İş və istirahət günlərinin yerləri dəyişdirilib. Bu barədə Baş nazir Əli Əsədov qərar imzalayıb. Qərarla iş və istirahət günlərinin ardıcıllığını təmin etmək məqsədilə 27 iyun iş günü ilə 21 iyun istirahət gününün yerləri dəyişdirilib. Bununla da ardıcıl dörd gün - iyunun 26-sı, 27-si, 28- və 29-u qeyri-iş günləri olacaq. Qeyd edək ki, Qurban bayramı ilə əlaqədar da 4 gün ardıcıl - 6,7,8 və 9 iyun tarixləri qeyri-iş günü hesab olunur.

İş günlərinin yerinin dəyişdirilməsi iqtisadiyyat və yaxud vətəndaşlar üçün zərərlidirmi?

İqtisadçı Əkrəm Həsənov Bizimyol.info xəbər portalına açıqamasında bildirib ki, bu mövzuya dəfələrlə toxunub: “Qanunvericilik buna yol verir. Günlərin yerini dəyişmək Nazirlər Kabinetinin səlahiyyətidir. Faktiki iyunun 21-ni iş günü etdilər. Digər günləri dəyişdilər ki, insanlar 4 gün ardıcıl istirahət etsinlər. Bunun özündə iqtisadiyyat üçün problem yoxdur. Bəlkə doğrudan da bu yanaşma sərfəlidir ki, həm insanlar ardıcıl yaxşı istirahət etsin, həm də iş həftəsi birdən-birə bölünməsin. Yəni tam da bir gün işdə, sonra bir gün evdəsən, sonra yenə iş. Bu da iş ahəngini pozur”.

Əkrəm Həsənovun fikrincə, burada başqa bir problem də var.

“Hər ilin sonunda Nazirlər Kabineti növbəti il üçün bunu edir. Bayram günlərini müəyyənləşdirir. Normalda 2025-ci il üçün 2024-cü ilin dekbar ayında bu müəyyən edilməlidir. Çünki insanlar bunu öncədən bunu bilib, öz zamanını planlaşdırır. Məsələn; kimsə əvvəlcədən bilsəydi ki, 4 gün istirahət olacaq, bəlkə harasa gedəcəkdi, öncədən bilet alacaqdı.

Daha çox problem elə iş üçündür. Kimsə işlərini planlaşdırmış ola bilər, kimsə biznesini, görüşlərini planlaşdırmış ola bilər. Və birdən-birə Nazirlər Kabineti bir neçə gün qalmış deyir ki, “Yox, həmin günü iş günü deyil”. Bu, nə dərəcədə doğrudur? Yəni bu da əslində ondan xəbər verir ki, Azərbaycanda normal işgüzar şərait yoxdur”-deyə Əkrəm Həsənov vurğulayıb.

Əkrəm Həsənov qeyd edib ki, dünyanın inkişaf etmiş ölkələri Birləşmiş Ştatlarda, Avropada, Yaponiyada belə bir vəziyyət mümkün deyil və insanlar hökumətə irad bildirir, etiraz edirlər.

“Deyirlər ki, “biz iş adamlarıyıq, biz işimizi öncədən planlaşdırmışıq”. İş adamları işini bir neçə ay öncədən planlaşdırır, bizdə bu yoxdur. Bu da ondan xəbər verir ki, hətta dövlət orqanlarının özündə də bu yoxdur. Bunlar normal işləmirlər, normal işləyənlər öz işini əvvəlcədən planlaşdırır. Mən hər həftə vəkil kimi bir neçə dəfə məhkəmələrdəyəm. Məhkəmələr aylar əvvəl məhkəmənin iclasını təyin edir. Mən əminəm ki, həmin günlərə də kimsə gün təyin edib. İndi nə etmək lazımdır? İndi gərək təzədən bunu dəyişsinlər. Niyə? Bu baxımdan iş günləri ilə bağlı son anda verilən qərar iqtisadiyyatımız üçün zərərlidir”-deyə Əkrəm Həsənov vurğulayıb.