Hər kəsə məlumdur ki, hal-hazırda dövlət-hakimiyyət orqanlarının əsas məqsədi şəhərlərdə, rayonlarda, qəsəbələrdə, iri yaşayış məntəqələrində, hətta ucqar dağ kəndlərində yaşayan sakinlərin üz-üzə qaldıqları problemləri aradan qaldırmaqdan ibarətdir. Belə bir səbəbdən də, bu günə kimi bir neçə dövlət layihə proqramları işlənib hazırlanmış və onların həlli mərhələli şəkildə də həyata keçirilmişdir. Faktdır ki, həyata keçirilən layihə proqramlarının nəticəsi olaraq, artıq şəhərlə kənd arasında əmələ gələn fərqlər kifayət qədər aradan qaldırılmış və demək olar ki, yerlərdə sosial problemlərin çoxu öz həllini tapmışdır. Unutmaq olmaz ki, istənilən sahədə əmələ gələn sosial problemlərin varlığı, məhz ərazidə idarəetməni həyata keçirən şəxsin və ya şəxslərin xarakterik xüsusiyyətindən, idarəçilik qabiliyyətinin göstəricisindən, yerli sakinlərə bəslədiyi münasibətin varlığından və s. asılı olur. Bundan əlavə, hər bir vəzifə sahibinin iş fəaliyyətinə, idarəçilik bacarığına sakinlər tərəfindən ictimai münasibət də bəslənilir. Belə olan halda hərkəs məcbur olur ki, daşıdığı vəzifəsinin öhdəsindən layiqincə gəlsin və rəhbərliyin ona göstərdiyi etimadı doğrultmağa çalışsın. Ən əsası isə, ölkə rəhbəri cənab İlham Əliyevin həyata keçirdiyi daxili siyasi kursa lazımi töhvələrini bəxş edə bilsin. O halda ortaya belə bir sual çıxır ki, görəsən hər bir vəzifə sahibi möhtərəm Prezidentin bu yöndə çağırışına əməl edirmi, yoxsa öz düşüncəsinə uyğun addımlarını atır? Bu yöndə apardığımız araşdırmalar zamanı bəlli oldu ki, səndemə Ağsu rayonunun Kalva kənd icra nümayəndəsi Cavid Qədirovla bərabər, bu kəndin bələdiyyə sədri də “kor atı minib köndələn çapmaq”la məşğul olurlar. Məsələn, bir neçə gün bundan öncə redaksiyamıza Ağsu rayonu, Kalva kənd sakini, Birinci Qarabağ müharibəsi veteranı Hacıyev Alov Ağasan oğlu tərəfindən şikayət ərizəsi daxil olub. Alov Hacıyev şikayət ərizəsində Kalva kənd icra nümayəndəsi Cavid Qədirovun və bu kəndin bələdiyyə sədrinin qanunsuzluq əməllərindən bəhs edib, hər iki vəzifə sahibinin heç bir qanun-qaydanı qəbul etmədiklərini, bir kimsəni saya salmadıqlarını bildirir. Bu şəxs qeyd edir ki, “Mən Birinci Qarabağ müharibəsi veteranıyam və hal-hazırda Ağsu rayonunun Kalva kəndində yaşayıram. 20 il daxili işlər orqanlarında çalışmışam və hal-hazırda təqaüddəyəm. Qeyd edim ki, Ağsu çayının yaxınlığında, hansı ki, hər kəsin “Köç” adı ilə tanıdığı ərazidə bir vaqonum var idi və həmin vaqonda köç aparan çobanlar çay içər, çörək yeyərdilər. Bir müddət bundan öncə Kalva kənd icra nümayəndəsi Cavid Qədirov və bu kəndin bələdiyyə sədri aidiyyatı dövlət orqanlarına şikayət etdilər ki, həmin vaqon kafe kimi fəaliyyət göstərir. Bu şəxslərin etdikləri şikayətdən sonra VÖEN açdırdım və vergi ödədim, eyni zamanda vaqona kassa aparatı da qoydurdum. Bir sözlə, həmin vaqondan kiçik çayxana kimi istifadə etməyə başladım. Qeyd edim ki, 29 apreldən bir gün əvvəl həmin vaqonda oğurluq hadisəsi baş verdi və hər iki vəzifə sahibi həmin gün orada olurlar. Baş verən oğurluq hadisəsindən sonra dərhal polisə müraciət etdim. 29 apreldə gecə saat 04 radələrində Kalva kənd icra nümayəndəsi və bələdiyyə sədri vaqonu yandırırlar və mən səhər saatlarında ora gedəndə gördüm ki, hər iki şəxs ərazidə çəkiliş aparırlar. Həmin vaxt onlara dedim ki, əvvəlcə oğurluq etdiniz, az sonra da yandırdınız ki, olub-qalan izləri itirə biləsiniz. İndi nə axtarırsınız deyə onlara sual verdikdə, hər iki şəxsin cavabı o oldu ki, “bizi bura polis göndərib”. Mən həm oğurluq, həm də yanğın hadisəsi ilə bağlı polisə ərizə ilə müraciət etmişəm, DİN-nin 102 xidmətinə məlumat vermişəm. Onu da bildirim ki, yanğın hadisəsi baş verərkən hadisə yerinə hüquq-mühafizə