Sumqayıt Apellyasiya Məhkəməsində dələduzluqda təqsirləndirilən R.Əhəmdovun barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Ruhiyyə Əsgərovanın keçirilən prosesdə qərar elan olunub.
Qərara əsasən, apellyasiya şikayəti təmin edilməyib.
İttihama görə, R.Əhəmdov 1 fevral 2016-cı il tarixdən 15 yanvar 2024-cü il tarixədək Dövlət Gömrük Komitəsinin “Azterminalkopmleks” Birliyinin Xidmətlərin təşkili idarəsinin Xaçmaz şöbəsinin kiçik mütəxəssisi vəzifəsində işləyib. O, 16 fevral 2023-cü ildə bibisi oğlunun əvvəllər rəsmi nikahda olduğu arvadı, zərərçəkmiş F.Hüseynovaya şəxsi əlaqələri, təsir imkanları və niyyətinə dair bilə-bilə yalan məlumatlar verib Rusiyadan Azərbaycana malların daşınması ilə məşğul olan firmalara sərmayə qoyub fəaliyyətdən gəlir əldə etmək barədə yalan vədlər verib. O, daha sonra zərərçəkmişə digər vədlər verərək onun ümumilikdə 38 000 manat pulunu dələduzluq yolu ilə ələ keçirib.
Zərərçəkmiş F.Hüseynova məhkəmə ifadəsində bildirib ki, R.Əhəmdovun atası tərəfindən ona dəymiş ziyan, yəni 38 000 manat tam ödənilib. Ona dəymiş ziyanın tamamilə ödənilməsi barədə məhkəməyə ərizə təqdim edib.
Sumqayıt Şəhər Məhkəməsinin hökmü ilə R.Əhəmdov 1 il müddətə dövlət orqanlarında, kommersiya və qeyri-kommersiya təşkilatlarında rəhbər və maddi-məsul vəzifə tutmaq hüququndan məhrum edilməklə 4000 manat məbləğində cərimə cəzası kəsilib.