ABŞ-da Xamenei və oğlunun aradan götürülməsi planı hazırlanıb. ABŞ İranın Ali Lideri Əli Xamenei və oğluna sui-qəsd planı hazırlayır. Bildirilir ki, Amerika administrasiyası "İrana bomba əldə edə bilməməsi halında uranı “simvolik olaraq” zənginləşdirmək imkanı verəcək bir təklifi nəzərdən keçirməyə hazırdır". Prezident Donald Trampın adını açıqlamayan məsləhətçisinə istinad edən Axios qeyd edir ki, bu, Vaşinqton və Tehran arasında razılığa gəlmək üçün kiçik bir şans yaradır: "Bu arada, ABŞ prezidenti Donald Trampa Ali Liderin birbaşa sui-qəsdini əhatə edən hərbi variantlar təklif olunub. Belə bir seçimə Xamneyinin oğlunun, onun mümkün varisi hesab edilən Müctəbanın aradan qaldırılması" da daxildir.
İndi Tramp Xameneinin qarşısına seçim qoyub: Ya nüvə silahı, ya da oğlun. Bu, eyni zamanda Trampın "qorxunu yarat, sövdələşməyə get" taktikasına bənzəyir. İranın uranı simvolik səviyyədə (məsələn, 3-5%) zənginləşdirməsinə icazə vermək, Tehranın "nüvə dövləti" iddiasını sındırmaq və onları iqtisadi asılılığa salmaq üçün bir manevr ola bilər. Tramp göstərmək istəyir ki, Baydenin edə bilmədiyini o etdi; İranı məcburi barışığa sövq etdi, üstəlik şərtləri də özü diqtə etdi.
Xameneinin və oğlunun hədəfə götürülməsi planı isə başqa bir variantdan xəbər verir. ABŞ artıq İrandakı mövcud sistemin dəyişməsini istəyir. Rejimin yox, məhz sistemin. ABŞ-ın "Tramp Putinlə danışa bilir, Si ilə danışa bilir, Makronla danışa bilir, onlar dövlət başçısıdır; İrandan isə Pezeşkianla danışa bilir, ancaq o, dövlət başçısı deyil. Ən pisi odur ki, Tramp Xamenei ilə danışa bilmir" şikayəti göstərdi ki, Vaşinqton ya danışa bildiyi adamı dövlət başına gətirmək, ya da mövcud olanı real dövlət başçısı etmək istəyir. Yəni, ABŞ İranda "vilayəti-fəqih" adlı bu "ruhani krallıq" sisteminin ləğvinə çalışır.
Təbii ki, ABŞ bunu Mahmud Əhmədinejad kimi radikal, Həsən Ruhani kimi ruhani, nə də İbrahim Rəisi kimi "Ayətullah Qətliam" titulu daşıyan və rejimin ayaqda qalması üçün hər şeyə hazır olan şəxslərin dövründə istəməzdi. Pezeşkianın da rejimə sədaqəti bəllidir. Əlbəttə, İranın indiki prezidenti də Xameneinin kadrıdır və məhz onun xeyir-duası ilə o kresloya oturub. Yoxsa o, nə parlamentin başında dayanan Məhəmməd Baqir Qalibafı, nə də ali rəhbərin "mənəvi oğlu" Səid Cəlilini məğlub edə bilməzdi.
Məsələ ondadır ki, Pezeşkian müəyyən qədər liberal fikirlərin sahibidir, Qərblə dialoqa açıqdır, müharibə istəmir, ən əsası isə SEPAH və onun azğın siyasi-bürokratik qoluna rəğbət bəsləmir. ABŞ onunla anlaşa biləcəyinə və onun İranı "teokratik" ölkədən daha liberal bir dövlətə çevirə biləcəyinə inanır. Ancaq bu, heç də asan məsələ deyil. Belə bir ssenaridə Pezeşkian həm rejimin siyasi-ruhani qanadı, həm də iqtisadi-hərbi qanadı (SEPAH) tərəfindən hədəfə alınacaq. İran prezidenti Xamenei sonrası "böyük təmizliyə" getməli, başsız qalan rejimin bütün qol-budağını sındırmalıdır. Bunun üçün isə lazım olan təkcə bir reallıq var: ABŞ İranla (və ya onun yeni siması ilə) barışmalıdır.
Müəllif: Zeynal Əmrəliyev - Mənbə: "DİA-AZ"