Prezident İlham Əliyev aprelin 30-da, ayın son günündə keçirdiyi müşavirəsində bir daha bəyan elədi ki, islahatların alternativi yoxdur.
Bu, dövlət başçısının növbəti anonsu idi ki, ölkədə gedən dəyişikliklərlə, islahatlarla barışmayan, hesablaşmayan, yeniləşmək istəməyən, köhnə sistem qaydaları ilə işləmək tərəfdarı olan qüvvələrin yeri qapının ağzı olacaq.
Necə ki, praktikada strategiyanın şahidi olmuşuq: nazirlər, icra başçıları yola salınıb.
Lakin İ.Əliyevin yeni idarəçilik modeli ilə ayaqlaşmaq istəməyən məmur korpusu var və hələ də islahatları tormozlamaqla məşğuldur.
Onların sırasında yerli icra strukturları xüsusi nəzərə çarpır. İcra Hakimiyyətləri ilə bağlı narazılıq həm aşağılarda, həm yuxarılarda qalmaqdadır.
Reportyor.info-nun bu mövzuda apardığı araşdırmalar çox ciddi faktları üzə çıxarıb. Faktlar ölkənin cənub zonası ilə əlaqədardır.
Məlum olur ki, cənub hakimiyyəti regionları viran qoyaraq, mərkəzi hakimiyyətə ciddi fəsadlar zəmini yetişdirir.
Azərbaycanın həssas bölgələrindən olan cənub rayonlarında inkişafın “i” hərfi belə yoxdur və icra başçıları prezidentə xoşagəlməz problemlər yaratmaqdadırlar.
Onlar gedişatın finalını hesablaya bilmirlər ki, nə ilə nəticələnə bilər. Çünki qazanc, biznes maraqları, merkantil fəaliyyətlərinə başları möhkəm qarışıb və əhalinin narazılıq dozasını analiz etmirlər.
Ondan başlayaq ki, Lənkəran cənub zonasının mirvarisi hesab edilsə də, son illərdə heç bir inkişaf getməyib, icra başçısı Taleh Qaraşov sələfi Süleyman Mikayılova rəhmət oxudur.
Əldə etdiyimiz məlumata görə, icra başçısı T.Qaraşov Lənkəranda biznes imperiyasını inkişaf etdirməkdədir: onun dəniz kənarındakı oteli tam hazırdır, yayda istifadəyə veriləcək. Oğlu isə rayonda düyü əkməyə girişib.
Qaraşovun oğlu Lənkəranda tamet-metlax biznesindən əlavə bölgənin əsas əkinçilik sahələrindən olan düyü biznesini nəzarətə götürür.
Sakinlər xəbər verirlər ki, icra başçısı ilə oğlu Lənkəranda bütün sahələri ələ alıblar, boş yerləri satırlar.
Bunun nəticəsidir ki, Qala xiyabanında səkini kommersiya obyekti tikmək üçün satıblar, mərkəzi xəstəxananın qarşısını pay-püş ediblər, bir qarış boş torpaq sahəsi saxlamayıblar.
Əhali isə Qaraşovların hegemonluğundan narazıdırlar və vaxtilə Ələkbərovların İsmayıllıdakı hökmranlığı ilə müqayisə edirlər. Allah axırını xeyir eləsin…
Biz isə sizə kimdən deyək, kimdən danışaq, cənub zonasının ikinci regional mərkəzlərindən olan Masallının viran qoyulmasından, icra başçısı Rafil Hüseynovun əməllərindən…
Rafil Hüseynovun obyektlərindən biri Oncaqala kəndində yerləşən В«Rahat MarketВ» çörək zavodudur.İcra başçısının Masallıda ələ keçirdiyi ikinci ən böyük obyekt isə Təzə Alvadı kəndində yerləşən Asfalt Zavodudur. Bu zavoda iş adamı Xudayar Rəhimovla şərikdir.
