Yeni inşa edilən binalarda mənzillər sakinlərin istifadəsinə verildikdən sonra onların idarə edilməsi və gündəlik fəaliyyəti ilə bağlı hüquqi qaydalar mövcuddur. Müvafiq qanunvericiliyə görə, binalarda xidmət haqqının təyini, texniki baxış və təmir işlərinin təşkili, habelə digər idarəetmə məsələləri sakinlərin yaratdığı Mənzil Mülkiyyətçilərinin Müştərək Cəmiyyətinin qərarı ilə həll olunmalıdır.

Bu gün Bakıda və Azərbaycanın müxtəlif bölgələrində yerləşən binalarda bu praktikanın tətbiqi demək olar ki, mümkünsüz hala salınıb. Bir çox hallarda mənzil tikinti kooperativləri (MTK) binalar sakinlərin istifadəsinə verildikdən sonra mühüm qərarları öz istədikləri kimi qəbul edir, sakinlərin təsir imkanlarını isə minimuma endirirlər. Bu isə həm hüquqi pozuntulara, həm də sakinlərin narazılığına səbəb olur. Əslində, mənzillərə mülkiyyət hüququ qeydə alındıqdan sonra sakinlərin tam idarəetmə hüququ yaranır.

Bu hüquq çərçivəsində onlar özləri tərəfindən idarə olunan və qərar qəbul edən qurum yaratmalıdırlar ki, bu da binaların gündəlik idarəçiliyini daha şəffaf və səmərəli təşkili üçün olduqca vacibdir. Sakinlərin iştirak etdiyi idarəetmə strukturu həm texniki, həm maliyyə, həm də hüquqi məsələlərdə qərar qəbul etməyə imkan verir, eyni zamanda MTK-ların sui-istifadəsinin qarşısını alır.

“Akkord” Şirkətlər Qrupunun Bakıxanov qəsəbəsində inşa etdiyi “Uğur-2” yaşayış kompleksi illərdir sakinlərin ixtiyarına verilsə də, Mənzil Mülkiyyətçilərinin Müştərək Cəmiyyətinin yaradılmasına imkan verilmir.

Sakinlər Musavat.com əməkdaşına deyiblər ki, Mənzil Mülkiyyətçilərinin Müştərək Cəmiyyətinin yaradılması üçün atdıqları addımlar hər vasitə ilə əngəllənir.

Buna baxmayaraq, Cəmiyyətin yaradılması onlar üçün aktualdır. Bunu hazırda kompleksdə kommunal xidmətləri əlində cəmləşdirən şirkət rəhbərliyi də bilir. Sakinlərin böyük hissəsi şirkətin kommunal xidmətlərə görə müqavilə bağladığı “Pure Life Company” MMC-nin fəaliyyətindən narazıdırlar. Buna görə də əksəriyyət keyfiyyətsiz görülən iş və xidmətlərə görə ödəniş etmir, yığılmış borcu isə qanunsuz hesab edirlər. Sənədlərdə yarım milyon manatı aşan debitor borc göstərilir.

MMC ilə şirkətin arasında bağlanmış xidmət müqaviləsi ilin sonunda bitir.

Sakinlər qeyd edir ki, hazırda yarım milyon manatın ələ keçirilməsinə hazırlıq gedir deyə “Pure Life Company”nin direktoru Adil Vahabovla “Akkord” Şirkətlər Qrupunun rəhbərliyi arasında gizli sövdələşmə var. Bu sövdələşməyə əsasən, 3 gün öncə bir MMC yaradılıb və kommunal xidmətlərin göstərilməsi və müvafiq olaraq borcların yığılması da həmin şirkətə ötürülüb.

Sakinlər hesab edirlər ki, bu ötür-ötür oyunu keyfiyyətsiz iş və xidmətlərə görə yazılan yarım milyon manatı aşan borcun onlardan hədələməklə alınmasına görədir. Qeyd edirlər ki, həmin MMC isə şirkət tərəfindən yönləndirilən bir qrup sakin ələ alınmaqla yaradılıb.

Sakinlər kopmleksdə kommunal xidmət işçilərinin kütləvi şəkildə, məcburi olaraq ərizə yazmaqla öz xahişləri ilə işdən çıxmağa təhrik edilməsi hallarının olmasını da bildirirlər. Qeyd edirlər ki, bütün qanunsuz addımların əsas məqsədi sakinlərin Mənzil Mülkiyyətçilərinin Müştərək Cəmiyyətini yaratmasına mane olmaqdır.

“Uğur-2” kompleksinin komendantı Anar Məmmədov artıq vəzifəsindən uzaqlaşdırılıb. Digər komplekslərin komendantlarına isə təcili şirkət yaratmaları, 3-cü şirkətlə müqavilə bağlamaları, aylıq 3-5 min manat pul toplayıb onlara vermələri tələb olunur.

Məkrli oyunlara “Akkord”un mərkəzi ofisinin Orxan və Müslüm adlı əməkdaşları da cəlb olunub.

Sakinlər deyirlər ki, eyni vəziyyət “Akkord” Şirkətlər Qrupunun inşa etdiyi “Uğur-1”, “Abşeron Gənclər Şəhərciyi”, “Etalon” və digər komplekslərində də hökm sürür.

“Pure Life Company”nin direktoru Adil Vahabov Musavat.com-a deyib ki, yeni yaradılan MMC binada yaşayan 10-a yaxın sakinin özlərinin idarəçiliyindədir:

“Bir neçə aydan sonra Mənzil Müştərək Cəmiyyəti qurulacaq. O dövrə kimi müəyyən problemlərin bitməsi üçün özlərinin təsis etdiyi, özlərinin idarəçiliyində olan şirkətdir. Burada bizim və ya başqa bir şirkətin kommersiya marağı yoxdur. Bu, sırf sakinlərdən ibarət qrupdur. Orada iki qrup vardı, biri buna, biri ona işləyirdi, demokratiyanı təmin edib hər iki qrupun ayrı-ayrılıqda 4 üzvü təyin olunub”.

A.Vahabov bildirib ki, artıq kompleksdə kənardan gəlmiş bir şirkət yoxdur.