Hazırda parlamentdə təmsil olunan elə depuptatlar var ki, onların bir dəfə də olsun Milli Məclisdə səsləri çıxmayıb, müzakirə olunan bu və digər məsələlərə dair fikir bildirməyib, diskusiyalarda iştirak etməyiblər. Misal kimi, 39 saylı Kəpəz birinci (Gəncə) Seçki Dairəsindən parlamentə seçilmiş Xanlar Nuru oğlu Fətiyevi göstərmək olar. Məlumat üçün bildirək ki, 1972-ci ildə Bakı şəhərində anadan olmuş Xanlar Fətiyev 1988-ci ildə Azərbaycan Memarlıq və İnşaat Universitetinin sənaye və mülki tikinti fakültəsinə daxil olub.
İş fəaliyyətinə 1988-ci ildə "Azərtransqaz" nəzdində 2 saylı səyyar mexanikləşdirilmiş dəstədə fəhlə kimi başlayan deputat 1990-1991-ci illərdə "Betonçu" kooperativində iqtisadiyyat və istehsalat üzrə mühəndis, 1992-1994-cü illərdə isə həmin kooperativdə sədr vəzifəsində işləyib. O, 1994-1997-ci illərdə "Elruz" kiçik müəssisəsində sədr, 1997-2003-cü illərdə "Avestas" firmasının baş direktoru, 2003-2004-cü illərdə "Aznur" MMC-nin baş direktoru vəzifələrində çalışıb. 2004-cü ildən bu günə kimi isə "Gəncə avtomobil zavodu" İstehsalat Birliyinin Müşahidə Şurasının sədri vəzifəsində işləyir. Onu da qeyd edək ki, parlamentin təhlükəsizlik və müdafiə komitəsinin üzvünün rəhbərlik etdiyi "Gəncə avtomobil zavodu" İstehsalat Birliyinin direktoru vəzifəsini Kamran Qılman oğlu Nəzərov, direktorun birinci müavi postunu Bağban Qoca oğlu Nəbiyev, direktor müavini vəzifələrini isə Şəhla Fərhad qızı Abdinova, Etibar Vilayət oğlu Qasımov, Amin Allahverdi oğlu Əliyev icra edir.
Xülasə, keçək mətləbə. Xanlar Fətiyevi məhz fəaliyyətinə, daha doğrusu, fəaliyyətsizliyinə görə susqun deputatlar sırasına aid etmək olar. Onun deputat fəaliyyəti boyunca bircə dəfə olsun parlamentin iclaslarında çıxış etməməsi faktı xüsusilə maraq doğurur. "Gəncə avtomobil zavodu" İstehsalat Birliyinin Müşahidə Şurasının sədrinin mətbuatda bir neçə açıqlamasına rast gəlmək olar ki, bu da onun rəhbərlik etdiyi "Kəpəz" futbol klubu ilə bağlıdır. Deputat kimi fəaliyyəti haqqında isə ümumiyyətlə, hər hansı müsahibə və açıqlaması olmayıb. Görünür, Xanlar Fətiyev hansısa səbəblər üzündən kütləvi informasiya vasitələrilə təmasa ehtiyac duymur. Maraqlıdır, görəsən, niyə? Məgər, onun mətbuat vasitəsilə seçicilərinə, ictimaiyyətə, geniş auditoriyaya deyəcək sözü yoxdur?..
