Ermənistanın xarici işlər naziri Ararat Mirzoyan G20-nin (“Boyuk İyirmi”lər) ikinci nazirlər görüşündə çıxış edib. XİN şefi fürsətdən istifadə edərək sədəqə almaq üçün özünü və ölkəsini “məzlum erməni” obrazında göstərməyə çalışıb. Mirzoyan deyib: “Mən son illərdə qlobal və regional böhranların nəticələri ilə üzləşmiş, dənizə çıxışı olmayan, orta gəlirli, dağlıq ərazisi olan bir ölkəni təmsil edirəm. Ermənistan hər bir ölkənin məqsədyönlü və uyğunlaşdırılmış siyasət və dəstək vasitəsilə öz inkişaf istəklərini həyata keçirmək imkanına malik olduğu qlobal mühiti təşviq etməklə, xüsusi vəziyyətlərdə olan ölkələrin ehtiyaclarının ödənilməsinin vacibliyini ardıcıl olaraq vurğulayır. Güclü, əhatəli, effektiv və çoxtərəfli maliyyə institutları bu məqsəd üçün çox vacibdir”. Loru dildə desək, Mirzoyan demək istəyir ki, Ermənistan özünə zorba və varlı bir sponsor axtarır. XİN başçısı vurğulayıb ki, Ermənistan dağlıq ərazidə yerləşir, bu səbəbdən də iqlim dəyişikliklərindən ciddi təsirlənir, təbii sərvəti yoxdur, qlobal və regional böhranlara cəlb edilib və s.
Mirzoyan çıxışında Azərbaycanın ünvanına növbəti dəfə əsassız, yalan fikirlər səsləndirib. O iddia edib ki, guya Ermənistan Azərbaycan tərəfindən “təcavüzə” məruz qalıb: “Bu gün bir çox regionlarda inkişafın tərəqqisinə ciddi zərbə vuran təcavüzün, silahlı münaqişələrin, geosiyasi gərginliyin, inamsızlığın şahidi oluruq. Genişmiqyaslı müharibənin nəticələri, onun suveren ərazisinə təcavüz aktları və Dağlıq Qarabağın bütün yerli əhalisi olan 140 minə yaxın qaçqın axını Ermənistanın inkişaf arzularına ciddi zərbə vurdu, lakin bu fəlakətlər hakimiyyəti sarsıda bilmədi”. Qeyd edək ki, xarici işlər nazirinin müavini Elnur Məmmədov Nyu-Yorkda keçirilən G20 XİN başçılarının iclasında bəyanatla çıxış edib. Lakin bəyanatın mətni yayılmayıb.
Ümumiyyətlə, Ermənistan özünü auksiona çıxarmış dövlət kimi aparır. Rusiyanın peykindən uzaqlaşmağa can atan ölkə yeni ağalar və maliyyə mənbələri axtarışına çıxıb. Son aylarda ən böyük dəstək ABŞ və onun maliyyə fondlarından olub. İstər Brüsseldə keçirilən 5 aprel görüşündə Blinken və Leyenin açıqladığı maliyyə yardımları olsun, istər USAİD rəhbəri Pauerin əlavə 20 milyon dollar dəstəyi olsun, bu vəsaitlərlə İrəvan beynəlxalq dayaqlar qazanmağa can atır. Prezidentin köməkçisi Hikmət Hacıyev bildirmişdi ki, postmünaqişə dövründə təcavüzkar ölkə üçün “Marşal planı” işə salınıb. İkinci Dünya müharibəsində məhv edilmiş alman faşizminin vurduğu zərərlərə baxmayaraq, bəzi dövlətlər Almaniyanın dirçəldilməsi üçün məhz həmin planı icraq etmişdilər. İndi də 30 il Azərbaycan ərazilərini talan etmiş, sərvətlərini mənimsəmiş, daşını daş üstünə qoymamış, milyardlarla dollar dəyərində azərbaycanlılara və dövlətə zərər vurmuş Ermənistanın müharibədəki biabırçı məğlubiyyətindən sonra reabilitasiyası həyata keçirilir.
Eyni zamanda müxtəlif platformalarda, tribunalarda Ermənistan rəsmiləri özlərini zərərçəkmiş tərəf kimi sırımağa çalışırlar. Xristian təəssübkeşliyini nəzərə alsaq, bu ölkənin rusların orbitindən kənarlaşdırılmaq kimi strateji məqsədləri də əlavə etsək, bəli, bəzi Qərb dövlətlərinin bu hiylələrə, saxtakar çıxışlara inanması mümkündür. Hərgah, Mirzoyanın açıqlamaları “timsahın göz yaşları”na bənzəyir. Bütün hallarda biz Qərbdən heç bir şəhərinə raket düşməyən Ermənistana dəstək görməkdəyik, nəinki Birinci və İkinci Qarabağ müharibələrində maddi-mənəvi zərər görmüş Azərbaycana...
