“Füzuli rayonundan məcburi köçkün düşmüşük. Qardaşım bu torpaq uğrunda şəhid olub. Qaradağ rayonu “Qobu Park 3”-də, bina 33, mənzil 88-də məskunlaşmışıq. 5 ildir verilən evdə yaşamaq mümkün deyil. 3 dəfə özümüz təmir etmişik. Təmir olunmasına baxmayaraq qurunt suları evdə çox problemlər yaradır. Suyun mənbəyini tapa bilmirlər. Demək olar ki, bina yaşayışa yararsızdır. 2 dəfə ev əşyalarımı atıb, yenilərini almışam. Aldığım əşyalar, mebellər yararsız vəziyyətə düşüb”.
Bunu Moderator.az-a açıqlamasında şikayətçi Xatirə Əsədova deyib.
O daha sonra problemlə bağlı bir neçə yerə müraciət etdiyini bildirib:
“Aidiyyatı qurumlara müraciət etmişəm. Müraciətim cavabsız qalıb. 8 nəfər 3 otaqda qalırıq. Oğlumun evi bu vəziyyətdə olduğu üçün gəlib mənim yanımda qalırlar. 8 nəfəri mən necə 3 otağa yerləşdirim? Burada mənzillərin 50 faizi boşdur. Təxminən yarıdan çoxunu kirayə veriblər. Qaçqınkom-a məlumat verirəm, amma maraqlanmırlar. Deyirlər ki, bizlik deyil. Dünən də görüşmüşəm, deyirlər ki, növbəniz nə vaxt çatarsa o zaman gəlib baxarıq.Bəs kim baxır? Bəs sizi bu vəzifəyə niyə qoyublar? Sizi vəzifəyə qoyanda deməyiblər ki, özbaşına mağaza, aptek, küçə satışlarına yol verin. Siz öz kefinizdəsiz, mənim kimilər isə suyun içində yaşamağa məcbur qalır” deyə şikayətçi bildirib.
