25 avqust 2020-ci ildə AMEA-nın rəsmi saytında qurumun ovaxtkı rəhbəri Ramiz Mehdiyev bir qrup tanınmış şəxsi təhdid etmişdi.

Ramiz Mehdiyev onu təndiq edən Fəzail Ağamalı, Məlahət İbrahimqızı, Səməd Seyidov, Adil Əliyev, Musa Qasımlı, Qənirə Paşayeva, Ülvi Quliyev, Hicran Hüseynova, Cavid Osmanov, Şahin İsmayılov, Malik Həsənov, Sevinc Hüseynova, Siyavuş Novruzov, Eldar Namazov, Elxan Şahinoğlu, Elçin Mirzəbəyli, Hacıbala Abutalıbov, Abid Şərifov, Maksim Musayev, Tural Abbaslı, Arzuxan Əlizadə, Elşad Musayev kimi bir çox şəxsi xüsusi ittiham qaydasında məhkəməyə verməklə hədələmişdi.

Bəs həmin dönəm bu proses necə yekunlaşmışdı?

Sözügedən siyahıda adı olan Azərbaycan Milli İstiqlal Partiyasının (AMİP) sədri, Milli Məclisin deputatı Arzuxan Əlizadə “Cebheinfo.az”-a açıqlamasında Ramiz Mehdiyevin fəaliyyətini hər zaman tənqid etdiyini bildirib:

“Ramiz Mehdiyev 2020-ci ilin 25 avqust tarixində bir neçə partiya sədrinin, o cümlədən mənim də adımı çəkərək məhkəməyə müraciət edəcəyini açıqladı. O zaman dedik ki, əgər Mehdiyev özünə qarşı hansısa ədalətsiz mövqe sərgiləndiyini hesab edirsə, məhkəməyə müraciət edə bilər. Lakin məhkəməyə müraciət olunmadı.

Ramiz Mehdiyevin dedikləri elə söz olaraq da qaldı. Bugünlərdə də yeni siyahılar yayılır. Əslində, hüquq-mühafizə orqanları bu siyahını tərtib edən və onun yayılmasını təşkil edənin kimliyini müəyyənləşdirməlidir. Çünki bunlar faktiki olaraq Ramiz Mehdiyevə dəstək olmaq məqsədilə yayılan siyahılardır”.

Millət vəkilinin sözlərinə görə, son günlər mediada yayılan siyahılar ya Ramiz Mehdiyevin özü, ya da yaxın çevrəsi tərəfindən yönləndirilir:

“Məqsəd də diqqəti onun üzərindən çəkmək və guya haqsızlığa məruz qalmış şəxs imici formalaşdırmaqdır. Bu yolla ona yönələn ittihamları ləngitməyə çalışırlar. Hesab edirəm ki, bütün bunlar araşdırılmalıdır.

Maraqlıdır ki, Ramiz Mehdiyevə çox yaxın olan şəxslərin adları yayımlanan siyahılarda yoxdur. Hətta onun ən yaxın adamı olaraq işlərini görən Əli Həsənovun maliyyələşdirdiyi adamların da adı yayımlanan siyahılarda qeyd olunmayıb.

Vaxtilə onun dəstəyi ilə parlamentə düşənlər də olub. Onun himayəsi altında maliyyələşənlərin olması da sirr deyil. Ramiz Mehdiyev barəsində ciddi faktlar olmasaydı, belə ittihamlar irəli sürülməzdi. Düşünürəm ki, bu cinayətlər bir şəxs tərəfindən törədilməyib, onun ətrafı var. Bütün bunlar isə araşdırılacaq”.

Arzuxan Əlizadə sosial şəbəkələrdə yayımlanan bəzi siyahılarda onun da Ramiz Mehdiyevin adamı kimi qələmə verilməsinə də təpki göstərib:

“Mən heç vaxt Ramiz Mehdiyevlə üz-üzə gəlməmişəm və onunla təmasım olmayıb. O, zamanında Azərbaycan Milli İstiqlal Partiyasına (AMİP) münasibəti də bəlli idi. Partiyamızın 24 il ərzində parlamentdə təmsil olunmamasının səbəbkarlarından birincisi də Ramiz Mehdiyev olub.

O, bütün müstəvilərdə qarşımızı kəsib. Hətta mənim barəmdə yalandan quruma cinayət işi açılması tapşığı da Ramiz Mehdiyev tərəfindən gəlmişdi. Bu da təkzibedilməz məsələdir”.