"2014-cü ildən II qrup əlil idim. İki il öncə həkim komissiyası sənədimi qəsdən gecikdirdi və əlilliyim ləğv olundu. Komissiyaya məqsədli şəkildə məni həkimsiz buraxdı. İki dəfə "Forma 88” göndərişimə imtina verilib. Səbəb kimi "Forma 88″-in natamam olduğu bildirilir. Bakı həkimləri deyir ki, sənin əlilliyin kəsilməməlidir, Mingəçevir isə imtina verildiyini deyir. Yüzlərlə tibbi sənədim ağır xəstə olduğumu təsdiq edir. Adamı bezdirib intihar həddinə çatdırırlar”.
43 yaşlı Mingəçevir sakini Xəqani Rövşən oğlu Gülməmmədov belə deyir.
"Məni intihar həddinə çatdırıblar”
O həm ağır xəstəliyindən, həm də ona yaşadılan süründürməçilikdən intihar həddinə çatdığını bildirib.
Xəqani Gülməmmədov deyir ki, 2014-cü ildən çoxsaylı müayinə və müalicə nəticəsində "Hepatit C”, kəskin qaraciyər çatışmazlığı xəstəliyindən əziyyət çəkdiyi təqsdiqlənib.
Dediyinə görə, 2011-ci ildə şərlənərək atıldığı həbsxanada bu diaqnozu qan analizi nəticəsində aşkarlanıb.
Həkimi ona xəbərdarlıq edib ki, azad olan kimi özünü müalicə etdirsin. Azadlığa çıxdıqdan sonra isə çoxsaylı müayinə və müalicə etdirsə də, xəstəlik daha da ağırlaşıb. Nəticədə də vətəndaşa II qrup əlillik dərəcəsi təyin edilib.
Dediyinə görə, bir il sonra həkim səhvi nəticəsində daşıyıcısı olduğu "Hepatit C” virusu "Hepatit B”-yə çevrilib. Bundan sonra onun əlillik dərəcəsi də III qrupla əvəzlənib, lakin 2017-ci ildə təkrar müayinə nəticəsində həkim yanlışlığı düzəldilərək II qrup əllilik dərəcəsi bərpa olunub.
5 müddətinə çıxdığı əllilik dərəcəsi 2022-ci ilin 27 mart tarixində ləğv edilib.
Səbəb isə həmin vaxta vətəndaşın təyin olunan tibbi komissiyanın məqsədli şəkildə gecikdirilməsi olub.
"Əlillik kəsiləndən dərman da verilmir”
Mingəçevir sakini deyir ki, əlillik pensiyasının kəsilməsi ilə qeydiyyatda olduğu xəstəxanın ildə bir dəfə pulsuz dərman təminatından da məhrum olub: "2014-cü ildə 6 ay müddətində həm stasionar, həm də ambulator vəziyyətdə müayinə və müalicə almışam. 8 il davamlı komissiyaların nəzarətində olmuşam. Saxtakarlıq edə bilərdim? Həkimlər özləri dərəcəni təyin edib. Yüzdən çox dəlil, sübut kimi tibbi sənədim, ciddi xəstəliyim var. Sonuncu komissiya 2022-ci ildə oldu. Onda da məni buraxmırdılar, üstəlik, həkim də ayırmadılar. Öz həkimim Əhməd Seyidov təqaüdə çıxmışdı. Süni əngəllərə rəğmən komissiyaya daxil oldum, ancaq xəstəxanadan deyildi ki, "Forma-88″ natamamdır. Tək mənə yox, çox əlilə bu bəhanə tətbiq olunur. Təkrar ötən il də imtina verildi”.
"Bakıda olduğum müxtəlif xəstəxana həkimləri deyir ki, sənə əlillik düşür, Mingəçevir Şəhər Poliklinikası isə kömək etmir, bir-birinin üstünə atırlar. Soyuq və laqeyd münasibət var. 1 saylı Kliniki Xəstəxanada qeydiyyatda olan xəstəyəm. Əlillik kəsiləndən sonra dərman da verilmir. Düzdür, oranın dərmanı saçımı tökdü, sağalmadım, amma dərmanı yenə də qəbul etməliyəm ki, xəstəlik şiddətlənməsin. Prezidentə qədər məktub yollamışam cavab yoxdur”, – deyə o qeyd edib.
