Təxminən bir ay əvvəl İcbari Tibbi Sığorta üzrə Dövlət Agentliyi bu ilin ilk 6 ayı ərzində icbari tibbi sığorta çərçivəsində TƏBİB-in tabeliyindəki tibb müəssisələrində vətəndaşlara göstərilən xidmətlərlə bağlı statistikanı açıqladı. Rəsmi məlumatda bildirilirdi ki, bu müddətdə icbari tibbi sığorta çərçivəsində 3.6 milyondan çox şəxs 12.3 milyon dəfə tibb müəssisələrinə müraciət edib. Bu isə yarım il ərzində əhalinin 38 faizinin icbari tibbi sığortadan yararlanması deməkdir.
Bizimyol.info xəbər verir ki, vətəndaşlar icbari tibbi sığortanın keçərli olduğu TƏBİB-in tabeliyindəki xəstəxanalarda xidmətin keyfiyyətindən narazılıq edirlər. Bu barədə hər gün sosial şəbəkələrdə onlarla şikayətlərə rast gəlmək olur. İnsanlar poliklinikalarda, dövlət xəstəxanalarında süründürməçilikdən, növbənin çoxluğundan, tibbi heyətin vətəndaşlara qarşı kobud və biganə münasibətindən və s. problemlərdən şikayətlənirlər.
Paytaxtın Yasamal rayonunda yerləşən 3 saylı şəhər poliklinikasına müraciət edən Aytən Məmmədova deyir ki, ayağında sınıq şübhəsi olsa da, poliklinikada iki gündür onun müayinəsinə nail ola bilmir.
Bu barədə Bizimyol.info xəbər portalına danışan Aytən Məmmədova bildirib ki, avqustun 28-də günorta saat 14.00 radələrində sağ ayağında sınıq şübhəsi ilə poliklinikaya müraciət edərək, rentgen müayinəsindən keçmək istədiyini bildirib: “Poliklinikanın qəbul şöbəsində dedilər ki, rentgendə işləyən bir nəfərdir, o da saat 1-də gedir. Ertəsi gün saat 1-ə qədər gəlməyimi tövsiyə etdilər. Deyildiyi kimi etdim, avqustun 29-da saat 11 radələrində yenidən poliklinikaya getdim. Qəbul şöbəsinə yaxınlaşıb, göndəriş istədim. Bu dəfə dedilər ki, rentgenə cərrahın göndərişi olmalıdır. Cərrah Gülbəniz həkim isə tapşırıb ki, onun qəbuluna heç kimi yazmayaq, çünki işi var, tez çıxıb getməlidir. Ona görə rentgen məsələsi bu gün də alınmayacaq”.
Vətəndaşın sözlərinə görə, o, Gülbəniz adlı cərrahın kabinetinə gedərək, işdə olduğu halda, qəbulu dayandırmasının səbəbini öyrənməyə çalışıb. Ona izah edib ki, ayağında kəskin ağrı və şişkinlik var, əziyyət çəkir: “Narazılıq edəndən sonra Gülbəniz adlı o həkim gəldi qəbul şöbəsinə, dedi ki, qəbuluma xəstə yaz, amma vaxtım olmasa, çıxıb gedəcəm. Mən də şəxsiyyət vəsiqəmi götürüb, çıxdım. Düşündüm ki, insanlara, onların ağrısına qarşı bu cür münasibət göstərən birinin tibbi yardımı mənə lazım deyil”.
Aytən Məmmədova xatırladır ki, poliklinikalar, dövlət xəstəxanalardakı tibbi xidmətlərdən daha çox aztəminatlı vətəndaşlar istifadə edir, onlar icbari tibbi sığortanın imkanlarından yararlanmaq istəyir. Çünki maddi imkanı yüksək olan şəxslər daha yaxşı şəraiti və avadanlıqları olan özəl xəstəxanalara üz tutur:
“İnsanların maaşından icbari tibbi sığorta üçün pul tutulur. Bundan yararlanmaq istəyi də təbiidir. Amma çox vaxt elə münasibət göstərirlər ki, sanki kiminsə qapısına borca gəlmisən. Poliklinikada, dövlət xəstəxanasında işləyən həkimin maaşı onu qane etmirsə, bu, vətəndaşın problemi deyil. Aqressiyasını da vətəndaşa göstərməməlidir”.
