Cənubi Qafqazda uzun illərdir davam edən geosiyasi mübarizələrin və diplomatik gərginliklərin mərkəzində duran ATƏT-in Minsk qrupu nəhayət ki, tarixə qovuşur. Azərbaycanın illərdir apardığı siyasi və diplomatik səylər, xüsusilə də Minsk qrupunun fəaliyyətinin iflasa uğradığını və artıq region üçün əhəmiyyət kəsb etmədiyini göstərməsi nəticə verdi. ATƏT Nazirlər Şurasının rəsmi qərar qəbul edib. Belə ki, qurum ATƏT-in Minsk qrupu və ona bağlı bütün strukturların bağlanması barədə qərar qəbul edib.
Azərbaycan Xarici İşlər Nazirliyinin yaydığı məlumata əsasən, bununla da "Ermənistan-Azərbaycan münaqişəsi ilə bağlı ATƏT-in bütün qərarları etibarsız elan edilib". Bu addım, faktiki olaraq, beynəlxalq səviyyədə Azərbaycanın mövqeyinin tanınması və bölgədə yeni siyasi reallığın qəbul olunması deməkdir.
Politoloq Zaur Məmmədov ATƏT-in Minsk qrupunun ləğvini Sherg.az-a şərh edib:
"Nəhayət ki, Azərbaycanın istəyi reallaşdı. Rəsmi Bakı artıq 5 ildir ki, ATƏT-in Minsk qrupunun ləğv edilməsini tələb edirdi. Ermənistan isə bu qurumu indiyədək gələcəkdə istifadə etmək üçün əlində saxlanılan bir resurs kimi görürdü. Lakin sonda Ermənistanın baş naziri Nikol Paşinyan da bu mövzuda geri addım atmağa vadar edildi. O, ATƏT-in Minsk qrupunun həmsədr ölkələrindən biri olan ABŞ prezidentinin yanında rəsmi şəkildə öhdəlik götürdü ki, bu məsələnin gündəlikdən çıxarılması və bağlanması ilə bağlı Azərbaycanın tələbi ilə razıdır".
Politoloq həmsədr ölkələrin uzun müddət regionda status-kvonun qorunmasında və məsələnin dondurulmuş vəziyyətdə saxlanmasında maraqlı olduqlarını söyləyib:
"Azərbaycan və Ermənistanın bu qərarı nəticəsində həmsədr ölkələr istəsələr də, istəməsələr də bu prosesə qarşı çıxa bilmədilər".
