“Hələ sovetlər vaxtı ruslar azərbaycanlılara yuxarıdan aşağı baxırdılar. Məsələn, ruslar Cənubi Qafqazdan azərbaycanlılarla müqayisədə erməni və gürcülərə daha çox üstünlük verir, yaxşı münasibət göstərirdilər. Əlbəttə, dediklərim Azərbaycanda yaşayan ruslara aid deyil. Əksinə, burada yaşayan ruslar bizim necə yaxşı, qonaqpərvər olduğumuzu bilirlər. Amma Rusiyada yaşayan rusların əksəriyyəti bizə o qədər də müsbət yanaşmırdılar”.

Bunu “Reytinq” qəzetinə açıqlamasında hərbi ekspert və psixoloq Azad İsazadə hazırda Rusiya mediasında Azərbaycana və Rusiyada yaşayan azərbaycanlılara qarşı aparılan kampaniyadan danışarkən deyib.

Azad İsazadə xatırladıb ki, Boris Yeltsindən sonra hakimiyyətə gələn Vladimir Putinlə Azərbaycan hakimiyyəti arasında əməkdaşlıq, qarşılıqlı faydalı münasibətlər olub: “Yəni tərəflər bir-birini daha yaxşı başa düşüb, ikitərəfli maraqlara uyğun davranışlar sərgilənib. Bu səbəbdən də Kremldən Azərbaycana qarşı addımlarla bağlı komanda gəlmirdi. Odur ki, münasibətlərdə bu kimi hallar özünü qabarıq göstərmirdi.

Xatırladım ki, 20 yanvar hadisəsindən sonra Azərbaycanda da Rusiyaya qarşı münasibət mənfiyə doğru dəyişdi, bəzən nifrət həddinə çatdı. Lakin rəhbərlik bu prosesi idarə edə bildi ki, qabarıq görünməsin. Ancaq son olaylardan sonra Rusiyada Azərbaycana qarşı mənfi fəaliyyəti müşahidə edirik. Mən bilmirəm, belə komanda Rusiya rəhbərliyindən gəlib, ya yox. Amma televiziylar, bloqqerlər görürlər ki, rəhbərliklər arasında, eləcə də münasibətlərdə gərginlik yaşanır, dərhal əsl xarakterlərini nümayiş etdirirlər”.

İsazadənin fikrincə, nəzərə almaq lazımdır ki, Rusiyada əhali arasında şovinizm yüksək həddədir və bunu istənilən xalqa qarşı istiqamətləndirmək mümkündür:

“Üstəlik, Rusiya səviyyəsində yuxarıdan göstəriş gəlmir ki, bu prosesi dayandırın. Ancaq biz anlamalıyıq ki, digər xalqlara qarşı da belə münasibətlər daima olub. Məsələn, ruslar ukraynalılara da yuxarıdan aşağı baxır, onları “xoxol” adlandırırdılar. Amma iki dövlət rəhbərliyi arasında vaxtilə münasibətlər müsbət olduğu üçün bu iki slavyan xalqı arasında sülh, əməkdaşlıq var idi. İndi isə tam əks proses baş verir.

Qazaxlarla bağlı da vəziyyət eyni olub. Eləcə də ermənilərə və gürcülərə də münasibət hazırda yüksək deyil. İndi şovinizm inkişaf etdiyindən ruslar düşünürlər ki, “hamı pisdir, biz yaxşıyıq”. Yanaşma təxminən belədir”.

Müsahibimiz qeyd edib ki, Azərbaycan hər zaman Rusiya ilə yaxşı davranıb, müttəfiqlik və əməkdaşlıq qurub, mehriban qonşuluq münasibətləri yaradıb: “Halbuki bizdə bəzi insanlar düşünürdülər ki, Rusiyadan bizə dost və müttəfiq olmaz. Ancaq Azərbaycan dost, mehriban qonşu ölkə olduğunu nümayiş etdirirdi. Təəssüflər olsun ki, Rusiya bizim sərnişin təyyarəmizi vurmaqla münasibətləri pozdu”.