“Kremlin nümayəndəsi Dmitri Peskov əvvəlcə Zəngəzur dəhlizi məsələsini Azərbaycan və Ermənistanın daxili işi adlandırdı, sonra Rusiyanın tərəflərə kömək edə biləcəyini dedi. Rusiya bir növ itirilmiş mövqeyini bərpa etmək istəyir. Rusiya Gürcüstanı çoxdan itirib, Ermənistanı itirir və Azərbaycanı da itirmək üzrədir. Bu səbəbdən də əvvəlki mövqelərini bərpa etmək üçün reveranslar edirlər. Amma bu gedişlər uğursuzdur”.

Bunu “Reytinq” qəzetinə Vəhdət Partiyası sədrinin müşaviri, professor Cümşüd Nuriyev deyib.

C. Nuriyev Azərbaycan və Ermənistanı aldatmağın mümkün ola biləcəyinə inanmır.

“İndi Amerika Ermənistan ərazisində dəhlizə nəzarət etmək təklifini irəli sürüb. Düzdür, Ermənistan bu təklifi qəbul etməyib. Ancaq belə bir təklifin olması Rusiya üçün təhqirdir. Çünki 30 il Ermənistanı Azərbaycana qarşı silahlandıran məhz Rusiya idi. Digər tərəfdən, Ermənistan baş naziri Paşinyan Altaya uçub, regional formada Rusiya ilə əməkdaşlığa hazır olduğunu göstərir. Bu da Rusiya üçün ürəkaçan gediş deyil”,- professor qeyd edib.

C. Nuriyevin fikrincə, Kremlin mətbuat katibi Dmitri Peskovun fikirləri tərəfləri ovundura bilməz, çünki rəsmi və qeyri-rəsmi olaraq Rusiyaya inam yoxdur:

“İnamın itməsinin səbəbkarı Rusiyadır. Rusiya Azərbaycanın sərnişin təyyarəsini vurub və bu məsələ münasibətləri korlayıb. Nəticədə Azərbaycan vətəndaşları həlak olublar. Azərbaycan prezidenti bundan sonra ortaya haqlı və ədalətli mövqe qoyub. Zaman da göstərdi ki, prezident doğru mövqe seçib. Azərbaycan bunu bağışlamaz. Azərbaycan təyyarəyə görə kompensasiya istəyir və s. Bunlar hüquqi baxımdan haqlı tələblərdir”.

Professor sonda xatırladıb ki, iyulun 19-da Şuşada keçirilən III Media Forumu zamanı Azərbaycan prezidenti bir daha təyyarəyənin vurulması məsələsinə qayıdıb.

“Məncə, Rusiya saxtakarlıqdan əl çəkməli, təyyarəni vurduğunu etiraf etməli, kompensasiya verməlidir. Əks halda, münasibətlər daha da gərginləşəcək”,- C. Nuriyev əlavə edib.