“Umid Babek Operating Company” əməliyyat şirkətində (UBOC) daha bir rəhbər vəzifəsi üzrə təyinat olub.

Banker.az şirkətə istinadən xəbər verir ki, Denis Eliseev Əməliyyatlar funksiyasına rəhbərlik edəcək.

Denis Eliseev Neft-qaz sənayesində 25 ildən artıq beynəlxalq təcrübəyə malikdir. Xəzər regionu və Meksika körfəzində mürəkkəb layihələrə rəhbərlik edərək əməliyyatlarda iştirak edib, “LUKOIL” və “Fieldwood Energy” kimi böyük enerji şirkətlərində yüksək rəhbər vəzifələrdə çalışıb, strateji və əməliyyat idarəçiliyi istiqamətində MBA dərəcəsinə sahibdir.

“Eliseev layihələrin icrası, təşkilati liderlik və əməliyyat idarəçiliyindəki çətinliklərin effektiv həlli üzrə peşəkarlığı ilə tanınır” – deyə, şirkət bildirir.

Qeyd edək ki, “Xəzər dənizinin Azərbaycan sektorunda “Ümid” yatağının və “Babək” perspektiv strukturunun daxil olduğu dəniz blokunun kəşfiyyatı və işlənməsi haqqında” Azərbaycan Dövlət Neft Şirkəti ilə “SOCAR Umid Oil and Gaz Ltd.” şirkəti arasında Risk Xidmət Sazişi və “Xəzər dənizinin Azərbaycan sektorunda “Ümid” yatağı və “Babək” perspektiv strukturunun daxil olduğu blokun kəşfiyyatı və işlənməsi üzrə neft-qaz əməliyyatlarının aparılması haqqında “SOCAR Umid Oil and Gas Ltd.” şirkəti və “Umid, Babek Exploration & Production” şirkəti arasında müqavilə 2017-ci il yanvarın 12-də imzalanıb, mayın 2-də isə Milli Məclisdə təsdiq edilib.

Qeyd edək ki, “Ümid-Babək” bloku Bakıdan 75 km aralıda yerləşir, burada dənizin dərinliyi 60-700 metrdir. SOCAR tərəfindən işlənilən “Ümid” yatağının ehtiyatları minimum 200 milyard kubmetr qaz və 40 milyon ton kondensat həcmində qiymətləndirilir. “Babək” strukturunun ehtiyatları 400 milyard kubmetr qaz və 80 milyon ton kondensat həcmində qiymətləndirilir. “Ümid” yatağı 2012-ci ilin sentyabrında istismara verilib.