Birləşmiş Ştatlar və Çin İsveçdə ticarət danışıqları zamanı tariflərin dondurulmasını 90 gün müddətinə uzatmaq barədə razılığa gəliblər.

Teleqraf xəbər verir ki, bu barədə "South China Morning Post" (SCMP) mənbələrə istinadən məlumat yayıb.

Bazar ertəsi Stokholmda dünyanın ən böyük iqtisadiyyatları arasında danışıqların üçüncü raundu başlayıb. Nəşrin mənbələri bildiriblər ki, tərəflər mübahisəli məsələləri müzakirə edəcəklər, lakin heç bir mühüm razılaşma əldə etməyəcəklər.

“Üç aylıq fasilə zamanı Vaşinqton və Pekin əlavə tariflər tətbiq etməyəcək və münaqişəni başqa yollarla gücləndirməyəcək”, - mənbələrdən biri bildirib.

İyulun 27-də Ağ Ev rəhbəri Donald Tramp bildirib ki, ABŞ tezliklə Çinlə ticarət sazişi bağlaya bilər. Tramp iddia edir ki, ABŞ artıq Çinlə müəyyən razılaşmalar əldə edib, lakin hadisələrin bundan sonra necə inkişaf edəcəyini izləyəcək.

Bir gün əvvəl Tramp Avropa İttifaqı ilə ABŞ arasında ticarət sazişinin bağlanma şansının 50% olduğunu bildirmişdi .