.
Rusiyanın Orenburq şəhərində azərbaycanlı kriminal avtoritet, “qanuni oğru” kimi tanınan Zaur Şipilov (digər ləqəbi: Zaur Naxçıvanski) hüquq-mühafizə orqanları tərəfindən saxlanılıb. Ona qarşı “cinayətkar iyerarxiyada yüksək mövqe tutmaq” ittihamı irəli sürülüb.
Bu maddə Rusiya Cinayət Məcəlləsinin 210.1-ci bəndi ilə - yəni, “qanuni oğru” statusu daşımaq və ya kriminal aləmdə liderlik etmək kimi qiymətləndirilir.
Kimdir Zaur Naxçıvanski?
Zaur Şipilov 1985-ci ildə Rusiyanın Orenburq şəhərində anadan olub. O, kriminal aləmdə nüfuzlu avtoritetlərdən sayılan Bayram Talıbovun oğludur. Şipilovun atası 2006-cı ilin aprelində “Sabirabadlı Hikmət” kimi tanınan Hikmət Muxtarovla birgə sui-qəsd nəticəsində qətlə yetirilib. Zaur isə həmin dövrdə 21 yaşında olub və bu illərdə Rövşən Lənkəranski tərəfindən himayə olunub. Məhz Lənkəranski onun atasının yolunu davam etdirməsində mühüm rol oynayıb.
Zaur Şipilov, 2013-cü ildə Türkiyədə keçirilən bir “sxodka”da Rövşən Lənkəranskinin təşəbbüsü ilə “qanuni oğru” titulu alıb və 27 yaşında artıq “Zaur Naxçıvanski” kimi tanınmağa başlayıb. 2015-ci ilin oktyabr ayında Moskvada narkotik vasitə saxlama ittihamı ilə saxlanılaraq 3 il həbs cəzası alıb, 2018-ci ildə azadlığa çıxıb.
İndi isə o, Rusiyada kriminal iyerarxiyada yüksək mövqeyə sahib olmaq ittihamı ilə üzləşib və yenidən məhkəmə qarşısına çıxacaq.
Musavat.com
