Quba rayonu, Talabıqışlaq kənd sakini Qeybullayev Natiq Mehman oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi saytımız vasitəsilə Əmək və Əhalinin Sosial Müdafiəsi naziri Anar Əliyevə müraciət edir:

“Hörmətli Anar Əliyev!

Mən, Quba rayon sakini Qeybullayev Natiq Mehman oğlu, yazaraq sizə problemimi çatdırmaq istəyirəm.

Bildirim ki, ailəliyəm, himayəmdə 6 uşağım var. 6-cı uşağım yeni anadan olub, uşaq pulu vermirlər. Yaşayış yerim bərbad vəziyyətdədir. Evim yanıb, ailəlikcə 1 otaqda yaşayırıq. Qonşuların köməyi ilə evin damını biraz düzəltmişik.

Sosial müavinətdən faydalanıb, uşaqlarımı dolandırmaq üçün müraciət etmişdim. Adıma torpaq sahəsi var, onun da vergisini ödəmişəm. Yoxlama gələn zaman şəraitin ağırlığını gördülər. Dedilər ki, mətbəxt, hamam otağı yoxdur, burda yaşamaq olmaz. Bildirdim ki, şəraitim yaxşı olsa, sosial yardım istəməzdim.

3 ay gözlədim, cavab gəlmədi. Böyük qızımın həmin ərəfədə 16 yaşı oldu. Bu zaman da bildirdilər ki, uşağın 16 yaşı olub, şəxsiyyət vəsiqəsi almamısınız, bu səbəbdən imtina verilir.

Uşağın sənədini düzəltdim, indi də təzə anadan olan uşağım üçün doğum şəhadətnaməsi çıxartmalıyam. Bir də indiyə kimi ödədiyim vergi silinib, yenidən 1 illik ödəniş etməliyəm.

Hörmətli Anar Əliyev!

Siz və rəhbərlik etdiyiniz qurumun digər səlahiyyətli şəxsləri hər kəsin imkanını öz cibinizdəki məbləğlə bir ölçməyin. Bir ailə 6 uşaqla eyni otaqda yeyir, içir, bişirir, yatırsa, deməli, vəziyyət ağırdır. Mənim imkanım biraz yaxşı olsaydı, sizin qurumun verdiyi 3-5 manata görə bu qədər əziyyət çəkməzdim. İmkanım yoxdur, uşaqlarıma baxmaqda çətinlik çəkirəm.

"1 illik torpaq üçün vergi ödəyin" deyə qanun qoymusunuz. Pulum yoxdur, necə deyim ki, sizi başa salım. Bir daha deyirəm, mənim cibimdə sizin cibinizdəki pulun 1 faizi olsaydı, heç müavinət üçün sizə müraciət etməzdim.

ASAN Xidmətə gedirəm, 1 aylıq körpə uşaq üçün sənəd almaq istəyirəm, deyirlər ki, uşağın 2 ayı tamam olsun, sonra gətirin. Bu, biz kasıb təbəqə üçün süründürməçilikdir. Açıq-aşkar "öl, yaşama!" deyirlər.