Naxçıvan taksilərinin Türkiyənin Iğdır vilayətinə sərnişin daşımasına qoyulan qadağa aradan qaldırılıb. Bu haqda „Gündəlik Naxçıvan“a taksi sürücüləri məlumat veriblər. Onlar deyirlər ki, bir neçə həftədir tətbiq edilən qadağa, məsələ ictimailəşdikdən bir neçə gün sonra aradan qaldırılıb:

„Artıq problem həllini tapıb. Eşitdiyimizə görə, Türkiyənin Naxçıvandakı konsulluğu işə qarışıb və qadağa aradan qaldırılıb. Deyilənə görə, həbs olunan taksilər də şərtsiz geri qaytarılacaq. Bu qadağa bizim çörəyimizi kəsmişdi. Müştəri aparıb, dolanışığımızı çıxarırırq. Biz onları qınamırıq, hər ölkənin öz qanunları var. Yenə də sağ olsunlar ki, qardaş millət olduğumuzu, Naxçıvanın blokadadakı durumunu nəzər aldılar. Yoxsa, 10-larla ailə çörəksiz qalacaqdı.“

Taksi sürücüləri aidiyyəti qurumlara müraciət edərək, Iğdırdakı yol polisinin də onlarlarla güzəştli davranmasını xahiş edirlər:

“Bəzən ağır xəstə aparırıq İğdırdakı xəstəxanalara. Xəstəxana qarşısında saxlayıb, xəstəni yuxarı qaldırmağa kömək edirik. Yol polisləri dayanma qaydalarını pozduğumuza görə bizi cərmələyirlər. Oranın da cərimələri çox ağır olur. Xahiş edirik, həsass vəziyyətlərdə bizi nəzərə alsınlar.”

Bir neçə gün öncə naxçıvanlı taksi sürücüləri məlumat vermişdilər ki, onların Türkiyə ərazisindəki fəaliyyəti qadağan olunub. Onlar bildirirdilər ki, yeni qaydanı pozan sürücülər cərimələnir, avtomobillərinə isə 15 günlük həbs cəcası verilir. Qaydanı pozan 10-larla avtomobilə Türkiyədə həbs qoyulduğu bildirilirdi.