Sakinlər evdə ola ola binalarında söküntü işləri həyata keçirilib.
Den.az xəbər verir ki, belə iddia ilə Sumqayıt sakinləri çıxış edib.
Sumqayıt şəhərinin 4-cü məhəlləsində Mahal MMC Şirkəti tərəfindən aparılan söküntü işləri ciddi narazılıq doğurub.
Sakinlər iddia edirlər ki, evdə olduqları halda onların mənzilləri qanunsuz şəkildə sökülüb və tikinti şirkəti hələ də onlara lazımi kompensasiyanı ödəməkdən imtina edir. Hazırda tərəflər arasında gərginlik yaranıb. Mübahisənin kökündə isə kompensasiya məbləğinin azlığı dayanır. Sakinlərin sözlərinə görə, təklif olunan məbləğ onların yeni mənzil əldə etməsi üçün yetərli deyil.
Mahal MMC Tikinti şirkətinin sədr müavini Ruslan Məmmədov Denaztv-yə bildirib ki, hazırda söküntü aparılan binada cəmi 3 ya 4 nəfər ailə qalıb. Təklif olunan pul bazar qiymətlərinə uyğundur, lakin sakinlər bu məbləğlə razılaşmırlar. Məsələ ilə bağlı tərəflər arasında məhkəmə çəkişməsi davam edir. Sakinlər haqlarının tapdalandığını, razılıq əldə edilmədən mənzillərinin sökülməsinin qanunsuz olduğunu vurğulayırlar. Onlar iddia edirlər ki, nə təklif olunan kompensasiya məbləği, nə də alternativ mənzil təklifi onları qane edir. Bəzi sakinlər isə bildirir ki, evlərində yaşayarkən texnika ilə söküntü aparılıb və onların təhlükəsizliyi nəzərə alınmayıb.
Hazırda tərəflər arasında məhkəmə prosesi davam edir. Bu isə sakinlər üçün ədalətli həll yolunun tapılıb-tapılmayacağını müəyyən edəcək.