"Azərbaycanda valideyn komitələri sinif rəhbərlərinə xoş gəlmək üçün bir neçə valideyinin hegomonluğu üzərində qurulur".

Bunu Redaktor.az-a açıqlamasında Sosial Tədqiqatlar Mərkəzinin (STM) sektor müdiri, elm və təhsil məsələləri üzrə tədqiqatçı Elmin Nuri son günlər müzakirə olunan məktəblərdəki valideyn komitələrinin fəaliyyətindən və onların lazım olub-olmamasından danışarkən bildirdi.

Onun sözlərinə görə, bu komitələrin dırnaqarası fəaliyyəti müəllimlər üçün xüsusi günlərdə işə düşür:

"Onlara tədrisin keyfiyyəti, təlim-tərbiyə metodikası, dərsliklərlə bağlı problemlər maraqlı deyil. Yalnızca müəyyən tarixlərdə pul yığmaqla məşğuldurlar. Bir neçə valideyin hegomonluğu ələ keçirir və müəllimlə yaxınlıq quraraq həmin sinifdə təhsil alan övladının aparıcı qüvvəyə çevrilməsinə çalışır. "Sinif anası" adlandırılan bu xanımlar digər valideyn və şagirdlərə psixoloji təsir göstərirlər. Hər hansısa valideyn haqlı şəkidə müəllimə irad bildirən zaman müəllim qalır kənarda, "sinif anası" valideynə qarşı çıxır. Adətən bu cür vəzifəni üstlənən qadınlar dildən iti olurlar və digər valideynlərə diqtə etmək bacarığına sahib olurlar. Üzərinə gedilən valideyn növbəti dəfələrdə artıq müəllimə öz iradın bildirməkdən çəkinir. Bu gün bizə belə fəaliyyət göstərən valideyn komitələri lazım deyil".

Elmin Nurinin fikrincə, valideyn komitələri ləğv olunmamalı, lakin strukturu tam dəyişməlidir:

"Valideynlərin məktəblərdə faydalı yönümlü fəaliyyətini daha da inkişaf etdirmək üçün bir sıra meyarlar tətbiq edilə bilər. Könüllü valideyn birlikləri yaradıla bilər. Hər məktəbdə sosial aktivliyi ilə seçilən valideynlərdən ibarət (say ən azı 20-25 nəfər) könüllü dəstək birliklərinin yaradılması tədris və sosial məsələlərin həlli baxımından çox faydalı ola bilər. Bu birlik məktəblərdə tədbirlərin təşkili, sosial durumu aşağı olan şagirdlərə humanitar dəstəyin təşkili, şagirdlərlə iş zamanı müəllimlərə yardımçı fəaliyyətin təşkili və s. işləri həyata keçirə biləcəkdir".

STM rəsmisinin fikrincə, “evdə müəllim” metodu da həyata keçirilə bilər.

"Bu metod şagirdlərdə həm tədris keyfiyyətinin inkişafı, həm də davranış mexanizmlərinə nəzarət baxımından çox faydalıdır. Üstəlik, bu metod vasitəsilə valideyn də özünü təhsilə daha yaxın bir sima kimi hiss edəcək, özünü tədris prosesinin bir fərdi sayacaqdır. “Evdə müəllim” metodunda əsas vəzifə həm də müəllimin (sinif rəhbərinin) üzərinə düşür. O bir qrup valideynlə həftənin müəyyən günündə tədris prosesi, keçirilən mövzularla bağlı təlim keçməli və onlara şagirdlə evdə necə işləməyin qaydalarını bildirməlidir. Çünki ev tapşırığının həlli zamanı valideynlərin yaşadığı çətinliklər şagirdlərin də sonrakı probleminə çevrilir. Onlar “evdə müəllim” metodu ilə məktəbdəki müəllimin işini daha da gücləndirmək, keçirilən predmeti övladlarının zehinlərində daha yaxşı möhkəmlənməsinə nail ola bilərlər", - deyə Elmin Nuri bildirdi.