Iki gün öncə Aktualinfo.org-un Bakı şəhər sakini, sahibkarlıq fəaliyyəti ilə məşğul olan Aqil Babayevin bir qrup şəxs tərəfindən soyğunçuluğa məruz qalması və 9 milyon manat pulunun zorla əlindən alındığı barədə yaydığı müraciət ölkədə ciddi rezonansa səbəb olub. Aqil Babayevin yaxın tanışlarının bildirdiyinə görə işləri ona qarşı təşkil edən və hal-hazırda milyonlarla pulunu quldurluq yolu ilə apartdıran və bu işlərə birbaşa rəhbərlik edən, uzun illər onunla dostluq etmiş Bakı şəhərindəki ticarət şəbəkələrindən birinin sahibidir. Sözügedən ticarət şəbəkəsinin Bakıdakı məşhur “Şaurma-1” restoranlarının sahibi Natiq Sadıqov olduğu bildirilir. Baş vermiş oyğunçuluq hərəkətləinə qədər Aqil Babayev həmin ticarət şəbəkəsinin şəriki olmuşdur.
Baş vermiş soyğunçuluq hadisəsinin ən xırda detallarına qədər hüquq mühafizə orqanlarına təqdim etməsinə baxmayaraq zərərçəkən Aqil Babayevin şikayəti əsasında heç bir cinayət-hüquq xarakterli tədbir görülməmiş,əksinə dünən Nərimanov rayon Məhkəməsində onun barəsində 3 ay müddətinə həbs qətimkan tədbiri seçilib.
Ötən yazıda təqdim etdiyimiz müraciətində Aqil Babayev yazır ki, Xəzər rayonu, Buzovna qəsəbəsi, Badamlıq ərazisi, Musa Nağıyev küçəsində yerləşən bağ evində olarkən təxminən 25-30 nəfər şəxsin ondan xəbərsiz evinə daxil olduğunu görmüş, onlardan nə baş verdiyini, nədən xəbərsiz şəkildə evə soxulduqlarını soruşduqda Faiq Abdullayev adlı tanışı onun qolundan tutub qonaq otağına itələyrək onu başa salacaqlarını bildirmişlər.
Onlar Aqili məcburi şəkildə qonaq otağında oturtmuş, ona qarşı əsassız ittihamlar səsləndirmiş, heç bir səbəb olmadan onu şillə, yumruqla vurmuşlar. Eyni zamanda onlardan bir neçəsi Aqilin əl çantasını və telefonlarını zorla əlindən almış, sonra isə kodunu açmağa məcbur edərək, orada olan məlumatlara baxmışlar. Digər qrup isə evin açarlarını götürərək, otaqlarda axtarış aparmış, ona hədə-qorxu gələrək bütün var-dövlətini onlara verməyi tələb etmiş, əks təqdirdə isə onu “Banditizm”də olan tanışları vasitəsilə ora apartdırıb, istənilən adla şərlədib həbs etdirəcəklərini və bağda olan şəxsləri də şahid qismində onun üzünə qoyacaqlarını bildirmişlər.
Orada olanlardan Anar, Elnur Mehdiyev, Faiq Abdullayev, Natiq Sadıqov, Malik Məmmədov, Araz Kavə, Bəhruz Kavə, Rövşən Kavə, Elmar Orucov və digərləri ayrı-ayrılıqda Aqil Babayevi söyüb təhqir etmiş və ona qarşı fiziki zor tətbiq etmişlər. Natiqin göstərişləri əsasında Anar Aslanov və bir neçə şəxs otaqları axtararaq, əl çantasında olan 5.000 (beş min) manat pulu, 2-ci mərtəbədə yataq otağında olan 100.000 (yüz min) manat pulu və birinci mərtəbədə iş kabinetdən isə 20.000 (iyirmi min) ABŞ dollarını tapılıb götürmüşlər.
Bundan sonra Aqil Babayevin telefonundan onun adından həyat yoldaşına mesaj yazaraq, yaşadığı binanın beşinci mərtəbəsinə qalxmamağı, ora ustaların gələcəyini bildirmişlər. Daha sonra Anar Aslanov və Qalib Rzayev özü ilə 2-3 nəfər götürüb Aqilin yaşadığı evə getmişlər. Digər şəxslər isə bağda qalıb, Anardan məlumat gözləmiş, gecə saat 02 radələrində Anar zəng edərək Aqilin mənzilindən bütün pulları götürdükləri barədə məlumat verir və bundan sonra onlar hissə-hissə bağ evini tərk edirlər.
