ABŞ Prezidenti Donald Tramp İsrailin Baş naziri Benyamin Netanyahu ilə Vaşinqtonda keçirdiyi mətbuat konfransında ABŞ-ın Qəzza zolağının uzun müddətə işğalına və orada iqtisadi inkişaf imkanları yaratmağa hazır olduğunu bildirib. Eyni zamanda, Tramp Qəzza sakinlərinin bir və ya bir neçə Yaxın Şərq ölkəsi tərəfindən təmin edilən yeni yerə köçməsini təklif edib. Fələstinliləri məskunlaşdıran ölkələr arasında ABŞ lideri xüsusi olaraq Misir və İordaniyanın adını çəkib.

Ukrayna Yaxın Şərq Araşdırmaları Mərkəzinin icraçı direktoru, politoloq İqor Semivolos isə hesab edir ki, Trampın bu ideyası həyata keçməsi mümkün görünmür.

“Trampın Qəzzə ilə bağlı fantaziyaları, eləcə də jurnalistlərlə səxavətlə paylaşdığı digər oxşar bəyanatlar reallıqdan çox uzaqdır. Fələstinlilərin köçürülməsindən danışarkən Tramp etnik təmizləmənin mümkünlüyündən söz açmış olur və bunun yaxşı olduğunu düşünür. Eyni zamanda, Amerika qoşunlarının bunun üçün istifadə olunacağı onu narahat etmir”, - deyə Semivolos yazdığı analitik məqalədə qeyd edib.

Analitikin sözlərinə görə, ABŞ Prezidentinin hakimiyyətə gələndə dünyada bütün müharibələrə son qoyacağı ilə bağlı əvvəlki açıqlamaları fonunda bu bəyanatları kifayət qədər simvolik hesab etmək olar: “Axı bütün müharibələri bitirəcəyini söyləyən siyasətçi bunu deportasiyalarla, etnik təmizləmələrlə həyata keçirəcək? Bu, müharibələri, münaqişələri necə bitirə bilər? Burada məntiqsizlik var”.

“Ümumiyyətlə, belə bəyanatların Trampın danışıqlar taktikası olduğunu başa düşmək lazımdır. Yanaşma - əvvəlcə hücum edirsən, sonra hədələyirsən, sonra tərəflər güzəştə gedir və sən praktiki olaraq heç nə itirmirsən, amma təhlükəni aradan qaldırırsan. Həqiqətən də bu taktika mövcuddur. Hətta məşhur taktikadır və həqiqətən də effektiv ola bilər. Ancaq yalnız bir şərtlə ki, digər iştirakçılar artıq "əllərini qaldırıb" gözləsinlər. Əgər belə deyilsə və qarşı tərəfin hansınınsa iddiası varsa, həm də nə iləsə hədələyirsə, deməli vəziyyət o qədər də ürəkaçan olmayacaq”, - Semivolos vurğulayıb.

“Bəs ABŞ Prezidenti birbaşa Səudiyyə Ərəbistanının Fələstin dövləti yaratmaq məqsədi olmadığını deməklə nəyə işarə vurur? Əslində Tramp bununla açıq şəkildə səudiyyəliləri fələstinlilərin maraqlarına xəyanət etməkdə ittiham edir. Ancaq heç kim bu barədə açıq danışmayacaq”, - əlavə edib.

Politoloq qeyd edib ki, Qəzza zolağı ilə bağlı vəziyyətdə ərəb ölkələrinin konsolidasiya edilmiş mövqeyi var: “Yəni Tramp bu cür açıq bəyanatlar verəndə bu sərt modeldə danışıqlar apara biləcəyinə və uğur qazanacağına tam əmindir. Nədənsə hamının onun qarşısında baş əyəcəyini düşünür. Amma heç də elə deyil. Üstəlik, onun əqidəsi onun beynəlxalq məsələlərdən tamamilə xəbərsizliyi, tarix, mədəniyyət və adət-ənənələr baxımından savadsızlığı ilə birləşir. Buna onu da əlavə edə bilərik ki, Trampın ətrafı - məsələn, qohumları vasitəsilə ona müraciət etmək imkanı olan bütöv bir ekspert fondu var - öz məqsədlərinə çatmaq üçün onu manipulyasiya etməyə çalışır və bunları yeni ideyalar kimi onun beyninə yerləşdirir. Vaxtilə Reyqan da fələstinliləri harasa yerləşdirmək haqqında düşünürdü. Yəni, bu fikirlər heç də yeni deyil. Amma bütün bu ifadələr yalnız Trampın öz xəyal dünyasında işləyən fantaziyalardır. Onların isə reallıqla heç bir əlaqəsi yoxdur”.