Azərbaycan Respublikası Prezident Administrasiyasının təşkilatçılığı ilə siyasi partiya sədrlərinin və nümayəndələrinin işğaldan azad olunmuş ərazilərə səfəri təşkil edilir.

Bu dəfə Laçın şəhərinə təşkil olunan səfər ölkədə milli həmrəyliyin möhkəmləndirilməsi və siyasi dialoqun dərinləşdirilməsi baxımından mühüm əhəmiyyət kəsb edib. Bu kimi səfərlər bir tərəfdən dövlətin quruculuq və bərpa siyasətinin yerində izlənilməsinə imkan yaratdığı halda, digər tərəfdən müxtəlif siyasi qüvvələrin əməkdaşlığını və dövlətçilik mövqeyində birliyini nümayiş etdirir. Səfərdə iştirak edən partiya rəhbərlərinin fikirləri, bu təşəbbüsün həm vətəndaş cəmiyyətinə, həm də ölkənin gələcək siyasi inkişafına töhfələr verdiyini ortaya qoyur.

Milli Cəbhə partiyasının sədri Razi Nurullayev bildirib ki, yeni salınmış yollarla Laçına doğru hərəkət edən nümayəndə heyətini qarşılayan mənzərə Azərbaycan xalqının tarixi torpaqlarına böyük qayıdışının real təcəssümü idi:

"Laçında aparılan yenidənqurma və bərpa işləri, infrastruktur layihələri, yaşayış komplekslərinin inşası və sosial obyektlərin bərpası barədə bizlərə geniş məlumat verildi.
Səfər zamanı nümayəndələr şəhərin mərkəzində salınmış yeni yaşayış massivinə, məktəb və mədəniyyət müəssisələrinə, Laçın şəhərinin inzibati binalarına baxış keçirdilər. Onlara məlumat verildi ki, şəhərdə məskunlaşma prosesi mərhələli şəkildə davam etdirilir, vətəndaşlar üçün yüksək şərait yaradılır, müasir infrastruktur qurulur.
Siyasi partiya nümayəndələri bu kimi səfərlərin siyasi dialoqu və milli həmrəyliyi gücləndirdiyini, işğaldan azad edilmiş ərazilərdə görülən işləri yerində görməyin ölkə ictimaiyyəti üçün əhəmiyyətli olduğunu demək istəyirəm".

Partiya sədri qeyd edib ki, bu cür səfərlər Prezident Administrasiyasının təşəbbüsü ilə mütəmadi olaraq təşkil edilir və ölkədə milli həmrəyliyin gücləndirilməsi, siyasi mədəniyyətin inkişafı imkanlarının genişləndirilməsi məqsədi daşıyır.

"Laçına təşkil olunan bu səfər bir daha göstərdi ki, işğaldan azad edilmiş torpaqlarda həyat sürətlə canlanır, Azərbaycan dövləti öz torpaqlarında əzmlə, ardıcıl və planlı şəkildə quruculuq işlərini davam etdirir".

Böyük Quruluş partiyasının sədri Fazil Mustafa isə Laçın şəhərinə artıq altıncı səfərin təşkil edildiyini söyləyib:

"Bu səfərlər Prezident Administrasiyasının müvafiq şöbəsinin təşəbbüsü ilə təşkil olunur. Xüsusilə də Ədalət Vəliyev bu səfərlərdə bizlə bərabər iştirak edir və hərtərəfli şərait yaradır ki, biz hər bir detal ilə tanış olaq, aparılan quruculuq işləri barədə ətraflı məlumat əldə edək.
Hesab edirəm ki, bu səfərlər bizə buranın gələcəyi ilə bağlı daha dolğun fikir formalaşdırmaq imkanı verir. Siyasi partiyaların belə səfərlərdə iştirak etməsi və bilgilənməsi çox vacibdir. Çünki ölkənin quruculuq və bərpa prosesində bizim də müəyyən bilgilərə sahib olmağımız, təşəbbüslər irəli sürməyimiz və fikir bildirməyimiz üçün zəruridir.
Qürur duyuruq ki, Azərbaycan Prezidenti və onun komandası burada doğrudan da möhtəşəm işlər görür. Quruculuq və bərpa işləri, yeni iş yerlərinin yaradılması, həmçinin insanların mərhələli şəkildə bu ərazilərə köçürülməsi sevindirici haldır. Hesab edirəm ki, bu bizim üçün böyük bir tarixi uğurdur".