AMİP sədri, deputat Arzuxan Əlizadə “Yeni Müsavat”a bildirdi ki, ermənilər əsrlər boyu özlərini “məzlum”, “soyqırıma” məruz qalmış xalq kimi təqdim ediblər: “Onlar dilənçi xislətlərini heç vaxt gizlətməyiblər. Elə bu yalançı məzlumluqla da qondarma dövlətin qurulmasına nail olublar. Sonra bu qondarma dövlət istifadəyə yararlı material kimi istifadə olunub. Çünki onlardan zamanında türk dünyasına zərərli bufer kimi yararlanıblar”. Onun sözlərinə görə, Türk dünyası, Azərbaycan gücləndikcə erməni yalanları ifşa olunub, nəticə olaraq torpaqlarımız işğaldan azad edilib: “Azərbaycan heç bir ölkənin torpağını işğal etməyib. Təcavüzkar Ermənistandır, amma həyasızlığı BMT-də belə davam etdirirlər. Əksinə, Qərbi Azərbaycan torpaqları Ermənistanın işğalı altındadır. Sadəcə, beynəlxalq birliyə göstərmək istəyirlər ki, ölkənin dənizə çıxış yoxdur, dağlıq regiondur, yəni dünyaya çıxışları qalmayıb. Amma Ermənistan nə qədər yazıq siması almağa çalışsa da, xeyri yoxdur. Necə ki, Qarabağa qayıtdıq, Qərbi Azərbaycana da dönəcəyik. Bu, ermənilərin qorxulu röyasıdır və reallaşacaq”.
Siyasi ekspert Ramiyə Məmmədova isə erməni rəsmilərinin ittiham xarakterli çıxışlarının sülh prosesinə zərər vurduğunu qeyd etdi. Onun fikrincə, “Azərbaycanın hücumları” deyəndə erməni tərəfi Qarabağdakı antiterror əməliyyatını və sərhəd döyüşlərini nəzərdə tutur: “Hər iki hadisədə Ermənistan ağ yalanlar danışır. Azərbaycan öz torpağına hücum edə bilməz, məntiqsiz yanaşmadır. Dinc ermənilərə də hücum olmayıb, qabaqcadan vərəqələr paylanıb, səsgücləndirici ilə mülki əhaliyə xəbərdarlıq olunub, heç kəsin burnu qanamayıb. Azərbaycan Ordusu Qarabağda separatçı və terrorçu güclərə hücum edib. Bu hücumun da səbəbi öz torpaqlarımızdan başqa dövlətin yerləşdirdiyi qanunsuz silahlı birləşmələri çıxarmaq olub. Azərbaycan Ermənistan Silahlı Qüvvələrinin Qarabağdakı tör-töküntülərini təmizlədiyi üçün dünya bizə heç nə deməyib. Fransa və bir-iki beynəlxalq təşkilatın hürməsindən əlavə reaksiya yoxdur”.
Ekspert vurğuladı ki, sərhəd döyüşləri Ermənistanın ucbatından olub: “Düşmən hərbi təxribatları gücləndirib və hadisələr şərti sərhəddə baş verib. Bu zaman Ermənistanın işğal dövründə qanunsuz olaraq irəli çəkdiyi ərazilərə nəzarəti təmin etmişik. Sərhədin dəqiqləşməsi aparılmadığı üçün iddia edə bilməzlər ki, onlara aid ərazilərdir. Artıq Ermənistanın Konstitusiya Məhkəməsi delimitasiya komissiyası ilə bağlı əsasnamənin reqlamentini təsdiq edib və ümid edək ki, sərhədlərin müəyyənləşməsi üçün praktik addımlar atılacaq. O zaman şərti sərhəd delimitasiya olunaraq hansı ərazinin kimə aid olduğu bilinəcək. Bu prosesə qədər isə İrəvanın ittihamlarının hüquqi əsası yoxdur. Hətta həmin Mirzoyan "güzgü prinsipi" ilə qoşunların sərhəddə geri çəkilməsini təklif etmişdi, azərbaycanlı həmkarı Bayramov rədd cavabı vermişdi. Biz onlara güvənə bilmərik və hazırda strateji nöqtələrə kontrol edirik. Nə zaman sərhəd dəqiqləşəcək, onda danışmaq olar. O baxımdan Mirzoyan G20 ölkələrinin xarici işlər nazirləri toplantısında köhnə blefləri təkrarlayıb".
