DEPUTATIN QARDAŞININ DA ADININ KEÇDİYİ İLGİNC KREDİT MAXİNASİYALARI
DİA.AZ: “Bir Kredit İttifaqının Sədri kimi özümə borc bilib aşağıda qeyd edəcəyim məlumatları ictimaiyyətin və lazımi qurumların nəzərinə çatdırmaq istərdim”. Bu sözlər DİA.AZ-a göndərilən və kənd təsərrüfatı naziri İsmət Abbasova qarşı çox ciddi ittihamların da yer aldığı məlumatda qeyd olunub. Məlumatı verən mənbə anonimliyini qoruyaraq daha sonra aşağıdakıları ifadə edib:
“Artıq üç ildir ki, İsmət Abasovun kadrı olan “İcraçı Kredit Agentliyi Bank Olmayan Kredit Təşkilatı” MMC-nin (İKA) Baş Direktoru Arif Əliyev İsmət Abasovun göstərişi ilə Kredit İttifaqlarından rüşvət yığaraq, eyni zamanda Dövlətin zəmanəti ilə Dünya Bankı tərəfindən ölkəyə ayrılan 18,8 milyon ABŞ dolları məbləğində vəsaiti də talamaqda davam edir. Paradoks ondan ibarətdir ki, adı çəkilən Bank Olmayan Kredit Təşkilatı - İKA məhz Kənd Kreditləşməsi Layihəsi üçün yaradılmış təşkilatdır və uzun illər onun təsisçisi “Azərbaycan Kredit İttifaqları Assosiasiyası” İctimai Birliyi (AKİA) olmuşdur.
Layihə çərçivəsində kəndlli fermerlər və kiçik sahibkarlar Kredit İttifaqları (Kİ) vasitəsilə aldıqları kredit vəsaitlərindən istifadə edərək öz güzəranlarını yaxşılaşdırmalı idilər. Onu da qeyd etmək istərdim ki, bu vəsaitin ölkəmizə gətirilməsi və İKA vasitəsilə Kİ-lərə paylanılması müvafiq Hökumət qurumu və Dünya Bankı tərəfindən İKA-nın təsisçisinin tam olaraq İctimai Birlik, yəni AKİA-nın olması təqdirində razılaşdırılmışdır. Yəni İKA-da 18,8 milyon ABŞ dolları vəsaitinin dövriyyəsindən əldə olunan mənfəət heç bir fiziki şəxsin marağı olmadan ilin sonu nizamnamə kapitalına əlavə olunmalı və Layihə bitdikdən sonra Dövlət Büdcəsinə ötürülməli idi.
Belə ki, müxtəlif korrupsiya dolu yollarla təşkilatın pullarını mənimsəyən İsmət Abbasova bütün bunlar az etdiyi üçün yeni özəlləşdirmə metodunu da icad edib və bu metodun həyata keçirilməsini Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyinin Direktor müavini Famil Rüstəmova tapşırdı.
O, mütəmadi olaraq Kredit İttifaqlarının sədrlərini öz otağında toplayaraq onları bu strategiyanı həyata keçirməyə məcbur edir və əks halda onları kreditdən məhrum etməklə hədələyirdi. İKA-nın qeyri-adi özəlləşdirmə strategiyası ondan ibarətdir ki, İsmət Abbasov AKİA-nın nizamnamə kapitalındakı payını azaldaraq Arif Əliyev başda olmaqla kənardan naməlum fiziki şəxslər və kredit ittifaqları bu təşkilatın yeni təsisçiləri kimi AR-nın Vergilər Nazirliyində rəsmi olaraq qeydiyyatdan keçirtməyə nail olmuşdur.
Absurd odur ki, kredit ittifaqları Assosiyanın üzvü olmalarına baxmayaraq, Kİ Sədrlərindən pul yığmaqla onları ikitərəfli təsisçi etmələri heç bir məntiqə sığmır. Həmçinin Dövlət Layihəsini icra edən və kapitalı dövlət vəsaitindən ibarət olan təşkilatın naməlum fiziki şəxslər tərəfindən özəlləşdirilməsi də bir daha Dünya Bankının vəsaitinin mənimsənilməsi analoqu olmayan rüşvət mexanizmidir. Dövlətə çatası olan mənfəət müxtəlif təsisçilərin adıyla özəlləşdirilərək Hökumət Evinin 7-ci mərtəbəsindəki İsmət Abasovun kabinetinə çanta ilə çatdırılır.
