Şərur rayonu, Muğancıq Mehrab kənd sakini Mahmudov İsgəndər Məhəmməd oğlu tərəfindən “Hürriyyət”in redaksiyasına şikayət məktubu daxil olub. Şikayətçi iddia edir ki, xalq artisti Zeynəb Xanlarovanın şirkəti tərəfindən onun torpaq sahəsi zəbt edilib:
“Mən, Mahmudov İsgəndər Məhəmməd oğlu, yazaraq xahiş edirəm ki, problemimi işıqlandırasınız.
2004-cü ildə Bakı şəhəri, Səbail rayonunda 170 kvadrat metr qeyri-yaşayış sahəsi olan ev aldım. 2005-ci ilin mart ayında Babayev Məhəmməd Əhmədağa oğlu zəng edib bildirdi ki, “biz həmin yeri almışıq, istəyirsən yerin pulunu sənə verək”.
Qeyd edim ki, həmin ərazini alan şirkətin adı “NOE” MMC-dir. Bu şirkət Zeynəb Xanlarovaya aiddir. Həmin ərazi 280 kvadrat metr idi. Mənim payıma düşən isə 170 kvadrat metr ərazi idi.
Mənə təklif etdilər ki, gəl Bakı şəhərinə, burada müqavilə imzalayaq. Mən 3 gün Bakıda qaldım, möhürü gətirib çıxartmadılar. Odur ki, Şərura qayıtmalı oldum.
Bir müddət sonra gələndə gördüm ki, mülkümü söküb-dağıdıblar. Uzun mübahisələrdən sonra dedilər ki, “gözlə, öz ərazini tikək verək”. Bir neçə ilə bina hazır oldu. Yenə mənə oyun qurdular, aldatdılar. Şirkəti məhkəməyə verdim.
2017-ci ildə Zeynəb Xanlarova deputat seçiləndə Milli Məclisə məktub ünvanladım. Bu günə qədər də Zeynəb Xanlarova məktublarıma cavab vermir. Məhkəmələri udmuşam, amma mənə aid olan ərazini vermirlər, mənimsəyiblər.
2025-ci il aprel ayının 26-da Ali Məhkəmə də qərar çıxardı. Məhkəmə qərar verdi ki, qarşı tərəfə dəyən ziyan ödənilsin. Amma əhkəmənin qərarını sayan yoxdur.
Özüm 1991-1992-ci illərdə Sədərək rayonunda gedən döyüşlərin iştirakçısı olmuşam. Hazırda 2-ci qrup əlilliyim var. Sədərəkdə Ermənilərə bir qarış torpaq vermədik. Amma öz vətənimin adamı əlimdən mənə məxsus olan torpaq sahəmi alıb”.
