclisin keçirilən son iclası öz işini yekunlaşdırıb.
