Rusiya Prezidentinin köməkçisi Vladimir Medinskinin Qarabağla bağlı səsləndirdiyi fikirlər, xüsusilə də bölgəni “bir vaxtlar Ermənistanla Azərbaycan arasında mübahisəli ərazi” kimi təqdim etməsi Azərbaycan cəmiyyətində haqlı olaraq narahatlıq doğurub.
Çünki bu, yalnız tarixi ədalətsizliyin deyil, həm də beynəlxalq hüquqa zidd ifadədir. Qarabağ heç zaman hüquqi baxımdan mübahisəli ərazi olmayıb: nə BMT sənədlərində, nə Rusiya da daxil olmaqla beynəlxalq birlik tərəfindən tanınan xəritələrdə.
Azərbaycanın 44 günlük Vətən müharibəsində beynəlxalq hüquqa əsaslanaraq suverenliyini bərpa etdiyi bu ərazilərlə bağlı belə yanlış təqdimatlar yalnız regionda yaranmış yeni reallıqları şübhə altına almağa xidmət edə bilər. Rusiya Xarici İşlər Nazirliyinin Mariya Zaxarova vasitəsilə bu açıqlamanı yumşaltmağa və kontekstdən çıxarılmaması çağırışı isə birmənalı qarşılanmır. Çünki burada əsas məsələ kontekst deyil, səsləndirilmiş ifadənin özü və onun doğuracağı siyasi və informativ nəticələridir.
Millət vəkili Tural Gəncəliyev "Cebheinfo.az"-a açıqlamasında bildirib ki, Rusiya Prezidentinin rəsmi nümayəndəsi Vladimir Medinskinin Azərbaycanın Qarabağ bölgəsini Rusiya-Ukrayna müharibəsi kontekstində yersiz və məntiqsiz şəkildə müqayisə etməsi qəbuledilməzdir.
Onun sözlərinə görə, Qarabağ Azərbaycanın beynəlxalq hüquqla, bütün beynəlxalq ictimaiyyətin, hətta Ermənistanın özünün belə Azərbaycan ərazisi kimi tanıması faktı fonunda Medinskinin belə açıqlaması başadüşülən deyil və uğursuz müqayisədir:
"Medinski Putinin köməkçisi kimi, yaxud şəxsi mövqedən danışsa belə, Qarabağı mübahisəli ərazi kimi təqdim etmək və ya Rusiya-Ukrayna müharibəsi ilə müqayisə etmək bizim üçün qəbuledilməzdir. Medinskinin tarix ixtisası üzrə təhsil alması nəzərə alınaraq, onun beynəlxalq hüququn ən bəsit prinsiplərini düzgün anlamaması təəccüb doğurur. Azərbaycan Xarici İşlər Nazirliyinin aşağı səviyyəli diplomatı belə bu məsələləri Medinskindən daha yaxşı bilir.
Əgər Medinski bu sadə bilikləri belə düzgün təhlil etmirsə, bu, başadüşülən deyil. Azərbaycan Xarici İşlər Nazirliyi mövzu ilə bağlı gözəl cavab bəyanatı verib, Rusiya Xarici İşlər Nazirliyinin rəsmi nümayəndəsi Mariya Zaxarova isə Qarabağın Azərbaycanın ərazisi olduğunu bir daha təsdiqləyib".
Millət vəkili qeyd edib ki, Rusiya rəsmiləri, xüsusilə Prezidentin köməkçisi kimi məsuliyyətli vəzifədə olan Medinski gələcəkdə beynəlxalq hüququ, tarixi və siyasi aspektləri düzgün anlamalıdır:
"Yersiz müqayisələr və təhlillər Azərbaycan-Rusiya münasibətlərində problemlər yarada bilər. Hazırda Ukrayna müharibəsi fonunda Rusiyanın çətin vəziyyətini nəzərə alaraq, rəsmi Moskva öz qonşuları, o cümlədən Azərbaycan kimi konstruktiv və pragmatik ölkələrlə münasibətlərini pozmamalıdır.
Hazırda Rusiyanın əksər qonşuları ilə münasibətləri gərginlik həddindədir, buna görə Azərbaycan kimi ölkənin qədrini bilmək vacibdir və yersiz müqayisələrə yol verilməməlidir. Əminəm ki, Rusiya bunu nəzərə alacaq.
Azərbaycan Xarici İşlər Nazirliyinin sərt və məntiqli cavabı da bunu bir daha təsdiqlədi. Eyni zamanda, Rusiyanın Xarici İşlər Nazirliyinin rəsmi nümayəndəsinin Qarabağın ölkəmizin ərazisi olduğunu bir daha bəyan etməsi Azərbaycan dövlətinin gücünü və beynəlxalq münasibətlərdə tutduğu mövqeyi göstərir".
