İyunun 3-də Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin təşkilatçılığı ilə ölkədə fəaliyyət göstərən siyasi partiya sədrlərinin Qarabağa növbəti, sayca yeddinci birgə səfəri baş tutub. Məhz Cəbrayıl və Zəngilan rayonlarına təşkil olunan bu növbəti birgə səfər, siyasi dialoqun təşviqi, milli həmrəyliyin möhkəmləndirilməsi və azad edilmiş ərazilərdə həyata keçirilən genişmiqyaslı bərpa və quruculuq işlərinin yerində izlənməsi baxımından mühüm əhəmiyyət kəsb edir. Prezident Administrasiyasının təşəbbüsü ilə reallaşan layihə təkcə siyasi partiyalararası dialoqu dərinləşdirmir. Eyni zamanda müxtəlif ictimai-siyasi institutların Qarabağda aparılan yenidənqurma proseslərinə birbaşa şahidlik etməsini təmin edir. İşğaldan azad edilmiş torpaqlara səfər edən partiya rəhbərləri də yüksək təəssüratla geri dönüblər. Budəfəki səfər turunda Müasir Müsavat Partiyasının sədri Hafiz Hacıyev də olub. Partiya rəhbəri qəzetimizə müsahibəsində Cəbrayıl və Zəngilanda həyata keçirilən quruculuq-bərpa prosesinin, görülən işlərin kifayət qədər yüksək səviyyədə olduğunu bildirib..

- Budəfəki səfərimizdə tamam başqa mənzərənin şahidi olduq. Millətin öz yurduna, dədə-baba torpaqlarına böyük istək və hörmətlə qayıtması, məskunlaşması bizi çox sevindirdi. Cəbrayılda yeni salınmış yaşayış məntəqəsində olduq, tikiş fabrikində qadınların çalışdığını görmək çox xoş oldu. Yeni infrastrukturlar yaradılıb, yeni elektrik stansiyaları tikilib. Çox böyük işlər görülüb. Cəbrayıl və Zəngilan o qədər gözəlləşib ki, sabah hamı getmək istəsə, onları yerləşdirməyə torpaq tapılmayacaq. Yeni iş yerləri açılır, yollar salınır, abadlıq işləri sürətlə gedir. Bu gün öz yurdlarına geri dönən qardaş-bacılarımız artıq təsərrüfatla məşğul olurlar, qapı-bacalarında özləri üçün toyuq-cücə saxlayırlar. İstixanalar fəaliyyət göstərir. Gördüklərimiz bizi ruhlandırdı. Cənab Prezident sağ olsun ki, bu işlərin görülməsinə birbaşa rəhbərlik edir, təlimatlarını verir. Təsəvvür etməzdim ki, müharibədən sonra qısa müddətdə bu qədər nəhəng işlər görülə bilər. Biz də öz təkliflərimizi verdik, istəyirik ki, orada görülən işlərə müəyyən köməkliyimiz dəysin, yardımçı olaq. Amma onsuz da görüləsi elə çox iş qalmayıb. Çox böyük masştablı işlər görülüb və görülməkdə davam edir. Zəngilan və Cəbrayıl belə sürətli quruculuq işləri ilə çox qısa müddətdə ən qabaqcıl rayonlar, şəhərlər sırasında olacaq.

- Məsələn, Zəngilan rayonunda su hövzələri, vətəgələr var. Cəbrayıl rayonunda böyük bir göl var. Həmin göldə 500-600 ton farel balığı yetişdirmək olar. Prezidentin səlahiyyətli nümayəndəsi hörmətli Vahid Hacıyevə, Prezident Administrasiyasının şöbə müdiri hörmətli Ədalət Vəliyevə dedim ki, bu işdə bir mütəxəssis kimi onlara kömək edə bilərəm. Partiya sədrlərinin, deputatların da əksəriyyəti təklifimi bəyəndilər, razılaşdılar. Millət vəkili, BAP sədri Elşad Musayev efirdə çıxışı zamanı təklifimin təqdirəlayiq olduğunu dedi. İldə 5-10 milyon, 20 milyon manat balıqçılıq sənayesindən gəlir götürmək mümkündür. Göllərdə, vətəgələrdə nərə (asatrin), ağ balıq (beluqa) yetişdirilə bilər. Qara kürü istehsal edə, balıq satışını gücləndirə bilərik. Hər rayondan 50-60 milyon manat pul götürmək mümkündür. Hətta dedim ki, öz xərcim hesabına bu işləri görə bilərəm. Orada balıq konservi zavodu da yaratmaq olar. Bu sahədə böyük təcrübəm var, sovet vaxtı, müstəqillik dövründə mühüm vəzifələrdə çalışmışam, nazir olmuşam. Sevindirici məqam odur ki, rayon rəhbərliyinin özləri də təsərrüfat işləri ilə məşğul olurlar. Yeni salınmış qəsəbələrdə, kəndlərdə xalqın arasında yaşayırlar. Camaat da görür ki, rayonun səlahiyyətli nümayəndələri kənddə yaşayır, toyuq-cücə saxlayırlar, ağac əkirlər, torpaqlarında meyvə-tərəvəz, pomidor-xiyar yetişdirirlər. İnsanlar da onlara baxıb torpaqdan ikiəlli yapışmağa məcbur olurlar. Bu rayonların böyük gələcəyi var. Bir müxalif partiyanın sədri kimi üzümü cənab Prezidentə tutaraq öz təşəkkürümü bildirirəm.

