İran Prezidenti Məsud Pezeşkianın Ermənistana səfəri gözlənilir. Məlum olduğu kimi ötən gün İran Prezidenti Məsud Pezeşkian və Ermənistan Baş naziri Nikol Paşinyan arasında telefon söhbəti olub. Telefon danışığında regionda və beynəlxalq aləmdə baş verən hadisələrə, xüsusilə də 12 günlük müharibə, eləcə də digər məsələlər müzakirə olunub.
Pezeşkian deyib ki, İran öz prinsipial siyasətinə əsaslanaraq sülh və təhlükəsizliyin möhkəmlənməsinə səbəb olan istənilən hərəkəti həmişə dəstəkləyib. O əlavə edib ki, Tehranın siyasəti bütün ölkələrin ərazi bütövlüyünün qorunması fonunda bütün qonşu ölkələrlə konstruktiv qarşılıqlı fəaliyyətdir: "Biz iki ölkə arasında qarşılıqlı əlaqələrin gücləndirilməsini, birgə əməkdaşlığı və əlaqələrin gələcəyini planlaşdırmağı vurğulayırıq". Ermənistanın Baş naziri Nikol Paşinyan da ölkəsinin İranla əlaqələrin genişləndirilməsində maraqlı olduğunu vurğulayıb: "Biz səbirsizliklə Ermənistana səfərinizi gözləyir və iki ölkə arasında əməkdaşlığın və qarşılıqlı əlaqələrin gücləndirilməsini müzakirə edə bilərik".
Politoloq İlqar Vəlizadə bildirib ki, Ermənistan və İran münasibətləri hər iki tərəf üçün ənənəvi xarakter daşıyır. Siyasi şərhçi vurğulayıb ki, bölgədə geosiyasi vəziyyət əvvəlkindən fərqlidir:
"İran Prezidenti Məsud Pezeşkianın Ermənistana gözlənilən səfərində yeni reallıqlar da mütləq göz önündə olacaq. Çünki İran və Azərbaycan arasında indiki münasibətlərin səviyyəsi İrəvan-Tehran əlaqələrində də önəmli faktor kimi çıxış edir. Pezeşkian qısa müddət ərzində iki dəfə Azərbaycana gəlib. İran prezidenti indiki məqamda Azərbaycanla münasibətləri gərginləşdirmək fikrində deyil. Ona görə də İrəvanda olarkən hansısa ziddiyyətli fikirlər söyləməkdən yayınacaq. Düzdür, İranın Ermənistandakı səfiri zaman-zaman ziddiyyətli bəyanatlar səsləndirir. Ancaq ehtimal ki, mövcud dumuru nəzərə alan Pezeşkian buna getməyəcək. Hətta reallığı Paşinyana da izah etməyə səy göstərəcək. Hazırda regional yeniliklər İran prezidentini də bölgədə sülh və sabitlikdə maraqlı olmağa, prosesi dəstəkləməyə məcbur edir".
Analitik qeyd edib ki, İran regionda öz fəallığını Ermənistan üzərindən həyata keçirməyə çalışır:
"Tehran hökumətinin can atdığı məsələ budur. Ermənistana kənar təsirlər güclüdür. Xarici təsirlərin Tehrana qarşı yönəlməməsi üçün İrəvanla dialoq İran üçün vacibdir. ABŞ və Avropa ölkələrinin İranda mövcudluğunun artması İranı narahat edən məqamdır. Tərəflər bu məsələdə ortaq məxrəcə gəlməyə çalışacaqlar".
