2-5 aprel tarixlərində erməni təxribatının qarşısını olan zaman şəhid olan hərbiçilərimizin xatirəsi xalqımız tərəfindən qürur hissi ilə yad edilir. Bu gün Füzuli rayonu istiqamətində gedən döyüşlərdə düşmənə ağır zərbə vuran və qəhrəmancasına şəhid olan ADP sədri Sərdar Cəlaloğlunun qardaşı oğlu Rasim Məmmədovun anım mərasimi keçirildi.
Qeyd edək ki, 3 aprel tarixində şəhid olan mayor Rasim Məmmədov aprelin 5-də Naxçıvanda torpağa tapşırılıb. Şəhidin dəfn mərasiminə 10 mindən çox adam qatılıb. Şəhid R.Məmmədovun Naxçıvanda olan yas mərasiminə qatıla bilməyənlər üçün isə Bakıda yerləşən mərasim zallarının birində anım mərasimi təşkil olunub.
Mərasimə biz də qatıldıq və şahidi olduq ki, bu, təkcə Rasim Məmmədovun xatirəsinə deyil, bütün şəhidlərimizi yad etmək istəyənlər üçün təşkil olunan mərasimdir. Mərasimdə bir sıra ictimai xadimlər, partiya sədrləri və sıravi vətəndaşlar iştirak edirdilər. Hər kəs şəhidlərimizlə qürur hissi keçirdiyini söyləyib, onların xatirələrinə dualar oxuyurdular.
Şəhidin əmisi, ADP sədri Sərdar Cəlaloğlu bildirdi ki, bu gün onlar qürur hissi keçirirlər: “Şəhidimizlə bağlı təşkil olunan yas mərasiminə Naxçıvanda da həddindən artıq çox insan qatıldı. Bakıdan da insanlar yas mərasimində iştirak etmək arzularını bildirdilər. Lakin məsafə uzaq olduğu üçün biz buna razı olmadıq. Ona görə də nəzərdə tutduq ki, bir gün də Bakıda yas saxlayaq. Əslində biz bu mərasimi Rasim üçün təşkil etməmişik. Mərasim zalının divarına bütün şəhidlərimizin şəkillərini vurmuşuq. Məclisdə də elan etdik ki, bu, Azərbaycan şəhidləri üçün təşkil olunan anım mərasimidir. Kimsə hansısa rayona şəhid yasına gedə bilməyibsə, buranı ziyarət edə bilər. Bizim üçün fərqi yoxdur. Şəhidlərimizin hamısı xalqımızın, millətimizindir. Ailənin şəhidi ola bilməz. Ailəninki bir can itkisi ola bilər. Biz Naxçıvanda olduğumuz zaman Türkiyənin İğdır vilayətinin rəhbərləri özləri ilə gətirdikləri din xadimləri ilə birlikdə yas mərasimində iştirak etdilər. Türkiyənin vətəndaşları adından başsağlıqlarını bildirdilər. Eyni zamanda Türkiyə səfiri də şəxsən mənə zəng edərək, öz başsağlığını verib. Yəni bu hal artıq şəhidlikdən çıxıb, böyük hadisəyə dönüb”.