Ağ partiyanın sədri Tural Abbaslı bu səfərlərdə bütün partiya sədrləri, media nümayəndələri, qeyri-hökumət təşkilatlarının təmsilçiləri və politoloqlar iştirak etdiyini, bu baxımdan bu cür səfərlərin çox önəmli və müxtəlif aspektlərdən ciddi əhəmiyyət daşıdığını deyib:

"İlk növbədə, siyasi baxımdan, dövlətçilik baxımından bu səfərlərin xüsusi önəmi var. Burada partiya rəhbərlərinin, müxtəlif siyasi düşərgələrdən olan şəxslərin bir araya gəlməsi, ünsiyyət qurması, fikir mübadiləsi aparması siyasi münasibətlərin yeni mərhələyə keçməsi üçün bir fürsətdir. Eyni zamanda illərdir iqtidarla müxalifət arasında formalaşmış "buz divarlarının" əriməsi, qarşılıqlı neqativ yanaşmaların dəyişməsi və düşmənçilikdən sağlam rəqabət mühitinə keçid baxımından da bu səfərləri olduqca faydalı hesab edirəm.
Bundan əlavə, işğaldan azad olunmuş ərazilərdə aparılan quruculuq işlərini yerində görmək, bu bölgələrin inkişafına şahid olmaq və uzun illər sonra Azərbaycan bayrağının bu torpaqlarda dalğalandığını izləmək hər bir vətənpərvər vətəndaş üçün böyük qürur mənbəyidir. Bu da səfərlərin mühüm bir hissəsidir".

Tural Abbaslı bu səfərlərin həm daxili, həm də beynəlxalq auditoriyaya ötürdüyü ciddi mesaj ötürdüyünü, vətən, millət, torpaq, suverenlik və müstəqillik məsələləri gündəmdə olduqda, Azərbaycanın bütün siyasi və ideoloji kəsimləri bir araya gələ, bir mövqedə birləşə, yumruğu bir yerə vura bildiyini və həmrəylik nümayiş etdirə bildiyini söyləyib. Qeyd edib ki, bu səbəblə bu səfərləri faydalı və əhəmiyyətli hesab edir.
O, fürsətdən istifadə edərək, bu səfərləri təşkil edən Azərbaycan Prezident Administrasiyasının aidiyyəti şöbəsinə öz adından təşəkkür edib.

Ağ partiyanın sədr müavini Əhəd Məmmədli isə öz növbəsində iqtidar-müxalifət dialoqunun təkcə keçirilən səfərlərlə məhdudlaşmadığını söyləyib:

"Əsas məsələ ölkədə sağlam siyasi mühitin formalaşmasıdır. Biz bu məsələdə örnəyi qardaş Türkiyədən götürməliyik. Sağlam siyasi rəqabət olmalı, müxalifət dövlət strukturlarında təmsil olunmalıdır. Biz demirik ki, müxalifət icraedici strukturlarda təyin edilməlidir. Amma seçkili orqanlarda iştirakları təmin olunmalıdır. Hər kəs bilir ki, ölkəmizdə seçkilərin şəffaf keçirilməsi ilə bağlı ciddi suallar mövcuddur.
Məsələn, Türkiyədə olduğu kimi proporsional seçki sistemi bərpa olunmalıdır. Siyasət və siyasi partiyalar peşəkarlaşmalı, politologiya və siyasi şərhçilik sahəsi peşəkar səviyyədə formalaşmalıdır. Hər bir kəsə eyni və bərabər imkanlar yaradılmalıdır. Mövqelər siyahı əsasında deyil, şəxsin siyasi təcrübəsinə, analitik qabiliyyətinə və proqnozlarına görə müəyyən olunmalıdır.
Dövlət bu prosesi müşahidə etməli və dəstəkləməlidir. Yalnız kiminsə kiməsə yaxınlığı, münasibəti və ya uyğunluğu əsasında siyasətdə irəli çəkilməsi düzgün deyil. Bu yanaşma dəyişməlidir".

Sədr müavini dövlətin öz ideoloji xəttinə uyğun olan siyasi partiyaları və siyasətçiləri dəstəkləməli olduğunu və bunun həm iqtidara, həm də müxalifətə aidliyini vurğulayıb:

"Hökumətlər və müxalifətlər dəyişir, amma dövlət və onun siyasəti qalıcıdır. Dövlətin ideoloji xəttinin də qalıcı olması üçün siyasi ideologiya dövlət səviyyəsində qurulmalıdır. Siyasi ab-havanın təsiri ilə hərəkət etmək, bu gün bir şeyi tərifləyib sabah tənqid etmək doğru deyil.
Bu yanaşma siyasi konyonkturaya deyil, dövlətin əsas ideoloji xəttinə əsaslanmalıdır. Böyük dövlətlərdə bu sistem qurulub. Məsələn bu, istər Türkiyədə, istər bəyənmədiyimiz İran və ya İsraildə, istərsə də ABŞ, Fransa və Almaniyada həyata keçirilir. Onların hər birində dövlət siyasətini müəyyən edən sabit ideoloji xətt mövcuddur".

Əhəd Məmmədli böyük dövlət olmaq istəyiriksə, bu təcrübələrdən istifadə etməli olduğumuzu söyləyib. Qeyd edib ki, dövlət siyasəti və ideologiyası dövlət səviyyəsində qurulmalı və sabit şəkildə davam etdirilməlidir. Əks halda, bu kimi dialoq səfərlərinin yalnız taktiki dəyişikliklərə səbəb olacağını amma strateji və uzunmüddətli müsbət dəyişikliklər baş verməyəciyini deyib.