orqanlarının və FHN-nin əməkdaşları gəlmişdilər. Həmin vaxt bildirmişdim ki, yanğını Kalva kənd icra nümayəndəsi və bələdiyyə sədri törədiblər. Düzdür, ilk əvvəl hər iki vəzifə sahibi bunu boyunlarından atmağa çalışsalar da, az sonra FHN-nin əməkdaşları “vaqon yandırılmışdır” deyə yekun rəylərində belə yazırlar. Mən bu olaylarla bağlı polisə müraciət etdikdən sonra, hər iki vəzifə sahibi hal-hazırda Ağsu- İsmayıllı-Şamaxı zonasında meşə gözətçisi işləyən qardaşım oğluna ilişməyə, qardaşım oğlunun cavabdehlik daşıdığı meşə zolaqlarını yoxlatdırmağa başladılar. Qeyd edim ki, mən 2019-cu ildən hər iki vəzifə sahibi ilə çəkişmədəyəm və onlara bir neçə dəfə məhkəmədə qalib gəlmişəm. Hətta, təhlükəsizliyimizin təmin olunması məqsədilə cənab Prezidentə bir neçə dəfə müraciətlər də ünvanlamışam. Elə ki, bu şəxslər qol qoyduqları çirkin əməllərindən əl çəkmədilər, son anda məcbur olub Kalva kənd bələdiyyəsinə aid meşə zolaqlarını yoxlatdırdım. Bu yöndə aparılan yoxlamalar zamanı 150 ədəd ağacın qanunsuz kəsilməsi faktı aşkarlandı. Əlavə olaraq Ekologiya və Təbii Sərvətlər Nazirliyinə də şikayət ərizəsi göndərdim. Nazirlik əməkdaşlarının iştirakı ilə aparılan yoxlamalar zamanı, təqribən 1 ha sahədə 700 ədəd ağacın məhv olunduğu müəyyən olundu. Yəqin ki, həmin ağaclar ya kömür işi ilə məşğul olan şəxslərə, ya da ki, hansısa ağac emalı sexlərinə satılıb.
Onu da bildirim ki, qeyd olunan ərazidə şəxsi təsərrüfatım var və təsərrüfatıma qardaşım baxır. Hər kəsin “Köç” adı ilə tanıdığı ərazidə olan vaqonumun Kalva kənd icra nümayəndəsi və bələdiyyə sədri tərəfindən yandırılması faktı, hələ də öz əhəmiyyətini itirməyib və bu işdə mən hər iki vəzifə sahibini günahkar hesab edirəm. Bu şəxslər 2019-cu ildə cənab Ramil Usubova mənimlə bağlı əsassız şikayət ərizələri yazır və mənə qarşı şər-böhtan atırdılar. Bu gün də onların yalnız bir məqsədləri var, o da mənə mümkün qədər ziyan vurmaqdır. Şükürlər olsun ki, ölkə rəhbərimiz sahibkarlığın inkişaf etdirilməsinə bu gün də öz dəstəyini göstərir və hal-hazırda təsərrüfatımda 80 baş camış var. Buna baxmayaraq, Kalva kənd icra nümayəndəsi və bələdiyyə sədri bu gün də təsərrüfatımı ləğv etməyə çalışırlar. Amma, nə qədər cəhd etsələr də, onlar bu yöndə istəklərinə çata bilmirlər. Uzun müddətdir ki, bu kimi məsələlərlə bağlı məhkəmələrdə çəkişsək də, hər dəfə mənim xeyrimə məhkəmə qərarları çıxarılıb. Bir neçə gün bundan öncə isə, Ağsu RİH başçısının qəbulunda oldum və cənab Rövşən Bağırova lazımi sənədlərimi təqdim etdim. Cənab Başçı təqdim etdiyim sənədlərə baxıb “Burada qeyri-adi nəsə yoxdur. Ərazi kənd təsərrüfatı təyinatlı torpaq sahəsidir və həmin sahədən təyinatı üzrə də istifadə olunur” dedi. Kalva kənd icra nümayəndəsi və bələdiyyə sədri iddia edirlər ki, guya təsərrüfatıma aid tövlə qanunsuz tikilib. Amma, onlar belə bir iddialarını məhkəmələrdə sübuta yetirə bilmirlər. Bu gün isə onlar bizi başqa-başqa şəxslərin vasitəsilə şərləməyə çalışırlar”.
Bəli, baş verənləri təhlil edib belə qənaətə gəlmək olar ki, hər iki vəzifə sahibi sahibkarlıq fəaliyyəti ilə məşğul olan Kalva kənd sakini, Birinci Qarabağ müharibəsi veteranı Alov Hacıyevə lazımi dövlət dəstəyini göztərmək əvəzinə, bu gün onlar hansısa maraqlarını güdürlər və həmin şəxsi “ölüm həddinə” çatdırırlar. O halda sual oluna bilər ki, görəsən möhtərəm Prezidentin hər bir vəzifə sahibinə bu yöndə verdiyi tapşırıqlar Kalva kənd icra nümayəndəsi Cavid Qədirova və bu kəndin bələdiyyə sədrinə aidiyyatı yoxdurmu? Düşünürük ki, hər iki şəxs qol qoyduqları bütün hüquqpozmalara görə, gec-tez hüquqi müstəvidə ünvanlanan suallara cavab verməli olacaqlar. Yazıda adı çəkilən hər kəsin mövqeyini dinləyə bilərik. //AZERİNFO.MEDİA//
