Türkiyə ordusu Suriyada terrorçu PKK/YPG yaraqlılarına qarşı mümkün əməliyyatla əlaqədar döyüş hazırlığı vəziyyətinə gətirilib. Türkiyə mediası bu iddia ilə çıxış edib. “Hürriyet” qəzeti Qərb ölkələrinin yeni tələblər irəli sürəcəyi təqdirdə, Türkiyə və Suriyanın terrorçu PKK üzvlərinə qarşı genişmiqyaslı hərbi əməliyyat keçirməyi planlaşdırdığını yazır. Nəşrin məlumatına görə, Suriyada yerləşən PKK-çılar alternativ administrasiyanın yaradılmasında israrlarını davam etdirirlər. Bunun ardınca ölkənin xarici işlər naziri Hakan Fidan jurnalistlərə açıqlamasında deyib ki, Ankara Suriyadakı PKK yaraqlılarına xəbərdarlıq edib. Əgər terrorçular çağırışlara məhəl qoyulmasalar, hərbi əməliyyat aktuallaşa bilər.
“Biz aydın tələblər irəli sürdük. Əgər hərbi əməliyyat variantını istəmirsinizsə, o zaman xarici terrorçular və onların liderləri Suriyanı tərk etməli, təşkilatın qalan üzvləri silahlarını yerə qoymalı və yeni Suriya administrasiyası ilə işləməlidirlər. Dəməşq onlarla dialoq aparır. Amma nəticə olmasa, qanuni seçim hərbi əməliyyat olacaq”, - Fidan bir neçə gün əvvəl vurğulayıb.
Qeyd edək ki, Türkiyə Prezidenti Rəcəb Tayyib Ərdoğan da terror qruplaşmalarına xəbərdarlıq edib və bildirib ki, “PKK silahı yerə qoymasa, başqa administrasiyanın yaradılmasında israr etməyə davam edərsə və Qərb ölkələri bu tələbləri dəstəkləyərsə, Türkiyə ordusu Suriya ilə birgə genişmiqyaslı hərbi əməliyyatı qaçılmaz olacaq”.
Azərbaycanlı hərbi jurnalist Səxavət Məmməd bildirir ki, Suriyada proseslər tamamilə yekunlaşmayıb: “Türkiyə terror problemini kökündən həll etmək niyyətindədir. Reallıq onu deyir ki, Türkiyə PKK problemini indiki mərhələdə həll edə bilməsə, gələcəkdə o problemdən başı indikindən daha çox ağrıyacaq. Ona görə də Türkiyənin hazırkı siyasətini anlamaq çətin deyil. Rəsmi Ankara açıq şəkildə bəyan edir ki, silahı yerə qoymasalar, həbi əməliyyata start verəcəklər. Məsələ ondadır ki, Türkiyə əməliyyatları heç dayandırmayıb. Aviasiya və PUA-lar vasitəsi ilə zərbələr endirməkdə davam edir”.
“Bundan əlavə, Türkiyə Suriya ərazisinə kifayət qədər qoşun yerləşdirə bilib. Yəni PKK/PYD/YPG silahı yerə qoymasa, Türkiyənin atacağı addım məlumdur. Hətta həbsdəki Abdullah Öcalanın belə bu məsələdə müsbət mesajları Türkiyənin nə qədər ciddi olması ilə bağlıdır”, - hərbi jurnalist vurğulayıb.
Onun sözlərinə görə, kürd qrupların təslim olacağı o qədər də inandırıcı deyil: “Birincisi, ABŞ və İsrail faktoru var. Hər iki ölkə bu günə qədər həm böyük maliyyə ayırıb, həm də silahlandırıb. İkincisi isə kürd probleminin aradan qalxması Türkiyənin əl-qolunu açmış olacaq. Türkiyə regionda və qlobal aləmdəki proseslərə daha çox qoşula biləcək. Ona görə də Türkiyənin işi asan olmayacaq. Ancaq Türkiyə azad olmaq istəyirsə, bu problemi kökündən həll etmək məcburiyyətindədir”.