"Nazirlik xəstəxananın üzərinə atır, xəstəxana isə yaxın durmur”
Xəqani Gülməmmədov hazırda ağır xəstə olduğu üçün ailəsini də dolandıra bilmədiyini deyir. Onun himayəsində olan övladı və həyat yoldaşı da işsizdir. Bundan başqa, himayəsində yaşlı xəstə anası da var.
Hazırda "DOST” MMC-də sosial işçi olaraq çalışdığını qeyd edir. Eyni zamanda, ağır dərəcəli bel yırtığından əziyyət çəkir, təcili əməliyyata ehtiyacı olduğunu deyir. Tək ümidi əlillik pensiyasının bərpa olunmasıdır ki, əməliyyat və xəstəliyini onunla müalicə etdirmək niyyətindədir.
Vətəndaş təkrar tibbi komissiya təşkil olunmasını, hətta stasionar müalicəyə də razı olduğunu deyir.
Onun sözlərinə görə, Mingəçevir Mərkəzi Xəstəxanasının direktoru Ülfət Qurbanovun və həkimlərin qəbulunda olub.
Ona "Hepatit C” xəstəliyinin icbari tibbi sığorta paketinə daxil olmadığı deyilib və müalicəsindən imtina edilib.
Bildiriblər ki, gündəlik 94 manat ödəyərək öz vəsaiti hesabına müalicə almalıdır: "Ancaq baş həkim bilməlidir ki, 2022-ci ilin 20 aprelindən etibarən bu xəstəliyin ambulator müalicəsi üçün təyin olunan dərman preparatlarının təminatı İcbari Tibbi Sığorta Agentlyinin "Xidmətlər zərfi”nə daxil olmasa da, bu zərflə "Hepatit-B” və "Hepatit-C” viruslarının müayinə və stasionar şəraitdə müalicəsi qarşılanır. Çıxılmaz vəziyyətdəyəm. Nazirlik xəstəxananın üzərinə yazır, xəstəxana isə yaxın durmur. İki ildir ki, qaraciyərimdə durum ağırlaşıb, bir dərman belə ala bilmirəm. Dövlətdən pulsuz aldığım dərmanların indi qiyməti 2500-3000 manatdır. Tək sosial işçi maaşı ilə necə alım o dərmanları? Oğlum hərbi xidmətdən qayıdıb, iş tapa bilmir. Anam yaşlı xəstə qadındır. Mingəçevir Mərkəzi Xəstəxanada oldum, nə stasionar müalicəyə yaxın dururlar, nə göndəriş verirlər. Güclə 2 il öncə 1 saylı Kliniki Xəstəxanaya göndəriş aldım, orada da yer olmadığı üçün geri qaytardılar. Dedilər ki, Mingəçevir səni qəsdən süründürür, orda yatmalı, müalicə almalısan. Burada isə günlük xərc hesablanıb iri məbləğ oxunur”.
Əlillik dərəcəsi niyə ləğv olunub: ziddiyyətlə açıqlamalar…
Tibbi Sosial Ekspertiza və Reabilitasiya Agentliyindən bildirilib ki, son iki ildə vətəndaşın xəstəliyinə dair yerli tibb müəssisəsi tərəfindən "Forma-88” sistemə yerləşdirilmədiyindən əlilliyin təkrar müayinəsi baş tutmayıb.
Qurum qeyd edir ki, burada günah TSEK-də deyil, buna görə Mingəçevir Şəhər Mərkəzi Xəstəxanası və TƏBİB məsuliyyət daşıyır: "Mingəçevir şəhər sakini 03.07.1981-ci il il təvəllüdlü Gülməmmədov Xəqani Rövşən oğlunun əlilliyinin qiymətləndirilməsi ilə bağlı son 2 il ərzində tibb müəssisəsi tərəfindən heç bir "Forma-88” göndərişi rəsmiləşdirilməyib. Belə olan halda isə əlilliyin qiymətləndirilməsi mümkün olmur. Bunun üçün vətəndaş qeydiyyat üzrə tibb müəssisəsinə yaxınlaşmalıdır. Tibb müəssisəsi tərəfindən şəxslə bağlı yeni "Forma-88″ rəsmiləşdirildikdən sonra onun əlilliyi qanunvericiliyə uyğun olaraq qiymətləndiriləcək”.