Babayev Aqil yazır ki, evə gəldikdən sonra ilk öncə BMV markalı 10-FJ-505 dövlət qeydiyyat nişanlı avtomobilin aparıldığını, evə baxış keçirərkən orada olan bütün əşyaların qarışdırıldığını, evdən 715. 000 (yeddi yüz on beş min manat pulun, 4 700 000 (dörd milyon yeddi yüz min) ABŞ dolarının və 2 kq (iki kiloqram) 999 (doqquz yüz doxsan doqquz) əyyarlı müxtəlif ölçülü külçə şəklində qızılın aparıldığını gördüm.
Hadisələr baş verdikdən sonra Aqil Babayev qorxduğundan hüquq-mühafizə orqanlarına məlumat verməmiş, sonradan qohumlarımın məsləhəti ilə 11 iyun 2021-ci il tarixdə DİN-nin 102 telefon məlumat mərkəzinə zəng edərək məlumat vermiş, eyni zamanda Daxili İşlər Naziri hörmətli cənab Vilayət Eyvazova teleqram vurmuşdur. Daxili İşlər Nazirliyi məlumatı qəbul edən kimi məsələnin araşdırılmasını DİN-nin Baş Mütəşəkkil Cinayətkarlıqla Mübarizə İdarəsinə həvalə edir. BMCMİ-dən dərhal onunla əlaqə saxlayaraq idarəyə dəvət edirlər, hadisə ilə bağlı ilkin olaraq ərizə alırlar və işi araşdırılması üçün İstintaq İdarəsinə verəcəklərini bildirdilər.
12 iyun 2021-ci il tarixdə məni yenidən BMCMİ-nə dəvət edirlər. İdarənin İstintaq Şöbəsinin rəis müavini, İstintaq və Təhqiqat Şöbəsinin rəisi, sonda isə müstəntiq Aqil Babayevi qəbul edərək geniş şəkildə izahatını alır. Aqil Babayevin qohumları bildirir ki, artıq dinməyə bilmirlər, görün hadisəni təşkil edən şəxslərin dostları nə qədər yüksəkdə oturmuşdur ki, hüquq-mühafizə orqanlarının əməkdaşları görür ki, 25-30 nəfər onun evinə basqın edərək, milyonlarla pulunu, iki avtomobilini və s. əmlakını quldurluq yolu ilə ələ keçirmiş, bununla bağlı telefon əlaqələri, hadisənin baş verməsini birmənalı şəkildə təsdiq edən çoxsaylı video kamera görüntüləri, aidiyyəti orqanlara təqdim edilmiş, nəinki cinayətkar dəstənin üzvlərindən bir nəfəri belə bu günə kimi saxlanılmamış, hətta fakta görə cinayət işi belə başlanılmamışdır. Bu hərəkətsizlik, fəaliyyətsizlik hüquq-mühafizə orqanlarının tarixində görünməmiş bir hadisədir.
Aidiyyəti dövlət orqanlar isə heç bir qanuni tədbir görmür, həmin cinayət törətmiş şəxsləri cinayət məsuliyyətinə cəlb etmir, əksinə həmin cinayətkarlara havadarlıq edən məmurların vasitəsilə bu cinayətin üstünü örtmək üçün onun əleyhinə şər-böhtan xarakterli məlumatlar uydurmaqla məşğuldurlar. Burada əsas məqsəd Aqil Babayevin 9 milyon manat pulunu, bahalı avtomobillərini, bağ evlərini, qızıllarını və digər əmlaklarının qaytarılmasının qarşısını almaqdır.
Zərərçəkən Aqil Babayevin hüquq-mühafizə orqanlarına təqdim etdiyi məlumatlardan da göründüyü kimi cinayət işinin başlanılmasına kifayət qədər əsaslar var. Lakin soyğunçuluq hadisəsinin başında dayanan “Şaurma в„–1” restoranlar şəbəkəsinin sahibi Natiq Sadıqov məlumatlara görə artıq ölkəni tərk edib. Kimdir onun arxasında duranlar? Kimdir onun ölkədən çıxmasına şərait yaradanlar? Kimdir onun törətdiyi cinayət əməlini ört-basdır etməyə çalışanlar? Bütün bu suallara əlbəttə hüquq-mühafizə orqanları tərəfindən cavab verilməlidir. Əminik ki, Daxili İşlər naziri Vilayət Eyvazov belə bir cinayətkar dəstənin yaxalanmasına və zərərçəkinin qanunla müəyyən edilmiş qaydada hüquqlarının qorunmasına təcili göstəriş verəcək.
Aktualinfo.org
