Ədliyyə Nazirliyi “Evrodizayn” QSC (VÖEN - 2900061521) ilə satınalma müqaviləsi imzalayıb.
Yeniavaz.com açıqlanan rəsmi məlumatlara istinadən bildirir ki, nazirlik müqaviləni tender müsabiqəsi keçirmədən, bir mənbədən satınalma metodu əsasında bağlayıb.
Ədliyyə Nazirliyi cəzaların icrasına elektron nəzarət “Attenti” elektron monitorinq proqram məhsullarının, informasiya-kommunikasiya avadanlığının və şəbəkə infrastrukturunun 2025-ci ildə saxlanılması və inkişafı, ona texniki dəstəyin göstərilməsi xidmətləri üçün “Evrodizayn” QSC-yə 3 milyon 759 min 999 manat 91 qəpik ödəyəcək.
Məlumat üçün qeyd edək ki, “Evrodizayn” QSC 17 may 2004-cü il tarixində dövlət qeydiyyatına alınıb. Nizamnamə kapitalı 2 000 manat olan QSC-nin hüquqi ünvanı “Nəsimi rayonu, Abbasqulu Bakıxanov ev. 6”da yerləşir. “Evrodizayn” QSC -nin qanuni təmsilçisi Tağıyev Teymur Ramis oğludur.
Onu da qeyd edək ki, uzun illər mətbuatda “Evrodizayn” QSC-nin mərhum gənclər və idman naziri Azad Rəhimova məxsus olması ilə bağlı çoxsaylı məlumatlar yayılıb və bu günə kimi təkzib olunmayıb. Bildirilir ki, “Evrodizayn” QSC “İtaldizayn” şirkətlər qrupuna daxildir və Azad Rəhimovun rəsmi tərcümeyi halında da göstərilir ki, mərhum nazir 1998-2006-cı illərdə bu şirkətlər qrupunun rəhbəri olub.