“Sosial şəbəkələrdəki şikayətlər sektorda problemlərin mövcudluğunu üzə çıxarır və müəssisələr üçün bir “güzgü” rolunu oynayır”.

Bunu Yenicag.az-a açıqlamasında “Azərbaycan Hotellər və Restoranlar Assosiasiyası”nın İdarə Heyətinin sədri, eyni zamanda “Azərbaycan Ekoturizm Assosiasiyası”nın icraçı direktoru Samir Dübəndi deyib.

O, sosial şəbəkələrdə restoranların qiymət bahalığı, lakin xidmət keyfiyyətsizliyi ilə bağlı artan şikayətlərlə bağlı fikirlərini səsləndirib.

S. Dübəndi bildirib ki, sosial şəbəkələrdə restoranlarla bağlı ara-sıra şikayətlər səslənir:

“Ən çox qeyd edilən hallar “ikili menyu” tətbiqi – yerli və xarici müştərilərə fərqli qiymətlərin göstərilməsi, gigiyena normalarının pozulması və personalın qeyri-səliqəli görünüşüdür. Bu kimi problemlər istehlakçı etibarına xələl gətirsə də ümumən sektorun inkişafını inkar etmək olmaz”.

Onun sözlərinə görə, rəsmi statistika göstərir ki, ölkədə 25 mindən artıq iaşə obyekti fəaliyyət göstərir, onların cəmi 15-i dövlət, qalanı isə özəl sektora aiddir:

“Ümumi dövriyyə 2 milyard manatdan çox olub, adambaşına düşən iaşə xərci isə ölkə üzrə orta hesabla 201 manat, Bakıda isə 570 manat təşkil edib. Bu, paytaxtın bazarda aparıcı rolunu təsdiqləyir. Son illərdə Azərbaycanda artıq hörmətli milli şəbəkələr formalaşıb. Bununla yanaşı, “McDonald’s”, KFC, Papa “John’s”, “Qoçət”, MADO kimi beynəlxalq brendlərin gəlişi bazarın peşəkarlaşmasına, xidmət keyfiyyətinin artmasına və müştəri məmnuniyyətinin yüksəlməsinə təkan verib”.

“Beləliklə, sosial şəbəkələrdəki şikayətlər sektorda problemlərin mövcudluğunu üzə çıxarır və müəssisələr üçün bir “güzgü” rolunu oynayır. Lakin statistika və bazarın bugünkü vəziyyəti göstərir ki, restoran sənayesi Azərbaycanda sürətlə böyüyür və rəqabət gücləndikcə, xidmət keyfiyyəti də artır”, – deyə o, fikirlərini yekunlaşdırıb.