TƏHSİL NAZİRLİYİNİN QANUNLARDAN XƏBƏRİ YOX İMİŞ
DİA.AZ: - Sumqayıt şəhər sakini Hüseynli Fərman Məhət oğlu redaksiyamıza müraciət edib. DİA.AZ-a müraciətində o, diplomunun leqallaşdırılması zamanı üzləşdiyi problemlərə toxunub. Müraciətdə deyilir:
“Mən 1984-cü il tarixdə Ümumittifaq Qiyabi Hüquq İnstitutuna daxil olmuşam, 1992-ci il tarixdə isə Moskva Hüquq İnstitutunu hüquqşünaslıq ixtisası üzrə bitirmişəm. 1990-cı ildən etibarən müxtəlif idarə və təşkilatlarda hüquqşünas kimi çalışmışam. 1998-ci ildən isə Azərbaycan Respublikası Ədliyyə Nazirliyi tərəfindən verilmiş lisenziya əsasında pullu hüquqi xidmət göstərmişəm. 2005-ci ildə Azərbaycan Respublikası Vəkillər Kollegiyasına üzv olmaq məqsədilə lazım olan bütün sənədləri topladıqdan sonra Kollegiyanın Rəyasət Heyətinə müraciət etdim.
Sənədlərim yoxlanıldıqdan sonra mənə bildirildi ki, siz təhsilinizi Rusiya Federasiyasında aldığınız üçün diplomunuz Azərbaycan Respublikası Nazirlər Kabinetinin 13 may 2003-cü il tarixli, 64 saylı qərarına əsasən Təhsil Nazirliyi tərəfindən tanınmalıdır. Bundan sonra mən 2005-ci ilin noyabr ayında Təhsil Nazirliyə müraciət edərək diplomumun tanınması ilə bağlı rəsmi ərizə verdim. Təhsil Nazirliyinin əməkdaşları mənə bildirdilər ki, siz diplomunuzu Rusiya Federasiyasının Təhsil Nazirliyində Apostil möhürü ilə təsdiq etdirin və sonra həmin sənədi bizə təqdim edin. Mən belə də etdim. Moskvaya gedib diplomumu Rusiya Federasiyasının Təhsil Nazirliyində Apostil möhürü ilə təsdiq etdirdikdən sonra Bakıda Təhsil Nazirliyini əməkdaşlarına təqdim etdim.
Sonra Təhsil Nazirliyinin əməkdaşları məndən hərbi biletimi və digər sənədləri də tələb etdilər. Mən də həmin sənədləri toplayıb onlara təqdim etdim. Bütün bunlardan sonra Təhsil Nazirliyinin əməkdaşları sənədlərimi geri qaytararaq bildirdilər ki, “bağışlayın, sən demə, sizin diplom heç tanınmalı deyilmiş”. Bununla bağlı mənə 04.03.2006-cı il tarixində Təhsil Nazirliyinin Xarici Əlaqələr, İnformasiya və Koordinasiya şöbəsinin müdiri M.Əliyevin imzası ilə cavab məktubu göndərilmişdi.
Məktubda bildirilirdi ki, “hal-hazırda Təhsil Nazirliyi Nazirlər Kabinetinin 13 may 2003-cü il tarixli 64 saylı Qərarının icrası ilə bağlı 1993-cü ildən bu günə qədər xarici ölkələrin ali məktəbləri tərəfindən verilmiş diplomların Azərbaycan Respublikası ərazisində tanınması prosedurunu müvafiq qaydada həyata keçirir. Ondan əvvəlki illərdə alınan alı təhsil haqqında sənədlərə Nazirlər Kabinetinin 13 may 2003-cü il tarixli 64 saylı Qərarı ilə təsdiq edilmiş “Xarici dövlətlərin ali təhsil sahəsində ixtisasların tanınması və ekvivalentliyinin müəyyən edilməsi (nostifikasiya) Qaydaları şamil olunmur”.
Belə olan təqdirdə mən yenidən Azərbaycan Respublikası Vəkillər Kollegiyasına müraciət etdim. Oradan mənə bildirdilər ki, Təhsil Nazirliyi tərəfindən sizə göndərilmiş məktuba imza atmış şöbə müdirinin məktubu imzalamağa səlahiyyəti yoxdur və sizin diplomunuz mütləq Təhsil Nazirliyi tərəfindən tanınmalıdır. Bundan sonra mən 26.04.2006-cı il tarixində yenidən şəxsən Təhsil Nazirinə ərizə ilə müraciət etdim. Ərizəmdə mənə göndəriləcək məktuba Azərbaycan Respublikası Təhsil Nazirliyinin səlahiyyətli şəxsinin imza atmasını və qanunvericiliyin tələblərinə əsasən diplomumun tanınması ilə bağlı mənə köməklik edilməsini xahiş etmişdim.
