Türkiyənin xarici işlər naziri Hakan Fidan TGRT-yə müsahibəsində Bakı-Ankara münasibətlərinin mövcud vəziyyətini və Vaşinqton görüşünü şərh edib. Fidan Türkiyənin Azərbaycan və ABŞ arasındakı danışıqlardan xəbərdar olduğunu bildirib.

XİN başçısı deyib: “Amerikalıların Azərbaycanla danışmağa başladığı ilk andan prosesdən xəbərimiz vardı. Azərbaycanlı qardaşlarımız hər mərhələdə bizimlə istişarə edir, məlumatlandırırdılar”. Fidan həmçinin Azərbaycan Prezidenti İlham Əliyevin Türkiyə lideri Rəcəb Tayyib Ərdoğanla da müzakirə apardığını söyləyib.

Ankara Bakı-Vaşinqton danışıqlarında nə kimi rol oynayıb? Yaxın zamanda üçtərəfli münasibətlərin qurulması mümkündürmü?

Globalinfo.az-a danışan politoloq Qabil Hüseynli bildirib ki, bu müsahibə iki ölkə arasındakı strateji əməkdaşlığın dərinliyini bir daha ortaya qoyur:

“Fidanın çıxışı Azərbaycanın ABŞ-la əlaqələrində Türkiyənin əsas rolunu aydın göstərir. Azərbaycanın tarixi olaraq ABŞ-la birbaşa isti münasibət saxlamaması, Türkiyənin rolunun Bakının Vaşinqtonla təmaslarını yönləndirmədə nə qədər vacib olduğunu ortaya qoyur. Çünki Ankara uzun illərdir Vaşinqtonun strateji tərəfdaşıdır, NATO çərçivəsində önəmli tərəfdaşlıq qurub və İncirlik bölgəsində yerələşən hərbi baza bu əməkdaşlığın mühüm göstəricisidir. Mövcud vəziyyət Azərbaycan–ABŞ münasibətlərinin də əksər hallarda Türkiyə kanalı vasitəsilə irəliləməsinə imkan yaradır”.

Politoloq əlavə edib ki, Hakan Fidanın müsahibəsində səslənən sözlər, bəzi dairələrdə yaranan “Türkiyə ilə Azərbaycan arasında gərginlik var” iddialarının əsassız olduğunu açıq şəkildə göstərir:

“Onun, “Amerikalıların Azərbaycanla danışmağa başladığı ilk andan bizim xəbərimiz vardı. Azərbaycanlı qardaşlarımız hər mərhələdə bizimlə istişarə edərək, bizi məlumatlandırdılar”, – ifadələri, Ankara və Bakının bütün regional məsələlərdə koordinasiyalı hərəkət etdiyini təsdiqləyir. Bu, tərəflər arasında hər hansı ciddi narazılığın olmadığı, münasibətlərin strateji və etimad əsaslı davam etdiyi reallığını ortaya qoyur”.