Xəbər verildiyi kimi, 23–25 sentyabr tarixlərində Rusiyanın Federal Təhlükəsizlik Xidmətinə(FTX-“FSB”) məxsus “Rəsul Həmzətov” sərhəd-gözətçi gəmisi Bakıya səfər edəcək. Bu barədə Rusiya Xarici İşlər Nazirliyinin rəsmi nümayəndəsi Mariya Zaxarova brifinq zamanı məlumat verib.Onun sözlərinə görə, səfər proqramı çərçivəsində Rusiya və Azərbaycan sərhəd xidmətləri arasında bir sıra görüşlər keçiriləcək. Əsas müzakirə mövzusu Xəzər dənizinin akvatoriyasında ikitərəfli əməkdaşlıq məsələləri olacaq. Gəminin səfəri Bakı ilə Moskva arasında təhlükəsizlik və sərhəd əməkdaşlığının dərinləşdirilməsi istiqamətində atılan addım kimi qiymətləndirilir.

Bəs görəsən, Rusiya ilə münasibətlərin hazırkı gərgin görünən durumunda “FSB” gəmisinin Bakıya yan alması nədən xəbər verir?..

Mövzu ilə bağlı Moderator.az-a açıqlamasında siyasi təhlükəsizlik məsələləri üzrə ekspert Ərəstun Oruclu bunları söyləyib:

“ “FSB” gəmisinin indiki vaxtda Bakı sahillərinə gəlməsini izah etmək bir qədər çətindir. Çünki bu barədə müxtəlif versiyalar səslənir. Rusiya tərəfinin rəsmi məlumatında deyilir ki, guya bu, hansısa təhlükəsizlik əməliyyatlarıyla bağlıdır. Amma bunlar çox inandırıcı görünmür. Belə düşünürəm ki, “FSB” gəmisinin Bakıya yan alması Azərbaycanla Rusiya arasında bununla bağlı hansısa razılaşmadan asılı olmayaraq Kremlin güc nümayiş etdirmək istəyidir. Azərbaycan tərəfinin buna razılıq verməsinin səbəblərini isə izah etmək çətindir. Lakin təkrar edirəm, bununla Rusiya güc nümayişi etdirməyə çalışır. Çünki son vaxtlar əsas geo-siyasi mübarizə və çəkişmələr Xəzər ətrafında cərəyan edir. Və Moskva bununla onu göstərmək istəyir ki, Xəzərdə dominantlıq onun əlindədir...

Bildiyiniz kimi, son yarım il ərzində Xəzərdə Rusiya tərəfindən iki dəfə hərbi təlimlər keçirilib. Və həmin təlimlərdə də çox maraqlı taktiki vəzifələr irəli qoyulubdur. Səhv etmirəmsə, bir dəfə Rusiyanın özü tərəfindən keçirilib, bir dəfə də İranla birlikdə... Bunlar hamısı, o cümlədən “FSB” gəmisinin Azərbaycan paytaxtına tərəf gəlməsi də Xəzər ətrafında cərəyan edən hadisələrlə bağlıdır...”