Ermənistanın xarici işlər naziri Ararat Mirzoyan bildirib ki, sülh müqaviləsini imzalamaq üçün görüləcək işlər var.

Mövzu ilə bağlı fikirlərini Redaktor.az-a danışan poltioloq Qafar Çaxmaqlı bildirdi ki, Ermənistan Baş naziri Nikol Paşinyan Azərbaycanla sülh müqaviləsinin bəndləri razılaşdırılandan sonra sevinərək dedi ki, Ermənistan müqavilənin imzalanması anında ATƏT-in Minsk qrupundan imtina etməyə hazırdır:

"Əgər bu müqavilə Ermənistan Konstitusiyasında bəlli müddəalarla (Azərbaycana qarşı ərazi iddiaları ilə) ziddiyyət təşkil edərsə, Ermənistan uyğun şəkildə düzəlişə getməyi öhdəsinə alacaq. İndi Ermənistanın XİN rəhbəri Ararat Mirzoyanın İctimai TV-yə verdiyi müsahibə Baş nazir Paşinyanın mövqeyindən kəskin şəkildə fərqlənən fikirlər səsləndirir. Mirzoyanın öz ölkəsinin rəhbərinin dediklərindən xəbəri yoxdur? Əlbəttə, var. Amma Paşinyan bu fikri özü deyil, XİN rəhbərinə dedirdir. Çünki daxili auditoriyaya hesablanmış siyasətdə dividendlər qazanmaq istəyir. Bu, Azərbaycanın tələbi qarşısında Ermənistanın üzərinə düşəni yerinə yetirməkdən imtina etmək cəhdidir. Ermənistan Konstitusiya dəyişikliyinə 2027-ci ildə gedəcəyini nəzərə alsaq, müqavilənin də həmin tədbirdən sonra olacağını söyləmək olar. Amma gedişmələr, xüsusən Vaşinqton razılaşması bu müqavilənin daha tez imzalanacağını göstərirdi. Ona görə də razılaşdırılmış 17 maddə paraflandı. İndi Ermənistan buna getmək istəmirsə, suç bizdə deyil. Dəfələrlə demişik ki, Azərbaycan bu sənədin imzalanması üçün tələsmir".

Müsahibimiz əlavə etdi ki, Ermənistan Vaşinqtonda əldə edilmiş razılaşmaları pozmaq istəyirsə, məsuliyyət də onun boynunda qalacaq:

"Ermənistanda Zəngəzur koridorunun açılması və Azərbaycanın əsas hissəsindən Naxçıvana maneəsiz keçidin verilməsi məsələsində də manipulyasiya edilir. Ermənistanda bu məsələ məhz hakimiyyətin tapşırığı ilə hər gün müzakirə olunur və Ermənistanın ərazi bütövlüyü və qanunları ilə tənzimlənəcəyi fikri təlqin olunur. Bu məsələdə də Paşinyan siyasi manevr edir, guya bu koridor da Azərbaycanın istəyi ilə deyil, Ermənistanın təqdim etdiyi "sülh kəsişməsi" layihəsi ilə həyata keçirilməsi nəzərdə tutulub. Mirzoyanın dediyi "görüləcək işlər var" ifadəsi də manipulyasiya üçün yer qoymaq cəhdidir. Görüləcək iş Zəngəzur koridorunun keçəcəyi ərazini təmizləyib burada tikinti işlərinin getməsinə şərait yaratmaqdır. Maneəsiz keçidimizi təmin etməkdir".