S.Cəlaloğlu bildirdi ki, son hadisələr Azərbaycan xalqının qüdrətini ortaya qoydu: “Biz əvvəllər siyasi nümayəndə heyəti kimi xarici ölkələrdə olduğumuz zaman yüksək rütbəli adamlarla görüşürdük. Qarabağla bağlı Azərbaycana kömək istədiyimiz zaman bizə bir cavab verirdilər ki, sizin xalq döyüşmək istəmir və siz öz torpaqlarınızı almaq istəmirsiz. Lakin son hadisələr göstərdi ki, Azərbaycan xalqı öz torpağını qorumaq üçün hər şeyə hazırdır. Xalqda çox qeyri-adi ruh yüksəkliyi var. Çox maraqlı bir məlumat əldə etdim ki, insanlar könüllü şəkildə orduya getmək üçün adlarını yazdırıblar. Bu zaman içərilərində bir nəfər də hərbiyə yararsız şəxs olub. Ona deyiblər ki, sən hərbiyə yararsızsan, sənin adını yaza bilmərik. Həmin şəxs bildirib ki, döyüşməyə yararsızamsa, yük daşımağa, əsgərlərimizə digər bu kimi yardım etməyə yararlıyam. Adımı yazın. Açığı, bu cür ruh yüksəkliyini uzun illər idi ki, Azərbaycanda görmürdük. Bizə elə gəlirdi ki, gənclərimizdə vətənpərvərlik hissi yoxdur. Ancaq indi bunun əksinin şahidi olduq. Naxçıvanda Rasim Məmmədovun tabutuna əlimizi vura və dəfn mərasimində insan çoxluğundan ona yaxınlaşa bilmədik. Gənclərin də demək olar ki, hamısı həqiqətən ölümə getməyə hazır idi. İndi dünya deyir ki, Azərbaycan istəsə, gedib İrəvanı da tutar. Bu, artıq danışıqlarda status-kvonun dəyişməsi deməkdir. Erməni başa düşür ki, torpaqların müharibə yolu ilə qaytarılması, Ermənistanın süqutuna səbəb ola bilər. Eyni zamanda artıq Rusiya da gördü ki, dünyanın bir çox ölkələri Azərbaycanın tərəfindədir və müharibənin başlaması onların da xeyrinə olmayacaq. İndi növbə Azərbaycan diplomatiyasının, siyasətinindir. Əgər biz, cəbhədə hərbiçilərimizin əldə etdikləri bu nailiyyəti, siyasi və diplomatik nailiyyətə çevirə bilməsək, millət kimi uduzacağıq. Çevirərsək, irəliyə doğru nəhəng bir addım atmış olacağıq”.
Sərdar Cəlaloğlu indiki halda iqtidar-müxalifət münasibətlərinin gərginləşməsinin əleyhinə olduğunu da söylədi: “İqtidarı hansısa xəyanətdə ittiham etmək, kiminsə evinin qarşısında aksiya keçirmək tamam yanlışdır. Baxın, İraq-İran müharibəsində 1 milyon adam öldü. Müharibənin sonunda hər iki dövlət öz sərhədində qaldı. Ancaq heç kim bu iki dövlətə demədi ki, 1 milyon əsgər öldü, bəs, niyə nailiyyət əldə olunmadı. Çünki müharibədə yalnız qələbə olmur. Ona görə də bizdə də indi hər məsələyə ləkə atmaq lazım deyil. Ordu bu xalqın, dövlətindir. Ordunun hakimiyyətə aidiyyəti yoxdur. Xalqın ruhunu qırmaq, ordunun nailiyyətinə kölgə salmaq olmaz. Ermənilər, Rusiya etiraf edir ki, Azərbaycan Ermənistandan bir çox məsələlərdə qat-qat üstündür. Ona görə də şəxsən mən bir şəhid ailəsi kimi qürur hissi keçirib, fəxr edirəm. Heç kəsə də şəhid verdiyimizə görə nə minnət edirik, nə də irad tuturuq. Məncə başqa şəhid ailələri də bu cür düşünür. Çünki biz övladımızı vətən üçün böyütmüşük. Vətənin torpağı ilə böyüyüb, vətənə də qurban gediblər. Burada qeyri-adi heç nə yoxdur”.
