Naxçıvan Qarnizonu Mərkəzi Hospitalında iş vaxtı həkim tapmaq müşkülə çevrilib. Bu səbəbdən hospitalda hər gün uzun növbələr yaranır. Çox vaxt isə, xəsətələr həkim qəbuluna düşmək üçün bir neçə gün hospitala yol döyməli olurlar. Bu haqda “Gündəlik Naxçıvan”a bir qrup hərbçi və mülki şəxs məlumat verib.

Yerli sakin M. Məmmədov deyir ki, hərbi liseydə təhsil alacaq övladı üçün sağlamlıq sənədi almaq həkim tapılmadığından mümkün olmayıb:

“ Hərbi litseyə gedəcək övladımı yoxlamadan keçirib, sənədinə imza atmaq üçün həkimləri yerində tapa bilmirəm. Səhər tibb bacıları həkimlərin iclasda olduqlarını və nahardan sonra olacaqlarını, nahardan sonra isə əməliyyatda olduqlarını deyirlər. Demək olar ki, həkim komissiyasında olanların hər biri belədir. Qəbuluna düşmək üçün saatlar deyil, günlərlə vaxt sərf etməli olursan.”

N saylı hərbi hissənin adının çəkilməsini istəməyən çavuşu da çox vaxt gününü xəstəxanada həkim gözləməklə keçirdiyini deyir:

“Sağlamlığından şikayətlənən əsgəri yoxlamaya aparırsan və həkim yerində olmadığı üçün saatlarla gözləməli olursan.Bəzən gününü orada gözləməklə keçirirsən. Eləcə də xəstəlikdən əziyyət çəkdiyi üçün hospitalda müalicə alan əsgəri sağaldıqdan sonra hərbi hissəyə aparmaq üçün də həkimin yerində olmadığını deyib gözlədirlər. Gah həkimin əməliyyatda, gah da iclasda olduğunu bildirirlər. Həkimlərin işi kabinetlərində oturub gələn hərbçiləri müayinədən keçirməkdir. Onlar isə işdə olub-olmasalar da maaşlarını alır, bir çox hallarda özləri üçün başqa yerlərdə xəstə müalicə edib əlavə pul qazanırlar”