Ermənistan müxalifəti “Biz yaşayırıq” təşəbbüsü tərəfindən irəli sürülmüş impiçment prosedurunu dəstəkləyərsə, Milli Təhlükəsizlik Xidmətinin keçmiş direktoru və Vətən Partiyasının lideri Artur Vanetsyan baş nazirliyə namizəd ola bilər.
Bu barədə “Hraparak” qəzeti yazıb. Nəşr qeyd edir ki, Ermənistanın üçüncü prezidenti SerjSarkisyanın komandası Vanetsyanı məqbul namizəd kimi görür. Bundan fərqli olaraq, ikinci prezident RobertKöçəryan prosesin özünə şübhə ilə yanaşmaqda davam edir. RobertKöçəryan daşnak deputat İşxanSaqatelyan vasitəsilə Vanetsyana bəzi mesajlar göndərib:
“Sabiq prezident bildirib ki, nəticəsi əvvəldən müəyyən edilən ümidsiz bir prosesə qoşulmağa ehtiyac yoxdur. Eyni zamanda, Köçəryan bəyan edib ki, Vanetsyan öz namizədliyi ətrafında 8 deputatın imzasını toplaya bilsə, fraksiyasının 28 deputatının dəstəyini alacaq.
Bundan başqa, o bildirib ki, Vanetsyan kifayət qədər yüksək reytinqə malikdir və növbəti seçkilərə hazırlaşması daha düzgün olar. Xüsusilə də o, impiçment proseduruna başlasa, komandasının Vanetsyanı tənqid etməyəcəyinə zəmanət verə bilməz.
Həmçinin, Artur Vanetsyanın Moskvaya getdiyi də məlum olub. Yaxınları iddia edirlər ki, o, namizədliyi ilə bağlı Moskvada yaşayan qardaşı ilə məsləhətləşməyə gedib və mayın 31-də qayıdacaq. Siyasi dairələr onun səfər zamanı bəzi Rusiya rəsmiləri ilə də görüşəcəyini istisna etmirlər”,-deyə məlumatda bildirilir.
Qeyd edək ki, parlamentdə R.Köçəryana bağlı “Ermənistan” və SerjSarkisyanıntərəfdarlarından ibarət “Şərəfim var” fraksiyaları baş nazirliyə öz namizədlərini irəli sürməsələr, Vanetyana belə bir imkan yarana bilər. Son vaxtlar Ermənistanda müxalifət tərəfindən Baş nazir Nikol Paşinyanın impiçmenti ilə bağlı iki təşəbbüs irəli sürülüb.
Aprel ayında müxalifət fəalları NarekMalyan və EdqarKazaryan parlament üzvlərinə müraciət edərək impiçment elan ediblər. “Şərəfim var” müxalifət bloku impiçmenti dəstəkləməyə hazır olduğunu bildirsə də, “Ermənistan” fraksiyası bu təşəbbüsün müəlliflərinin səmimiliyinə şübhə edərək küçə təzyiqlərinə çağırıb.
Daha sonra “Mülki müqavilə” fraksiyasından ayrılmış deputatlar AkopAslanyan və OvikAğazaryan baş nazir postuna keçmiş səfir EdmonMarukyanın namizədliyini irəli sürərək parlament fraksiyaları ilə danışıqlara başlayıblar. Lakin parlament müxalifəti Marukyanı Paşinyan hökumətinin “astar üzü” adlandıraraqdəstəkləməkdən imtina edib. Bu baxımdan, Artur Vanetsyan bütün siyasi qüvvələrin qəbul edəcəyi vahid namizəd kimi təklif edilə bilər.
Vanetsyan 2019-cu ilin noyabr Nikol Paşinyan hökumətindən istefa verərək müxalifətə keçdikdən sonra onun adı yeni siyasi lider kimi hallanmağa başlayıb. Lakin seçkilərdə Vanetsyan ciddi siyasi nəticə əldə edə bilməyib. O, 2021-ci ildə “Şərəfim var” blokundan deputat seçilsə də, bir müddət sonra SerjSarkisyanın siyasi kölgəsində qalmağın onun siyasi reputasiyasına problem yaratdığını anlayıb mandatdan imtina etdi. Ermənistanda aparılan son rəy sorğuları Artur Vanetsyanın siyasi reytinqinin hələ də xeyli aşağı olduğunu göstərir.
“GallupInternationalAssociation” mərkəzinin mayın 6-da elan etdiyi rəy sorğusu zamanı Ermənistan vətəndaşlarına “Əgər növbəti bazar günü seçkilər keçirilərsə kimə səs verərdiniz?” sualı ünvanlanıb. Ancaq 1100 nəfər respondentin heç biri nə Artur Vanetsyanın, nə də onun liderlik etdiyi Vətən Partiyasının adını çəkib.
Ona görə də parlament müxalifətinin baş nazirliyə Vanetsyanın namizədliyini irəli sürəcəyi inandırıcı görünmür. Vanetsyan baş nazirliyə namizəd olmaq üçün 29 yerlə əsas müxalif çoxluğa malik “Ermənistan” fraksiyasının dəstəyini qazanmalıdır.
“Şərəfim var” fraksiyası isə 4 mandata malikdir. Ermənistan qanunvericiliyinə görə, impiçment prosedurunun parlamentin müzakirəsinə təqdim edilməsi üçün 36 deputatın imzası lazımdır. Artur Vanetsyanı hazırda 4 deputat dəstəkləyir. Ötən il arxiyepiskop BaqratQalstanyanın başlatdığı etiraz aksiyaları zamanı müxalifət 36 imza toplaya bilmədiyinə görə impiçment təşəbbüsünü irəli sürmək mümkün olmadı.
Bu, həm də Ermənistan müxalifəti arasında fikir ayrılığı ilə bağlıdır. Son vaxtlar siyasi fəallıq nümayiş etdirən RobertKöçəryan 2026-cı ildə keçiriləcək seçkilərdə Rusiyanın dəstəyi ilə yenidən hakimiyyətə qayıtmağa iddialı görünür.
Bu səbəbdən, “Ermənistan” blokunun Vanetsyanın baş nazirliyinə namizədliyini dəstəkləyəcəyi ehtimalı çox azdır. Qeyd edilən situasiya hazırda siyasi reytinqi xeyli aşağı düşmüş Nikol Paşinyanın maraqlarına cavab verir. Müxalif düşərgədə artan ziddiyyətlər və Köçəryanın baş nazir olmaq istəyi seçiciləri indiki hökumətə səs verməyə məcbur edə bilər.
Müşfiq Abdulla
"Cebheinfo.az"
