Milli Məclisin Xarici müdaxilələrə və hibrid təhdidlərə qarşı komissiyası Prezident İlham Əliyevin Səudiyyə Ərəbistanının “Əl-Ərəbiyyə” telekanalına müsahibəsindən sonra Rusiyadan Azərbaycana qarşı kütləvi informasiya kampaniyası ilə bağlı bəyanat yayıb.

Məlum bəyanatın qısa özətində bunlar qeyd olunub:

“Avqustun 27-də Azərbaycan Respublikasının Prezidenti İlham Əliyevin Səudiyyə Ərəbistanının “Əl-Ərəbiyyə” telekanalına müsahibəsi yayılandan dərhal sonra Rusiya Federasiyası ərazisindən ölkəmizə qarşı kütləvi surətdə informasiya kampaniyasına start verilib.

Monitorinq zamanı müəyyən olunub ki, aparıcının Zəngəzur dəhlizi ilə bağlı sualına Azərbaycan Prezidentinin tarixi faktlara əsaslanan cavabı kontekstdən çıxarılaraq saxtalaşdırılmış və ya təhrif olunmuş formada rus oxucusuna təqdim edilir.

Rusiya cəmiyyətində anti-Azərbaycan təbliğatını alovlandırmaq məqsədilə təşkil edilən kampaniya televiziya kanalları və xəbər saytları, sosial media platformaları və müəyyən təsiretmə roluna malik radikal mövqeli şəxslər vasitəsilə aparılır”.

Bildirək ki, rus mediasının ölkəmizə qarşı bu yanaşması birmənalı qarşılanmır. Çünki bu tip addımlar Azərbaycan və Rusiya arasındakı münasibətlərin pozulmasına hesablanıb. Görünür, rus mediasının da arxasında bunu istəyən hansısa qüvvələr dayanır.

Bəs bu qüvvələr kimlərdir və onların məqsədləri nələrdir?

Mövzu ilə bağlı “Cebheinfo.az”-a açıqlama verən politoloq Qulamhüseyn Əlibəyli bildirib ki, bu qüvvələrin məqsədi Azərbaycan və Rusiya arasındakı münasibətləri pisləşdirməkdir:

“Hətta dövlətlərarası münasibətlərə xələl gəlməsini istəyirlər. Düzdür, onlar arasında ermənipərəst şəxslərin olması mümkündür. Hesab edirəm ki, bu, daha çox Rusiya hakimiyyətinin icazəsindən irəli gələn məsələdir. Hətta bu göstərişlərin birbaşa Kremldən gəldiyini düşünürəm.

Nəzərə almaq lazımdır ki, Rusiya artıq Cənubi Qafqazdan çıxır. Hazırda Mosvkavanın Gürcüstan və Ermənistanla münasibəti gərgindir. İndi də Azərbaycanla gərginlik yaratmaq istəyirlər. Düşünürlər ki, guya bu yolla adıçəkilən dövlətlərə təsir edərək Cənubi Qafqazda qalacaqlar”.

Ekspert qeyd edib ki, Rusiya Cənubi Qafqazdan çıxmamaq üçün hər cür vasitəyə əl atır:

“Onlardan da biri media vasitəsidir. Guya media və siyasi ekspertlər vasitəsilə ölkəmizə təsir edə biləcəklərini zənn edirlər. Lakin başa düşmürlər ki, Azərbaycan öz yolunu tutmuş, Cənubi Qafqazın lider dövlətidir.

Bu cür xırda məsələlərlə ölkəmizə təsir etmək mümkün deyil. Kreml hələ də Sovet taktikalarından istifadə etməyə çalışır. Bu, o deməkdir ki, Rusiyanın siyasəti tükənir”.