Fransa Milli Assambleyasına Azərbaycandan Qarabağda ləğv olunmuş qondarma rejimin hazırda həbsdə olan liderlərini və hazırda Bakıda saxlanılan digər məhbusları azad etməyi tələb edən yeni qətnamə verib.

Qətnamədə deyilir ki, erməni məhbuslar üzərində davam edən məhkəmə prosesləri “Azərbaycanın Ermənistanın varlığını məhv etmək üzrə daha geniş strategiyasının bir hissəsidir”.

Qətnaməyə əsasən, bu siyasət həbsdən kənara çıxır və “Artsax”da erməni əhalisinin sistemli şəkildə “məhv” edilməsini, eləcə də Azərbaycanın nəzarəti altında olan ərazilərdə erməni tarixi, mədəni və dini irsinin məhv edilməsini əhatə edir.

Qətnamə, həmçinin Ermənistanın Azərbaycanla sülh səylərində iştirakını dəstəkləyir və Fransa ilə Ermənistan arasında strateji tərəfdaşlıq yaratmağa çağırır. Qeyd edək ki, Fransa hakimiyyət orqanları vaxtaşırı bu cür qətnamələr qəbul etməklə və digər siyasi addımlar atmaqla Azərbaycan-Ermənistan sülh prosesini pozmağa çalışıb.

Azərbaycan və Ermənistan liderlərinin iyulun 10-da Əbu-Dabi şəhərində keçirilən görüşündən sonra Milli Assambleyaya təqdim olunan qətnamə daha çox siyasi təxribat məqsədi daşıyır. Hətta ABŞ Prezidenti Donald Trampın Azərbaycanla Ermənistan arasında sülhə nail olunduğu barədə iki dəfə açıqlama verməsindən sonra bu cür qətnamələrin gündəmə gəlməsi səbəbsiz deyil.

Xüsusilə də ABŞ-nin təqdim etdiyi “yol xəritəsi” əsasında Zəngəzur dəhlizinin açılması barədə müzakirələrdən az sonra erməni lobbisinin Azərbaycana qarşı fəallaşması müşahidə olunur. Öncə ABŞ-də ermənipərəst mövqeyi ilə tanınan 78 konqresmen Prezident Trampa müraciət edərək erməniləri Qarabağa qaytarmağı tələb edir. Həmin təşəbbüsə imza atan Konqres üzvlərinin əksəriyyəti Demokratlar Partiyasının üzvü olan və Trampa qarşı müxalif mövqedən çıxış edən şəxslərdir.

Yəni Trampın Azərbaycanla Ermənistan arasında sülh yaratmaq və kommunikasiyaları açmaq təklifinin qarşısını almaq istəyən qüvvələrin hərəkətə keçdiyini görmək olar. İyulun 24-də Nikol Paşinyanın Altaydakı ekoloji konfransa səfəri zamanı Rusiya tərəfinin Trampın planına etirazı haqqında sonradan ortaya çıxan məlumatlar Ermənistanın Zəngəzur dəhlizini ABŞ-yə icarəyə verməkdən imtina etməsinin səbəblərinə aydınlıq gətirdi.

Bunun ardınca Fransa Milli Assambleyasına təqdim olunan qətnamənin də məqsədi sülh prosesini “baltalamağ”a yönəlib. Həm ABŞ konqresmenlərinin müraciətində, həm də Fransa Milli Assambleyasının qətnamə layihəsində üstü-üstə düşən bir məqam var. Hər iki sənəddəki çağırışlar Azərbaycan ərazisində erməni separatizminin bərpasına yönəlib.

Yəni ABŞ-dəki və Fransadakı erməni lobbi dairələri münaqişənin yenidən bərpasında maraqlıdır. Lakin Azərbaycanda erməni separatizmi tamamilə məhv edilib və mövcud status-kvonu dəyişmək mümkün deyil. İşğaldan azad edilmiş ərazilərdə Azərbaycanın suverenliyi tamamilə bərpa olunub.

Həmin ərazilərdə isə yalnız Azərbaycan vətəndaşlığını qəbul etmiş, Azərbaycan ərazilərinin işğalında, etnik təmizləmə və soyqırım cinayətlərində iştirak etməmiş erməni sakinlər yaşaya bilərlər. Lakin bundan öncə, 1988-1989-cu illərdə Ermənistandan zorla qovulmuş 250 min nəfər azərbaycanlı öz yurdlarına qayıtmalıdır.