S.Cəlaloğlu bildirib ki, şəhidlərimizin 30 faizinin zabit olması bir məqama diqqəti çəkir: “Əvvəla deyim ki, mənim qardaşım oğlu da daxil olmaqla, digər zabitlərimiz də könüllü şəkildə irəli atılıblar. Ola bilər ki, ilk baxışda bizə bu, yanlış kimi gələ bilər. Lakin burada məhz zabitlər nümunə göstəriblər. O nümunə əsasında əsgərləri irəli aparıblar. Bir çox yerlərdə bu adamlar bildiriblər ki, əsgərlər geri çəkilsin, biz döyüşəcəyik. Şəxsən Rasim Məmmədov irəliyə atılanlardan olub. Elə birinci də o şəhid olub. Bu, onu göstərir ki, ordunun özündə münasibətlər artıq tamam fərqlidir. Bundan öncə belə bir münasibət var idi ki, əsgəri verirlər qabağa və ölən də o olur. Ancaq indi tam fərqli mənzərənin şahidi olduq və artıq düşüncələr də dəyişdi. Rasim Məmmədov tabor komandiri olub. Tabeliyində 500-ə yaxın hərbi qulluqçu olub. Bu adamın özünün qabağa getməsi artıq onu göstərir ki, bizim ordumuzda da Türkiyə ordusunda olduğu kimi, zabitlər öndə gedirlər. Hər birimizdə bir məğlubiyyət kompleksi var idi. Artıq o yoxdur”.
S.Cəlaloğlu Rasim Məmmədovun ölümündən 4 saat əvvəl ailəsinə telefon açaraq, söylədiyi fikirlər barəsində də danışıb: “Rasimin atası da birinci qrup əlildir. O da tabor komandiri olub. Hətta Heydər Əliyev ona milli qəhrəman adı da vermişdi. O zamanlar Ali Sovetdə onun sənədlərini itirdilər. Rasim hələ 6-7-ci sinifdə oxuduğu zaman atası yaralanmışdı. Hərbçinin həyatının necə olması ona bəlli idi. Lakin buna baxmayaraq o, Hərbi Akademiyaya qəbul olub, hərbçi oldu. Hərbi xidmətinin 90 faizini ön cəbhədə keçirdi. Onu da qeyd edim ki, ailəmizdə 3 zabit, bir əsgər cəbhədədir. Vətən uğrunda ölməsək, ölümə razı olmasaq, bu itkilərdən narahat olsaq, heç zaman Qarabağı azad edə bilməyəcəyik. Rasim şəhid olmadan öncə gedib, atası ilə görüşüb. Atasına deyib ki, mən səndən də 1 mərtəbə yuxarı çıxacağam. Bu isə onun şəhid olmaq istəyinin göstəricisidir. Ölümündən bir neçə gün əvvəl isə həyat yoldaşına zəng edib, bildirmişdi ki, mən ad günümə şəhid kimi gələcəyəm. 2-3 gün sonra onun ad günüdür. Rasim şəhid olduqdan sonra ailə üzvlərimizdən heç birimizdə ruh düşkünlüyü yoxdur. Əksinə, cəbhədə olan qohumlarımız daha da mübariz formada xidmətlərini davam etdirirlər. Rasim ölümündən 4 saat öncə ailəsi ilə telefonla danışıb. O, bildirib ki, ermənilərə elə “turp əkdim” ki, bir daha özlərinə gələ bilməyəcəklər. Atasına da deyib ki, sənin intiqamını aldım. 4 saat ondan sonra şəhid olmuşdu. Hər baxımdan qəlbimiz sakitdir. O, ölümündən öncə öz qisasını da almışdı. Hər birimiz öləcəyik. Ancaq şəhid kimi ölmək başqadır. Hesab edirəm ki, Azərbaycan xalqı şəhidlərə borcludur. Şəhidlər bizim bayrağımız kimi bir atributumuzdur. Onları çox yüksək tutmalıyıq. Bu ruhda xalqı tərbiyə etsək, tezliklə Qarabağı da alacağıq. Əsas olan ruh yüksəkliyidir. Ruhumuz sınmasa, özümüzdən qat-qat güclü dövlətin də qarşısında əyilmədən dayana biləcəyik”.(musavat.com)