Bu ərizəmi də 29.07.2006-cı il tarixində yenidən Təhsil Nazirliyinin Xarici Əlaqələr, İnformasiya və Koordinasiya şöbəsinin müdiri Mahir Əliyev imza edərək bildirmişdir ki, Təhsil Nazirliyi Nazirlər Kabinetinin 13 may 2003-cü il tarixli 64 saylı Qərarının icrası ilə bağlı Nazirin 749 в„–-li 05.08.2003-cü il tarixli Əmrinə əsasən 1993-cü ildən əvvəlki illərdə SSRİ məkanında alınmış ali təhsil haqqında sənədlərə Azərbaycan Respublikası Nazirlər Kabinetinin 13 may 2003-cü il tarixli, 64 saylı Qərarı ilə təsdiq edilmiş “Xarici dövlətlərin ali təhsil sahəsində ixtisasların tanınması və ekvivalentliyinin müəyyən edilməsi (nostifikasiya) Qaydaları şamil olunmur və bu diplomlar Azərbaycan Respublikasının ərazisində qüvvədədir”.
Bundan başqa, 23.05.2008-ci il tarixdə Təhsil Nazirliyi Aparatının rəhbəri İ.Pirməmmədovun, 12.05.2009-cu il tarixdə Təhsil Nazirliyi Aparat rəhbərinin müavini N.Hacıyevanın mənə ünvanladıqları məktublardan da görünür ki, 1993-cü ilə qədər MDB ölkələrinin ali məktəbləri tərəfindən verilmiş təhsil sənədləri nostifikasiya olunmadan Azərbaycan Respublikası ərazisində tanınır.
Təhsil Nazirliyinin məktubunu aldıqdan sonra mən Azərbaycan Respublikası Vəkillər Kollegiyasına müraciət etdim. Kollegiyanın sədri Azər Tağıyev bildirdi ki, birincisi, bu məktub qanunazidd tərtib olunub, ikincisi isə məktubu yenə də səlahiyyəti olmayan şəxs imzalayıb, ona görə də biz özümüz Vəkillər Kollegiyasının adından Təhsil Nazirliyinə müraciət edəcəyik.
Azərbaycan Respublikası Vəkillər Kollegiyası Rəyasət Heyətinin sədr müavini 29 yanvar 2008-ci il tarixli, 16 saylı mənə ünvanlanmış məktubunda bildirir ki, onlar mənim ərizəmdən sonra Təhsil Nazirliyə müraciət etmişlər və Təhsil Nazirinin imzası ilə təsdiq olunmuş məktub almışlar. Həmin məktubda isə göstərilir ki, MDB başçıları tərəfindən 15.05.1992-ci il tarixdə imzalanmış “Təhsil sahəsində əməkdaşlıq barədə saziş”in 5-ci maddəsinə əsasən 1992-ci ilədək alınan ümumtəhsil, texniki-peşə, orta ixtisas və ali təhsil barədə nümunəvi dövlət sənədlərinə ölkə iştirakçıları tərəfindən müddətsiz tanınma 1992-ci ilədək müəyyən edilir. Elə buna görə də Azərbaycan Respublikası Vəkillər Kollegiyasına qəbulum mümkünsüzdür və bu məsələ ilə bağlı Təhsil Nazirliyinə müraciət etməyim tövsiyyə olunur. Vəkillər Kollegiyası tərəfindən mənə göndərilmiş məktubun məzmunundan belə görünür ki, Təhsil Nazirliyi altı ilə yaxındır ki, mənim diplomumu tanıyaraq Şəhadətnamə vermək əvəzinə məni dolandırmaqla məşğul olmuş və diplomumun tanınması ilə bağlı müvafiq tədbirlər görməmiş, əvəzində isə mənə heç bir hüquqi qüvvəyə malik olmayan lüzumsuz məktublar göndərmişdir.
08 noyabr 2012-ci il tarixdə mən Təhsil Nazirliyinə təkrarən yazılı müraciət etdim, 04 dekabr 2012-ci il tarixdə mənə cavab gəldi ki, Təhsil Nazirliyinə dəvət olunuram. Mən də Təhsil Nazirliyinə getdim və 3 saat gözləsəm də, çağıran olmadı. Bundan sonra Təhsil Nazirinə teleqram vurub diplomumla bağlı məsələnin həlli üçün məni şəxsən qəbul etməsini xahiş etdim. Lakin teleqrama heç bir cavab verilmədi.
Hörmətli redaksiya,
Diplomu leqallaşmalı olan hüquqşünasın diplomunun tanınması 7 il çəkirsə, başqalarından nə demək olar?! Yəqin ki, “səbəb” nazirliyin əməkdaşlarının “bığlarının altından” keçməməyimdir.
Sizdən xahiş edirəm ki, diplomları tanınması ilə bağlı yaradılan süni və əsassız problemləri işıqlandırmağa kömək edəsiniz”.
