“Əziz seçicilər, vətəndaş qəbulu üçün öncədən təyin olunmuş məkana, istidə və ya soyuq havada gəlməyə, əlavə vaxt, enerji və bəzi hallarda yol pulu xərcləməyə ehtiyac yoxdur. Bir aydan çoxdur ki, Milli Məclisdə ilk dəfə olaraq whatsapp kanalı yaratmışıq, 25-ə yaxın müraciət qəbul etmişik. Proses çox sadədir. Müraciətinizi səsli və yazılı formada whatsapp üzərindən göndərirsiniz, 3 iş günü ərzində sizinlə razılaşdırılmış vaxta şəxsən özüm sizinlə canlı əlaqə yaradıram, 1 iş günü müddətində isə əgər müraciətiniz hansısa dövlət orqanına göndərilməlidirsə, deputat sorğusunun şəklini çəkib sizə göndəririk. Whatsapp kanalımda eyni zamanda çox maraqlı sorğular keçiririk, effektivlik yüksək səviyyədədir, bu il sorğuların və faydalı məlumatların məzmunun həm keyfiyyət, həm də ictimai maraq baxımından daha da genişləndirəcəyik”.
Bəli, bunu öz aləmində və Milli Məclisdə yenilik etdiyini düşünən deputat Kamal Cəfərov deyib.
Bəlkə də, ilk oxunuşda qulağa xoş gəlir.
Ancaq bu müraciətin altqatı odur ki, ay seçicilərim, siz Allah, üzünüzü görmək istəmirəm, nə sözünüz varsa, mesajla yazın.
Şübhə yoxdur, deputa bu üsulla seçiciləri rahat blok edə, ən yaxşı halda da mesajlarına görüldü ata bilər.
Qıraqdan baxanda elə bilər ki, Kamal Cəfərov doğrudan da seçicilərini düşünür, onların əziyyətə düşməyini istəmir.
Ancaq belə yerdə onun özünə demək lazımdır:
Hörmətli deputat, sən seçicilərin problemlərini həll et, narahat olma, onlar özləri hara lazım olsa, orada gedərlər.
Görünür, pandemiya dövrünün ənənəsini davam etdirir Kamal bəyimiz.
Seçicilərlə də belə vaxtda distant görüş olar?
Maraqlıdır, deputat niyə seçicilərlə görüşdən yayınır? Texnologiya buna görə inkişaf eləmişdi ki, deputat seçicilərinin üzünü də, problemini də online dinləsin?
Whatsapp kanalı yaratmaq yenilikdirsə, onda sual yaranır: Bəs deputat mandatı nədir? bəs qəbul günləri nə üçündür? Bəs seçici ilə üzbəüz oturub hesabat vermək hansı dövrün adətidir – daş dövrününmü?
Kamal Cəfərov, bəlkə də, bunu səmimi şəkildə təqdim edir. Amma siyasətdə niyyət yox, nəticə önəmlidir. Nəticə isə budur ki, deputat seçicidən bir addım da uzaqlaşır, seçici isə bir az da səssizləşir.