Eyni zamanda, onu da xatırlatmaq istərdim ki, bu Layihənin müddəti artıq iki ildir ki, tamamlanıb, lakin “məlum səbəbdən” layihə 7 il müddətinə vəsaitin yığılması adı ilə uzadılıb. Bunun həyata keçirilməsində İsmət Abbasova yardım edən şəxs Kənd Təsərrüfatı Kreditləri üzrə Dövlət Agentliyinin keçmiş Baş Direktoru və hal-hazırda Maliyyə Nazirliyində Dövlət Borcunun İdarə Edilməsi Agentliyinin direktoru vəzifəsində çalışan Razim Vəliyevdir.
Bu gün də bu əməllərə onun göz yumması və tədbir görməməsinin səbəbi artıq bəllidir. Onu da qeyd etmək istərdim ki, Razim Vəliyev millət vəkili Əhməd Vəliyevin doğma qardaşıdır və uzun illər ərzində Arif Əliyevlə Dövlət Agentliyində həmkar olublar. Arif Əliyev Dövlət Agentliyində mühasib vəzifəsində işləyən zaman “təcrübəli” maxinasiyaları ilə məşhur olmuşdur və 10 manatlıq kompüter fləşkartlarını 200 manatdan 1000 ədəd silinməsini çox rahat həyata keçirərək Famil Rüstəmov və Razim Vəliyevin rəhbərlikləri ilə dövlət vəsaitini mənimsəyirdilər. Buradan da məlum olur ki, Dünya Bankının vəsaitinin kreditləşməsi prosesində yaranmış gecikmələri ört-basdır etmək üçün İsmət Abbasov öz adamını, yəni Razim Vəliyevi Maliyyə Nazirliyində Dövlət Borcunun İdarə Edilməsi Agentliyinin direktoru vəzifəsinə təyin olunmasına nail olmuşdur.
İsmət Abbasovun kadrı olan Arif Əliyev İKA-nı məhz İsmət Abasova qulluq etmək üçün özəlləşdirərək Kredit İttifaqları və İKA-nı talamaqda davam edir.
Hələ 1999-cu ildə Kredit İttifaqları ulu öndər mərhum Prezidentimiz Heydər Əliyevin qərarı və dəstəyi ilə yaradılmışdırlar və onların əsas məqsədi dünyanın bütün ölkələrindəki kimi beynəlxalq prinsiplərə əsaslanaraq yoxsul təbəqənin həyat tərzini yaxşılaşdırmaqdan ibarətdir. Lakin İsmət Abbasovun bu kimi açıq-aydın cinayətlə Dünya Bankı tərəfindən ayrılan vəsaitin “özəlləşdirməsi”ni sabotaj – yəni xalqın hökumətə qarşı çıxması kimi adlandırmaq olar. Bu da ölkəmizin imicini beynəlxalq səviyyədə gözdən salır, kredit ittifaqlarını müflis edir.
Yoxsul təbəqəyə çatası pulları İsmət Abbasov Londonda və İstanbulda mülklər almaq üçün sərf edir. Bir Kredit İttifaqının rəhbəri kimi öz sözümü dediyim üçün mənim üzvlərimi kreditdən məhrum ediblər və hətta Agentliyin qapısına da buraxmırlar. İsmət Abbasovun Kənd Təsərrüfatını bərbad vəziyyətə çatdırması dəfələrlə sizin nəşriyyat tərəfindən qələmə alınıb və istər istəməz belə bir sual yaranır: “Görəsə,n bu təxribatçı və onun köməkçiləri nə vaxta qədər öz əməllərini davam edəcəklər və bizim kimi işgüzar kənd sakinlərini bir parça çörək qazanmaq üçün ölkədən didərgin salacaqlar? Həmçinin bütün yazıları çəfəngiyat adlandıran İsmət Abbasov İKA-nın mənfəətini ələ keçirməsinə nə cavab verəcək?””...
Adları çəkilən bütün tərəflərin mövqelərini işıqlandırmağa hazırıq...
