Son günlər erməni mediası tərəfindən geniş şəkildə yayılan bir insident yenidən erməni informasiya maşınının ikiüzlü və manipulyativ təbliğatını üzə çıxarıb.
Moderator.az xəbər verir ki, bu barədə "israelinfo.co" nəşri yazıb.
Söhbət guya İsrailin Qüds şəhərindəki erməni məhəlləsində yerləşən monastırın "təhqir olunmasından" gedir. Halbuki təqdim edilən "faktlar" və görüntülər hadisənin əsil mahiyyətini deyil, məqsədli şəkildə təhrif edilmiş versiyasını göstərir.
Hadisənin əsl mahiyyəti
Hadisə gecə saatlarında Şavuot bayramı zamanı baş verir. Videoda görünən gənc ortodoks yəhudi sadəcə yolda yerə tüpürür, bu, nə monastırın divarına, nə də hər hansı dini rəmzə yönəlmiş hərəkət deyil. Hətta həmin ərazidə ardıcıl yerləşən oxşar evlərdən hansı birinin dini tikili olduğunu müəyyənləşdirmək belə müşküldür.
Bununla belə, hadisəyə şahid olan erməni əsilli Geqam Balayan bu hərəkəti dərhal "dini nifrət aktı" kimi təqdim edir. O, yoldan keçənləri mübahisəyə çəkir, polis çağırılır, lakin hadisənin miqyasına uyğun gəlməyən emosional və siyasi yüklü təqdimat diqqət çəkir. Polis isə hadisə yerinə 25 dəqiqə sonra gəlir, bu da dərhal "ermənilərə qarşı qərəz" kimi yozulur.
Manipulyasiya və daxili ziddiyyətlər
Hadisənin təqdimatında erməni tərəfinin mövqeyi ziddiyyətlərlə doludur. Bir tərəfdən "polis çağırılıb və gələnə qədər ortodokslar qaçıb", digər tərəfdən "biz onlara dərhal getmələrini əmr etdik" kimi ifadələr bu versiyanın nə qədər zəif əsaslandığını göstərir.
Əgər erməni tərəfi hücum iddiası ilə polisə müraciət edibsə, nəyə görə "təhqir edənlərə" dərhal ərazidən çıxmağı əmr edir? Hücum varsa, deməli, cinayət var və şikayətçilər həmin şəxslərin orada qalmasını istəyərdi. Bu, açıq-aşkar təbliğat məqsədilə hazırlanmış versiyadır.
Erməni mediasının təcrübəsi: qurban rolu və beynəlxalq təsir
Ermənilərin bu cür hadisələri şişirdərək təqdim etməsi yeni deyil. Tarix boyu erməni diasporası müxtəlif ölkələrdə "təqib olunan xalq" obrazını yaradaraq həm beynəlxalq dəstək toplamağa, həm də siyasi rıçaqlar əldə etməyə çalışıb.
Bu cür hadisələri məqsədli şəkildə "xristian dəyərlərinin təhqiri", "ermənilərə qarşı nifrət" və s. adlandırmaqla həm özlərini qurban kimi təqdim edir, həm də müxtəlif dövlətlərarası münasibətləri gərginləşdirməyə cəhd göstərirlər.
Əsl problem: həqiqətin təhrif edilməsi
Ən əsası isə, İsraildə bəzən ultraortodokslar tərəfindən nümayiş olunan fanatizmə baxmayaraq, bu konkret hadisədə dini təhqir elementi aşkar deyil. Hətta hadisəni müşahidə edən insanlar üçün də bunun dini motivli olub-olmadığı aydın deyil. Sadəcə adi bir yerə tüpürmə faktının siyasi qalmaqala çevrilməsi, bunun üzərindən ermənilərin "əzabkeş xalq" narrativini gücləndirməyə çalışması ciddi ifşa tələb edir.
Nəticə olaraq bu hadisə bir daha göstərdi ki, erməni təbliğatı real faktlara deyil, siyasi maraqlara əsaslanır. Hər hansı kiçik hadisə erməni mediasında dərhal "erməni əleyhinə hücum", "xristian dəyərlərinə təcavüz", "dövlətlərin susqunluğu" və s. kimi təqdim olunur. Lakin bu cür manipulyasiyaların qarşısı yalnız obyektiv təhlil və informasiyanın dürüst şəkildə təqdim olunması ilə alına bilər.
