2020-ci il Azərbaycanın Ermənistan üzərində tarixi qələbəsindən 5 il keçməsinə baxmayaraq, Ermənistala Azərbaycan arasında sülh müqaviləsinin bağlanması prosesi həyata keçirilmir. Buna süni maneələr yaradılır. Dəfələrlə müxtəlif ölkələrdə və masalarda danışıqlar aparılsa da, hər zaman regionda gözü, marağı olan üçüncü qüvvələr buna maneə yaradıb. Bu gün isə ənənəvi olaraq Rusiya Ermənistanla sülh müqaviləsinin bağlanmasına maneə yaradır. Ermənistanda olan hərbi bazasına silah daşıyan Rusiyanın Azərbaycanla yenə Ermənistan üzərindən müharibə aparmaq niyyəti var. Hər bir halda Rusiyanın Ermənistandakı bazasına silah daşıması Azərbaycanla Ermənistan arasında sülh müqaviləsinin bağlanması üçün problemdir.

Milli Məclisin deputatı Tahir Rzayevin fikrincə, Gümrüyə hərbi qüvvələrin cəlb edilməsi Qafqazda təhlükəsizliyin təmin olunmasında və sülhün yaradılmasına bir maneədir. Rusiyada bu imkanlardan hərtərəfli istifadə etməyə çalışır. Bu barədə Bizimyol.info xəbər portalına danışan deputat bildirib ki, Rusiya Azərbaycan-Ermənistan münasibətlərində sağlamlaşmanı məqsədəuyğun hesab etmir və sülh müqaviləsinin bağlanmasına daimi mane olub.

“Rusiya istəyir ki, burada münaqişələr olsun və bu münaqişələrdən öz məqsədləri, mənafeyi üçün istifadə etsin. Ancaq belə bir zamanda Rusiyanın Azərbaycana müharibə elan etməsi və yaxud Ermənistanın Azərbaycanla yenidən münaqişəyə girməsi o qədər inandırıcı görünmür. Çünki Ermənistanın özündə də bu günü iqtisadi, siyasi vəziyyət xoşagələn deyil. Belə bir vəziyyətdə Ermənistan dövlətinin Azərbaycanla müharibə aparması onun gələcək faciələrinə yol aça bilər”-deyə Tahir Rzayev qeyd edib.