TƏBİB-dən isə bildiriblər ki, məsələ araşdırılacaq.
"Biz nə əlillik təyin edir, nə də ləğv edirik”
Mingəçevir Şəhər Mərkəzi Xəstəxanasının direktoru Ülfət Qurbanov isə deyir ki, vətəndaş ötən iki ildə yalnız bir dəfə, 2022-ci ildə xəstəxanaya müraciət edib: "2022-ci ildə komissiyadan keçirdik. Həkim-məsləhət komissiyasının sədri də özüm olmuşam. Anası ilə gəlib bizi təhqir etdi. Qardaşı da şəhiddir. Elə bildi ki, qardaşı şəhiddir deyə əlilik veriləcək. Biz nə əlillik təyin edir, nə də ləğv edirik. Biz, sadəcə, "Forma-88″ yazan orqanıq. Sənədləri qaydasında deyildi deyə sistemə oturtduq və imtina gəldi. O da həmin gün dava edib əlavə müayinəyə getmədi. 2022-ci ildən sonra isə Mingəçevir Mərkəzi Xəstəxanasına müraciəti olmayıb. 12 aprel 2024-cü ildə isə Kliniki Tibbi Mərkəzə müraciət edib. Sistemdə bizə müraciət görünmür. Növbəti ilin yanvar ayının 6-da gəlsin, kömək edək. Müalicə və müayinə üçün şəraitimiz var. Sadəcə, TƏBİB daxil hamı vətəndaşı müdafiə edir. Mən vətəndaşı yaxşı tanıyıram və onunla birlikdə Naxçıvanda hərbi xidmətdə olmuşuq”.
Direktor vətəndaşın ötən iki ildə yalnız bir dəfə müraciət etdiyini desə də, xəstəxanaya müraciət sistemi əksini deyir. Sistemdə Xəqani Gülməmmədovun nə az, nə çox 20 dəfə müraciət ediyi görünür, hansı ki 2022-ci ildə bu rəqəm 18 olub.
Ülfət Qurbanov "”Forma-88″ yarımçıq doldurulub” desə də, agentlik 2 ildə vətəndaşın xəstəliyinə dair göndərişin ümumiyyətlə sistemə yerləşdirilmədiyini deyir.
"Şəhidliyi batırdılar, heç olmasa əlillik haqqım bərpa olunsun”
Xəqani Gülməmmədov direktorun fikirlərini doğru saymır.
Deyir ki, o, nə şəhid qardaşı adından istifadə edib, nə də direktorla birgə hərbi xidmət edib: "Mən Naxçıvanda deyil, Cəlilabadda hərbi xidmətdə olmuşam və həkimi tanımıram, komissiyada heç bir konfilikt yaşanmayıb və şəhid adı statusundan istifadə də olmayıb. Sadəcə mənə həkim təyin edib yoxlamadılar. Həkimsiz komissiyaya daxil olmuşam. Qardaşım Ramil Gülməmmədov isə 1998-ci ildə minaya düşərək şəhid olub, ancaq qanını batırdılar. Füzulinin Əbdürrəhmanlı kəndində odun yığarkən minaya düşüb. Anamla hər yerə çoxsaylı müraciət etsək də, məzarının istintaq üçün açılmasını tələb etsək də, baxmadılar, şəhidlik statusunu ala bilmədik. Ancaq 11 min manat şəhid pulunu ödədilər və hər yerdə şəhid kimi tanıyırlar, çünki anama, qardaşıma qarşı haqsızlıq oldu. Bunu özləri də yaxşı bilir. Ölüm kağızına da yalandan vərəm xəstəliyindən vəfat etdiyi yazılıb. Onu tanıyan əsgər yoldaşları belə minaya düşdüyünü təsdiq edir. Sadəcə ört-basdır edildi”.
"Xəstəxana isə məni heç yaxına buraxmır, dərdimi dinləmir, təkrar tibbi komissiyaya buraxmırlar. O ki qaldı, mən onları təhqir edim, şəhid qardaş adından istifadə edim. Bu yalan və özünümüdafiədir. Qardaşımın şəhidlik statusunu batırdılar, heç olmasa əlillik haqqım bərpa olunsun”, – deyir Xaqani Gülməmmədov.
