Son günlər bəzi Rusiya mediasında Azərbaycana turist axınının guya kəskin azaldığı, turların kütləvi şəkildə ləğv olunduğu haqda məlumatlar yayılıb. Hətta 30-40 faiz azalma olduğu iddia edilirdi. Amma Rusiya Səyahət Sənayesi İttifaqı bu xəbərləri təkzib edib.

Qurumun rəhbəri İlya Umanski bildirib ki, Azərbaycana turist səfərlərinin kütləvi şəkildə dayandırılması müşahidə olunmur: “Turoperatorlarla əlaqə saxladıq, heç bir kəskin azalma yoxdur. Hər yay müəyyən qədər ləğv olur, bu da normaldır. Azərbaycandakı həmkarlarımız da ruslara münasibətdə heç bir problem olmadığını deyirlər”.

Azərbaycanda fəaliyyət göstərən turizm şirkətləri bildirir ki, may ayında Bakıda bronların sayı ötən ilin eyni dövrü ilə müqayisədə təxminən eyni səviyyədə olub. İyun ayı və iyul üçün bronlarda ciddi dəyişiklik yoxdur. Ləğv edilən sifarişlər də normaldır. Hər il bəziləri planlarını dəyişir. Amma 30-40 faiz azalma yoxdur.

Rus turistlərin Azərbaycana marağı anlaşılandır. Ölkəmiz həm yaxın məsafədədir, həm də qiymətlər münasibdir. Rusiyalı turistlər üçün ən vacib məqamlardan biri də odur ki, Azərbaycanda rus dilində ünsiyyət asandır və özlərini yad hiss etmirlər.

Bakı, Qəbələ, Şəki və Quba bölgələri rusiyalı turistlər üçün ən çox seçilən məkanlardır. Ekspertlər hesab edir ki, gələcəkdə ölkələr arasında vəziyyət daha da gərginləşsə, bunun təsirləri hiss oluna bilər. Ona görə də turizm sektoru yalnız Rusiya bazarına güvənməməli, digər ölkələrdən də turist cəlb etməyə çalışmalıdır.

Turizm sahəsi üzrə ekspert Ceyhun Aşurov “Yeni Müsavat”a bildirib ki, regionda baş verən gərginliklər, 3 ildir davam edən Ukrayna-Rusiya müharibəsi, Pakistan-Hindistan, İsrail-İran münaqişəsi müxtəlif formada Azərbaycana gələn turistlərin sayının azalmasına təsir göstərib: “Xüsusən, İran və İsrail arasında gedən son 12 günlük müharibədə hava məkanının qapalı olması həmin məkan üzərindən gələn ərəb və körfəz ölkələrinə də müəyyən məhdudiyyətlər yarandı. Əlbəttə ki, bu ümumi turistlərin sayına mənfi təsir göstərdi. Çünki normalda yay ayı Azərbaycanda turistlərin ən çox olduğu dövrdür. Amma hava məkanları bağlı olduğu üçün 3 saatlıq uçuşu dolayısı ilə 6-7 saata uçmaq məcburiyyətində olan turistlər daha asan gedə biləcəkləri yerə yönəlirlər.

Son bir neçə gün ərzində Rusiya-Azərbaycan arasında yaşanan gərginliklər nəticəsində bir çox tədbirlər, konsertlər ləğv olundu. Belə olan halda bu əyləncə tədbirlərinin auditoriyası da səfərlərini təxirə salmağa məcbur oldu. Bir məqamı da qeyd edim ki, əvvəlki illərdə ölkəmizə gələn rus turistlərin sayı daha çox olurdu. Bu il hələlik bir aktivlik yoxdur. Ola bilsin ki, rus turistlər gözləmə mövqeyindədir. Lakin hər hansısa gərginlik olanda və bu, mətbuatda işıqlananda səyahət etməli insanlar səfərlərini sonraya saxlayırlar. Bu mənada regionda və qonşuluğumuzda yaranmış gərginliklər əlbəttə ki, turistlərin qərarlarına təsir edir. Nəzərə alsaq ki, statistika həm də vətəndaşlığı olan insanların da qeydiyyatını edir, əlbəttə ki, Rusiyadan bizim çoxlu soydaşlarımız var və onlar qohumlarını ziyarət etməyə gəlirlər. Əslində biz onları da turist kimi qeyd edirik, lakin onlar hotellərdə qalmırlar".

Aşurov bildirib ki, hazırda Azərbaycan turizm sektorunda bir passivlik yaşanır: “Ümid edirik ki, tezliklə bu məsələlər öz həllini tapar. Alternativ bazara yönəlik müxtəlif addımlar atılır. Digər bazarlardan, Orta Asiyadan, Çindən, Şərqi Avropadan gələn turistlərinin saylarının artması üçün iş aparılır. Bakıda indi doluluq səviyyəsi iki dəfə aşağı düşüb. Bu, hotellərin fəaliyyətinə iş adamlarına da təsir göstərir. Çünki uçuşun əlverişli olmaması və müəyyən ölkədən olan turistlərin Azərbaycana gəlməməsi qərarları ümumi saya təsir edir.

Rus turistlərin sayı 2019-cu ildə daha çox idi. Təxminən 1 milyona yaxın rus turist Azərbaycana gəlmişdi. 2020-ci ildə isə pandemiya ilə əlaqədar bu rəqəm 225 minə düşdü. 2024-cü ildə isə bu rəqəm 2 dəfə aşağı düşüb: 731?009 nəfər Rusiyadan ölkəmizə səfər edib. Gələnlərin sayına görə rus turistlər İran və Gürcüstandan sonrakı yerdə 3-cü pillədə qərarlaşır. Rusiyadan Azərbaycana gələnlərin payı 30 faizə yaxındır".

Ekspert bildirib ki, Azərbaycan alternativ bazar kimi Orta Asiyaya nəzər salmalı və Özbəkistan, Qazaxıstan və Çindən turist cəlb etməlidir. Birbaşa uçuşların təmin olunması oradan gələn turistlərin sayına təsir edə bilər.

Millət vəkili Vüqar Bayramov bildirir ki, 2025-ci ilin birinci rübündə Azərbaycanda gecələmələrin ümumi sayının 14, 3 faizi rusların payına düşür.

Azərbaycan son illərdə rus turistlər üçün yaxın, rahat və maraqlı istiqamətlərdən biri olaraq qalıb. Coğrafi yaxınlıq, vizasız giriş və münasib qiymətlər Azərbaycana üstünlük qazandırır. Rəsmi statistikalara görə, 2024-cü ildə Azərbaycana gələn xarici turistlərin böyük hissəsi məhz Rusiyadan olub. Onlar üçün üçün Azərbaycan hələ də ən çox seçilən yaxın istiqamətlərdən biridir. Türkiyə, BƏƏ, Misir və Tailandla yanaşı, Azərbaycan da onların ən çox səfər etdiyi ölkələr siyahısında qalır.