Qeyd edək ki, bu zavod ancaq В«dövlət tapşırıqlarıВ»nı yerinə yetirməklə məşğuldur. Belə ki, hər hansı bir kəndə asfalt yolun çəkilməsi lazımdırsa, bunu mütləq həmin zavod həyata keçirməlidir.
R.Hüseynovun X.Rəhimovla şərikli bir obyektidə Yardımlı yolu üstə olan “REXO” istirahət mərkəzidir.Rafil Hüseynov yeni bizneslə də məşğul olmağa başlayıb.
Beləki, Masallı rayon Viləş çayının Digah kəndindən qum daşıma biznesi yaradılıb və buradan əldə olunan gəlir bir başa icra başçısına çatdırılır. Rayonda isə hər hansı abadlıq-quruculuq getməyib, problemlər aşıb-daşır.
Sanki prezident onları xalqla işləmək, bölgələri inkişaf etdirmək yox, oliqarx, alverçi, biznes adamı olmaq üçün təyin edib.
Reportyor.info araşdırıb ki, növbəti rayon Cəlilabaddır. Əziz Əzizov istibdadından yenicə qurtulmuş Cəlilabad indi də Namiq Zeynalov kabsu yaşamaqdadır.
N.Zeynalov hələ ki biznes sahələrinə əl qoymağa macal tapmayıb və kəşfiyyat xarakterli siyasət yürütməkdədir ki, hansı obyektin gəlirli, hansı işin perspektivli olduğunu öyrənsin.
Əvəzində onun mövqeləri deputat Kərəm Həsənovla, kənd təsərrüfatı idarəsi müdiri Rahib Kərimovla toqquşur.
Eyni zamanda gəldiyi gündən rayonda heç bir yenidənqurma işləri aparmayıb, Əzizovdan qalan problemlər həllini tapmayıb, əhali onun qəbuluna düşə bilmir. Bir müddət əvvəl Cəlilabadda kartof üsyanı da xatırlanmalıdır.
İcra başçısı nəinki sıravi vətəndaşları, hətta Komanlı kənd sakini, I qrup əlil olan Rəşad adlı şəxsə qarşı belə saymamazlıq etmişdi. Əlil arabasında icra başçısı ilə görüşə can atan Rəşad idarənin işçiləri tərəfindən də təzyiqlərə məruz qalmışdı.
Ona nə köməklik etmişdilər, nə də problemlərini dinləmişdilər. Cəlilabadın mütləq-hakimi Namiq Zeynalov Əmlak Komitəsinin Dövlət Reyestri Xidmətinin rəis müavini vəzifəsində çalışıb.
Cənub bölgəsinin batmaqda olan yerlərindən biri də Biləsuvardır. Mahir Quliyev rayonun mütləq-hakimidir. O da T.Qaraşovdan geri qalmır.
Belə ki, Mahir Quliyev icra başçısı təyin olunandan sonra rayonda özü üçün 1000 hektardan çox torpaq sahəsi ayırıb.
Orada taxıl, qarpız və sarımsaq əkdirir. Onunla yanaşı müavinlər və şöbə müdirləri də böyük torpaq sahələrini ələ keçiriblər.
Şoran torpaqlarda əkinçiliklə məşğul olmağın heç də asan olmadığını bildirən biləsuvarlılar dövlət proqramlarından yararlanmaq istəyirlər. Amma kimsə onların müraciətlərinə əhəmiyyət vermir.
Başqa bir məlumatda isə bildirilir ki, Biləsuvar rayonuna kifayət qədər böyük məbləğdə dövlət vəsaitləri ayrılsa da rayonda ciddi heç bir iş görülmür. Buna görə də icra hakimiyyətinin fəaliyyətindən ciddi narazılıqlar var.
Biləsuvar rayonunda məmur özbaşınalığı səngimir, əksinə hər gün demək olar ki, vətəndaşların hüquqları pozulur. Mahir Quliyev rayona ayrılan büdcə pullarının talan edilməsində addımbaşı ittiham olunur. Göründüyü kimi, cənub zonasının başçıları öz xanimanlarını qurublar…