Bu arada, deputatın rəhbərlik etdiyi Gəncə Avtomobil Zavodunda MAZ 555102-223-600, MAZ 551605-271, MAZ 650108-270-011, MAZ 457043, MAZ 533605-222, MAZ 544005-030-030, MAZ 642208-232, MAZ 643008-070- 010, MAZ 651608-220-600, MAZ 953000-014 markalı yük maşınlarının, BELARUS 1221, BELARUS 132H, BELARUS 320, BELARUS 321, BELARUS 80.1, BELARUS 80X, BELARUS 82.1, BELARUS 892, BELARUS 921.3 markalı traktorların, eləcə də DEM-114, ESU-150, FRS-200M, KO-456-10, KO-456-16, KS-55727-1-11, M-21 x2s, MUP-320 və MUP-351 markalı xüsusi təyinatlı texnikaların satıldığını vurğulayan məlumatlı şəxs iddia edir ki, hazırda Xanlar Fətiyevin Gəncə şəhərində, o cümlədən paytaxın Yasamal rayonundakı "Sovetski" məhəlləsində bir neçə iri biznes obyekti var: "Deputat əlində olan imkanlardan maksimum istifadə edərək həm Gəncədə, həm də Bakıda özünə iri biznes strukturları qurmağa müvəffəq olub. Onun Yasamal rayonunda, daha dəqiq desəm, "Sovetski"də bir neçə apteki və digər obyektləri var. Hələ bu azmış kimi, bu gün o, yeni obyektlər də tikdirir. Bu isə sakinlərin ciddi narazılığına səbəb olur. Çünki Xanlar Fətiyevin göstərişi əsasında aparılan tikinti işləri "Sovetski" sakinlərinin gününü göy əskiyə büküb. Camaata normal hərəkət etməyə imkan belə verilmir. Bu cür plansız aparılan tikinti işləri əhalini həm Yasamal Rayon İcra Hakimiyyətindən, həm də digər müvafiq qurumlardan narazı salır".
Ötən ilin aprel ayında Xanlar Fətiyevin Milli Məclis Aparatının Ümumi şöbəsinin müdiri Təlatüm Quliyevlə qohum olduğunu qeyd edən məlumatlı şəxs bildirir ki, şöbə müdirinin AZAL Dövlət Konsernində işləyən oğlu Böyükağa Quliyev deputatın qızı ilə ailə qurub: "Bundan başqa, Xanlar Fətiyevin baş nazir Artur Rəsizadə ilə də yaxın qohumluq əlaqələrinə malik olduğu deyilir. Qeyd olunur ki, məhz baş nazirlə qohumluğu sayəsində "Gəncə Atomobil Zavodunun rəhbəri qısa müddətdə iri biznesmenə çevrilib”.
1986-cı ildə əsası qoyulmuş Gəncə Avtomobil Zavodunun sovetlər birliyinin dağılması nəticəsində tikintisinin yarımçıq qaldığını və yalnız 2004-cü ilin dekabrında işə düşdüyünü vurğulayan məlumatı şəxsin iddiasına görə, alqı-satqı məsələsində peşəkar olan deputatın demək olar ki, əsas qabiliyyəti zavodun 35 hektar ərazisinin ucdantutma məhlə yeri kimi satılması zamanı üzə çıxıb: "Xanlar Fətiyevin daha bir keyfiyyəti Kür çayından Gəncə Avtomobil Zavoduna, eləcə də Avtomobilçilər qəsəbəsinə gələn 10 kilometrlərlə iri diametrli dəmir boruların satılaraq mənimsənilməsi zamanı bəlli olub. Onu da qeyd edim ki, Gəncə Avtomobil Zavodu bu günə kimi ayrılan külli miqdarda investisiyaya baxmayaraq, müəssisə müstəqil olaraq heç bir maşın növü istehsal edə bilməyib. Ötən il ərzində zavodda 1000-ci traktor konveyerdən çıxsa da, "Aqrolizinq" ASC ilə aralarında bağlanmış 35 milyon manatlıq dəyərində 500 ədəd traktorun qiymətlərini süni olaraq şişirtməklə 10 milyondan çox vəsaitin mənimsənildiyi iddia olunur. Bundan başqa, qısa müddət ərzində Gəncədə traktor istehsalının artırılması Belarusdan gətirilmiş texniki hissələrin gömrük rüsumundan azad olması ilə izah edilir. Lakin ehtiyat hissələrinin ucuz başa gəlməsinə baxmayaraq, yığılan traktorun qiyməti nə az nə çox, düz 25-30 min manata satılır. Yəni Xanlar Fətiyev bu sahədə şəffaflığın olmamasından yararlanaraq külli miqdarda gəlir əldə etməyə müvəffəq olur. Yəqin ki, müvafiq dövlət qurumları tezliklə bu məsələyə aydınlıq gətirəcəklər".
Mövzu ilə əlaqədar qarşı tərəfin də fikirlərini işıqlandırmağa hazırıq. \\ gundelik-baku.com \\
