“ÜNVANI SƏHV SALIBLAR”
“İranda “Eurovision-2012” mahnı müsabiqəsinin əleyhinə həyata keçirilən kampaniya Azərbaycana təzyiq göstərmək, guya ölkəmizin islami dəyərlərdən geri çəkildiyi haqqında rəy formalıaşdırmaq, Azərbaycanın dindar vətəndaşlarında dövlətə qarşı inamsızlıq yaratmaq məqsədi daşıyır”. APA-nın məlumatına görə, bu fikirlər politoloq Mübariz Əhmədoğluna məxsusdur.
Onun sözlərinə görə, İranın dini dairələri əhaliyə belə bir ideya təlqin edirlər ki, guya “Eurovision-2012” zamanı Azərbaycanda gey-parad keçiriləcək və bu məsələ hakimiyyət və cəmiyyət tərəfindən dəstəklənir: “İranın www.ansar-tabriz.com saytının məlumatına görə, Ruhullah Becani İran prezidenti Əhmədinecata məktub yazaraq bildirib ki, “26 mayda sünni Azərbaycanda gey-parad keçiriləcəyi təqdirdə, biz Təbriz əhalisi ilə Azərbaycanın bu şəhərdəki konsulluğunu bağlayacağıq”. Lakin faktlar göstərir ki, İranın özündə seksual inqilab yaşanır. 2011-ci ildə bu ölkədə seksual zəmində 1950 cinayət işinə baxılıb. Onlardan 1410-u uşaqbazlıq və eynicinslilərin seksual əlaqələri barədə olub. Maraqlıdır ki, bu halların böyük hissəsi İranın Qum şəhərində baş verib.
Əldə olunan məlumatlara görə, Qum homoseksualizm və uşaqbazlığın ən geniş yayıldığı İran şəhəridir. Yeri gəlmişkən, “sünni Azərbaycan” termini İran-Ermənistan əməkdaşlığının məhsuludur. İran saytları farsca antiazərbaycan yazılar yazır. İranın Ermənistandakı səfirliyinin erməni əməkdaşları bu yazıları rus dilinə tərcümə edir, sonra rusdilli erməni saytlarında yerləşdirilir. Bu proses İranın prezident aparatı və İranın Bakıdakı mədəniyyət mərkəzinin rəhbəri Ocaq Necat tərəfindən koordinasiya edilir. Ermənilər İsrailə hörmət əlaməti olaraq rus dilində “sionist” terminini “sunnit” termini ilə əvəzləyirlər. Nəticədə, İranın dediyi “sionist Azərbaycan” ermənilərin tərcüməsində “sünni Azərbaycana çevrilir”.
Bakıda “Eurovision” Mahnı Müsabiqəsinin keçirilmə müddəti yaxınlaşdıqca bəzi ölkələrdə və qüvvələrdə narahatlıqlar artır. Bu narahatlıqların içərisində hər növü vardır. İrandan olan narahatlıq, narazılıq bir ayrı cürdür. Yarışmanın keçirilməsinə 40 gündən də az vaxt qalıb, amma ortalıqda hansısa bir gey-parada hazırlığın real əlamətləri yoxdur. Təxminən 6-7 ay bundan qabaq kimsə, hansısa bir saytda məlumat yayılıb, sonra da dərhal təkzib olunsa da, İran üçün hələ də bu məlumat qüvvədədir. İranın mətbu orqanları zurna-kəranay orkestri düzəldib gecə-gündüz Bakıda gey-paradla bağlı çalsalar da, ortalıqda bir şey yoxdur, bu məlumatın mənbələri sırasına yenisi qoşulmur. O baxımdan İran özü ara-sıra Azərbaycanda gey-paradın keçiriləcəyi ilə bağlı fikirləri gündəliyə gətirir.
www.ansar-tabriz.com saytında yazılanlara da bu qəbildən yanaşmaq daha düzgündür. Azərbaycanda gey-parad olmayacaq, bu, dəqiqdir. Çünki ölkənin və millətin sahibi var və o, bu məsələyə münasibətini bildirib. Kimsə gey-parad imitasiyası yarada bilər. İstisna deyil ki, İran İslam Respublikasından kimsə gey-parad imitasiyasında iştirak edə bilər, çünki statistikalar İranın gey-paradın təşkili üçün bazasının olduğunu göstərir. Bu ölkənin gey-parad təşkilində marağı da göz qabağındadır.
İranın bəzi din xadimlərinin və yaxud din adından danışanlarının əcaib məntiqi vardır. Yuxarıda göstərdiyimiz statistika islami dəyərdən danışan bir dövlət üçün faciədir. Və ya İran parlamentinin müvəqqəti kəbin - siğə ilə bağlı qəbul etdiyi qanun İranın həm etik-əxlaqi dəyərlərə, həm də qadınlara münasibətinin göstəricisidir. İran rəhbərliyinin, dini liderlərin xəbəri, sanksiyası olmadan parlamentdə müasir dövrdə müsəlman qadınını fahişəliyə sürükləyən belə bir qanun qəbul edilə bilməzdi. Hətta qırmızlı fənərli Amsterdamda qadınların cinsi istismarı reqlamentləşdirilib. Yəni bir kişi ilə əlaqədə olan qadın digər kişi ilə 6 saat sonra əlaqədə ola bilər. İranda siğə haqqında qanun qadının cinsi istismarına reqlamenti qadağan edir.
Şah dövründə İran xalqına cəmi bir şey qadağan olunmuşdu. Mollalar bundan istifadə edib şahı devirdilər:
- bu gün İranda əhaliyə Tasuada iştirak etmək qadağandır;
- ilaxır çərşənbəni qeyd etmək günahdır;
- İran əhalisi hətta Quranın yandırılmasına etiraz edə bilməz.
Təbrizin ənsari-hizbullahları bunların dərdini çəksin.
Siğə haqqında qanun aləmi qarışdırıb. Bir gündə bir neçə kişi ilə əlaqədə olan qadının doğduğu uşağın atası kim hesab olunacaq, ata necə müəyyənləşəcək?! Təbrizin ənsari-hizbullahları belə işlə məşğul olan qadın və kişilərin üzərində nəzarət qoysun. Dinin beli qırılan yerdir. Bir sual məni yaman düşündürür-elə arvadın doğduğu uşaq müctəhid ola bilərmi?
Təbrizin ənsari-hizbullahları Təbrizdəki konsulluğumuzu qovmaqla məşğul olmasın, enerjisini sadaladığımız işlər üçün qorusun.
İranın dini liderlərinin Azərbaycanda gey-paradı bu qədər aktuallaşdırmasının digər məqamları da ola bilər. İranda Azərbaycandakı gey-paradı İslam dininin vəziyyəti ilə əlaqələndirirlər. Fikrimizcə, düzgün yanaşmadır: Azərbaycanda gey paradçılıq nə vəziyyətdədirsə, İranda da İslam dini o vəziyyətdədir.
Azərbaycanda kifayət qədər tolerant, lakin öz dəyərlərinə, adət-ənənələrinə sadiq cəmiyyət mövcuddur. Azərbaycan cəmiyyəti və hökuməti heç bir halda gey-parad kimi milli mentalitetimizə, dinimizin tələblərinə zidd aksiyaların keçirilməsinə tərəfdar ola bilməz”.
