“Sərhəddə məndən müsadirə olunmuş zəliləri saxlanılması üçün Ekologiya və Təbii Sərvətlər Nazirliyinin Kiçik Qızılağac Balıqartırma Təsərrüfatına təhvil veriblər. Təsərrüfatın müdiri də zəliləri satıb. Məhkəmələr qərar çıxarıb ki, Balıqartırma Təsərrüfatı mənə 120 min manatı ödəsin, ancaq məhkəmə qərarı icra olunmur”.
Bu sözləri Sitat.info saytının redaksiyasına üz tutaraq şikayətini ictimailəşdirməyə çalışan Masallının Boradigah kənd sakini Azad Abdullayev deyib.
O bildirib ki, dədə-babadan tibbi müalicəvi zəli yetişdirməsiylə məşğul olublar. Uzun illərdir ki, zəli yetişdirib həm ölkə daxilində, həm də əsasən İranda satırlar. 2017-ci ildə növbəti dəfə Astaradan və Biləsuvardan bir gün fərqi ilə İrana zəli keçirmək istəyərkən saxlanılıb. Səbəb zəliləri təhvil verəcəyi İrandakı müəssisə ilə aralarında müqavilənin olmaması imiş. Zəlilər müsadirə olunub, özü isə bir neçə nəfərlə birlikdə (aralarında gömrük işçiləri də olub) cinayət məsuliyyətinə cəlb edilib. Astara gömrüyündə müsadirə olunan 68 min ədəd zəli Neftçaladakı Kərimov adına Balıqartırma Zavoduna, Biləsuvar gömrüyündə müsadirə olunmuş 112 min ədəd zəli isə Ekologiya və Təbii Sərvətlər Nazirliyinin Kiçik Qızılağac Balıqartırma Zavoduna saxlanması üçün təhvil verilib. Azad Abdullayev 7 ay istintaq müddətini həbsdə keçirib və bu zaman hər iki zavodun rəhbərliyi onlara saxlanılması üçün verilmiş zəliləri satıb. Lənkəran Ağır Cinayətlər Məhkəməsi ona 2 il müddətinə şərti cəza kəsib, hökmdə müsadirə olunmuş zəlilərin özünə qaytarılması da əksini tapıb. Azad Abdullayev azadlığa çıxanda dəymiş zərərin ödənilməsi üçün hər iki zavodun rəhbərliyini məhkəməyə verib. Məhkəmə Neftçaladakı Kərimov adına Balıqartırma Zavodunun 68 min manat, ETSN Kiçik Qızılağac Balıqartırma Zavodununsa 112 min manat zərərin ödənilməsi ilə bağlı qərar çıxarıb. Kərimov adına zavodun rəhbərliyi zərəri ödəsə də, zəlinin sahibi digər zavodla bu mövzuda hələ də çəkişir.
Məsələ ilə bağlı Ekologiya və Təbii Sərvətlər Nazirliyinin sözçüsü İradə İbrahimova ilə əlaqə saxladıq. Nazirliyin mövqeyini dərc edəcək və mövzunu davam etdirəcəyik.
Daha ətraflı təqdim etdiyimiz videodan izləyə bilərsiniz.
