“Suriyadan texnika daşımalı olan iki Rusiya yük gəmisi Aralıq dənizində sıradan çıxıb və onlardan biri batıb. İndi ruslar təcili olaraq onlara əvəzedicilər axtarırlar. Təbii ki, bu bizim üçün xoş xəbərdir, amma başqa bir vacib cəhət də var: mahiyyət etibarı ilə kiçik olan bu hadisə Rusiyanın Üçüncü Dünya müharibəsinə hazırlığının bir növ lakmus sınağıdır. Nə indi, nə də beş il sonra Putin və ya ondan sonra gələn hansısa şəxsin ordusu NATO ilə döyüşməyə hazır olacaq”. Bu fikirləri ukraynalı politoloq Vadim Denisenko yazdığı analitik məqaləsində qeyd edib.

“Sadəcə, hamı başa düşsün: Rusiya bugünkü hərbi əməliyyatlara on dörd ildir - 2008-ci ildən, Gürcüstandakı müharibədən sonra hazırlaşır. Ona görə də kimsə deyəndə ki, 4-5 illik möhlətdən sonra Rusiya güclənəcək, bu, mifdir”, - deyə analitik əlavə edib.

Politoloqun qənaətincə, Rusiyanın hazırkı maliyyə vəziyyətini, texnologiya çatışmazlığını, təyyarə və gəmiqayırmada uğursuzluqları nəzərə alında, bu ölkənin Üçüncü Dünya müharibəsinin favoriti olacağı absurddur: “Rusiyanın edə biləcəyi yeganə şey qarışıqlıq yaratmaqdır. Axı bu, Moskvanın indiyə qədər nisbətən uğurla etdiyi işdir”.

“Ancaq hər şey o qədər də sadə deyil. Əgər kollektiv Qərb indi İranın belini qıra bilsə, Rusiyanın yalnız bir hərbi müttəfiqi qalacaq – Şimali Koreya. Çin öz oyununu oynamağa davam edəcək, burada müharibə və hərbi əməliyyatlar ən yaxşı istifadə olunmayan son “kozır” olaraq qalacaq. Şimali Koreya isə həmişə oyun oynayıb: bizə daha çox pul verin”, - Denisenko əlavə edib.

Politoloq yazıb ki, başqa bir mühüm cəhət də var: ruslar üçün Ukrayna müharibəsi hələ də bütün təbliğat cəhdlərinə baxmayaraq, ekzistensial müharibə deyil: “Bunun üçün isə müharibədən pul qazanmağa öyrəşmiş orduda ciddi dəyişikliklər etmək lazımdır. Bir sözlə, bir neçə vacib məqamı başa düşməliyik. Birincisi, yaxın gələcəkdə 1914 və ya 1939-cu ildə baş vermiş formada Üçüncü Dünya müharibəsi olmayacaq. Təbii ki, biz bir sıra yerli müharibələrin içindəyik. Amma onlar bundan əvvəl də var idilər, bundan sonra da var olacaqlar. İkincisi, indi gözlənilən Üçüncü Dünya müharibəsinin nəticəsi barədə söz açanlar dörd kateqoriyaya bölünür: axmaqlar - bu haqda çox danışdıqları üçün inanırlar, informasiya dalğasını tutanlar: bu dalğada özlərini qorxudanlar və ətrafdakıları qorxudanlar, bundan siyasi üstünlük əldə etmək istəyənlər. Təəssüf ki, biz bütün bu hekayənin ortasındayıq. Ona görə də biz gələcək danışıqlardan danışarkən yadda saxlamalıyıq ki, virtual və ortamüddətli perspektivdə demək olar ki, qeyri-real Üçüncü Dünya müharibəsi Ukrayna üzrə gələcək razılaşmaların, yaxud qeyri-razılaşmaların real hissəsinə çevrilir”.

“Üçüncüsü, bizim əsas problemimiz ondan ibarətdir ki, Putin, daha dəqiq desək, rus elitası və rusların böyük bir hissəsi indi Ukraynaya öz hərbi rüsvayçılığının əsas kompensatoru kimi patoloji fiksasiya hazırlayıb. Son 400 ildə rusların fəxr edə biləcəyi yeganə şey ordu idi. İndiki müharibə isə məhz bu ordunun tam zəifliyini göstərir. Ruslara ən azı bir növ hiperkompensasiya lazımdır. Və burada biz sırf hərbi əməliyyatlardan kənara çıxır və təbliğatla məşğul oluruq”, - Denisenko vurğulayıb.

“Dördüncüsü, məhz buna görə də indi bizim üçün üstünlük təşkil edən hərbi aspektdən əlavə, müharibənin informasiya hissəsinə də diqqət yetirmək son dərəcə vacibdir. Üstəlik, həm ölkə daxilində, həm də düşmən ərazisində”, - analitik əlavə edib.

Sonda Denisenko qeyd edib ki, müasir müharibələrdə informasiya komponenti olmadan qalib gəlmək çətindir - “hər şeydən əvvəl, düşmən ərazisində”.