- Məncə, şikayət edənlər haqsızdır, çünki narazılıqlara əsas yoxdur. Ora köçən hər bir vətəndaşa 12 sot torpaq verilib. 12 sot bilirsiz nə deməkdir? Çox böyük işlər görmək mümkündür. Həmin vətəndaş öz qapısında toyuq-cücə saxlaya, yaxud maldarlıq, heyvandarlıqla, əkin-biçinlə məşğul ola bilər. Hər cür şərait yaradılıb. Kim narazılıq edirsə, deməli, provokatordur. Bütün cəbrayıllılara, zəngilanlılara çağırış edirəm ki, getsinlər, öz torpaqlarında yaşasınlar. Digər yerlərdə əlavə pay torpaqları da ayıracaqlar. Getsinlər, əksinlər, biçsinlər. Zəngilanda neçə min hektar torpaq sahəsi əkilib, müasir suvarma sistemi ilə suvarırlar. Yaxın günlərdə taxılın biçimi gözlənilir. 7 minə yaxın yeni növ cins mal-qara saxlanılır. Ətçilik, heyvandarlıq kompleksləri salınıb. Müharibədən qısa müddət sonra Azərbaycanın öz gücü hesabına gördüyü bu qədər böyük işləri görməzdən gəlmək, qaralamaq olmaz. Düzdür, iş olan yerdə hansısa nöqsanlar olur, bu da təbiidir. Amma kiçik nöqsanı böyütmək, şişirtmək doğru deyil. Hamıya torpaq verilib. Sahibkarlara iş üçün böyük imkanlar yaradılıb, vergidən, gömrük rüsumlarından güzəştlər tətbiq edilib.

- Əgər münasib yerlər varsa, balaca bir ərazini saxlamaq olar. Təbii ki, kiminsə görməsi üçün böyük əraziləri olduğu kimi saxlaya bilmərik. Amma bir neçə dağıdılmış, viran qoyulmuş evi saxlamaq mümkündür. Gələn xarici qonaqlar, turistlər faşist ermənilərin barbar hərəkətlərinin izlərini öz gözləri ilə görsünlər. Gələcəkdə həmin bölgəyə çoxlu turistlər səyahət edəcək. Problemli məsələ deyil. Bu sahədə də müəyyən işlər görülür, deyilənə görə, dövlət proqramına salınıb.

- Səhv edirlər. Qəmbərov İsa öz dədəsinin məzarı üstünə getmirsə, agent şəbəkəsinin başçısı Kərimov Əli bu məsələləri qəbul etmirsə, biz neyləyə bilərik? Onların yasını saxlayası deyilik ki? Bizdə olan məlumata görə, Qəmbərov İsanın, Kərimov Əlinin trol dəstəsi müəyyən yerlərdə Qarabağ və Şərqi Zəngəzurda görülən işlərə qarşı qarayaxma kampaniyası aparırlar. Onların işi-gücü budur. Çalışırlar ki, ölkədə qarışıqlıq, narazılıq yaratsınlar. Bu da mümkün olan şey deyil. Boş şeylərdir. İşğaldan azad edilən bütün rayonların hamısında olmuşuq. Orada görülən işləri öz gözümüzlə görmüşük, yaxından müşahidə etmişik. Hamını dəvət edirəm. Xüsusən Bakıda pis vəziyyətdə yaşayanlar, yataqxanalarda üfunət içində yaşayan məcburi köçkünlərimiz təcili öz doğma yurdlarına qayıtmalıdır.